2019-yilgi Davlat dasturi loyihasi: iqtisodiy sohada qanday oʻzgarishlar boʻlishi kutilmoqda?

Muhtaram Prezidentimiz Sh.Mirziyoyevning 2018-yil 28-dekabr kuni Oliy Majlisga taqdim etgan murojaatnomasida belgilab berilgan asosiy gʻoya va takliflari hamda 2017-2021-yillarda Oʻzbekiston Pespublikasini rivojlantirishning beshta ustuvor yoʻnalishi boʻyicha harakatlar strategiyasida belgilangan asosiy vazifalarni inobatga olgan holda ishlab chiqilgan “Faol investitsiyalar va ijtimoy rivojlanish yili” Davlat dasturi loyihasi uni fuqarolar bilan maslahatlashgan holda yanada takomillashtirish maqsadida jamoatchilik muhokamasiga taqdim etildi.

Ayni kunda 5 ta boʻlim va 253 ta banddan iborat boʻlgan ushbu Davlat dasturi yurtdoshlarimiz tomonidan qizgʻin muhokama etilayapti.

Ushbu loyihaning “Iqtisodiyotni rivojlantirish va faol investitsiya jalb etishning ustuvor yoʻnalishlari” deb nomlangan 3-boʻlim bilan tanishsangiz, mazkur yilda mamlakatimizda faol investitsiyalarni jalb etish orqali iqtisodiyotimizni tubdan rivojlantirish boʻyicha keng koʻlamli ishlarni amalga oshirish belgilanayotganini his qilasiz.

Loyihada iqtisodiy barqarorlikni mustahkamlash va yuqori iqtisodiy oʻsish surʼatlarini saqlab qolish maqsadida iqtisodiyot rivojiga jiddiy turtki beradigan sohalarni rivojlantirish startegiyasini ishlab chiqarish, “yashirin iqtisodiyot” salmogʻini iqtsodiy usullarni ishlatgan holda qisqartirish, qoʻshimcha imkoniyat va manbalar hisobidan byudjet defitsitini kamaytirish, yil boshidan joriy etilayotgan bojxona tarif siyosatini tatbiq etish orqali tashqi bozordagi oʻzgarishlarning iqtisodiyotimizga salbiy taʼsirini kamaytirish, mamlakatni 2030-yilga qadar ijtimoiy-iqtisodiy jihatdan kompleks rivojlantirish kontseptsiyasini ishlab chiqish nazarda tutilgan.

Shuningdek, loyihada davlat organlari ishida shaffoflik va ochiqlikni taʼminlash, byudjet mablagʻlaridan samarali foydalanish tizimini yanada takomillashtirish va mahalliy byudjetlarning yuqori turuvchi byudjetlarga bogʻliqligi darajasini qisqartirish, mahalliy harajatlarni moliyalashtirish vakolatini bosqichma-bosqich yuqori byudjetdan quyi byudjetga oʻtkazish nazarda tutilganligi koʻrsatilgan.

2019-yilgi Davlat dasturi loyihasida samarali soliq maʼmuriyatchiligini yoʻlga qoʻyish masalasiga ham alohida eʼtibor berilgan.

Soliq islohotlarini amalga oshirish davrida isteʼmol mahsulotlari narxining barqarorligini va inflyatsiya darajasi prognoz koʻrsatkichlaridan oshmasligini taʼminlash, buning uchun esa isteʼmol mahsulotlari narxining barqarorligini taʼminlash, xususan qoʻshilgan qiymat soligʻi keng joriy qilinishi bilan isteʼmol tovarlari narxi oʻsishining oldini olish choralari nazarda tutilgan.

Shuningdek, loyihada bank va molya tizimini isloh qilish hamda sohaga zamonaviy bozor mexanizmlarini joriy qilish, unda davlat mablagʻlari hisobidan imtiyozli bank kreditlari ajratish amaliyotini tubdan takomillashtirish nazarda tutilganligi muhim ahamiyat kasb etadi.

Ushbu loyhada sugʻurta bozorini isloh qilish va jadal rivojlantirish, valyuta bozorini yanada erkinlashtirish maqsadida chet el valyutalari bilan bogʻliq amaliyotdagi asossiz cheklovlarni bartaraf etish ham nazarda tutilgan.

“Faol investitsiyalar va ijtimoiy rivojlanish yili” Davlat dasturi loyihasida tadbirkorlik faoliyatini qoʻllab-quvvatlash va yanada rivojlantirish, iqtisodiyotni boshqarishning bozor mexanizmlarini joriy etish va unga davlat aralashuvini kamaytirish, iqtisodiyotning yetakchi tarmoqlarini isloh qilish va rivojlantirish orqali sogʻlom raqobat muhitini yaratish va qishloq xoʻjaligida bozor mexnizmlarini joriy qilish orqali uni jadal rivojlantirish masalalariga ham alohida eʼtibor berilgan.

2017-2021-yillarda Oʻzbekiston Pespublikasini rivojlantirishning beshta ustuvor yoʻnalishi boʻyicha harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi loyihasida koʻzlangan masalalar xalq farovonligini yuksaltirishga xizmat qiladigan omillar hisoblanadi.

Shu oʻrinda yurtdoshlarimizdan mana bu manzilda joylashtirilgan davlat dasturi loyihasi boʻyicha fikr va mulohazalar, takliflar bildirishlarini soʻrab qolamiz.

Allambergan JUMANIYoZOV.