Terim mavsumida 4 mln.ga yaqin daromad topgan ilgʻor terimchilar mahallada ham ragʻbatlantirildi

Bu yildagi paxta yigʻim-terim mavsumida ham mahallalardagi tashabbuskor terimchilardan tashkil topgan terim otryadlari faol ishtirok etib, tuman paxta xirmoniga oʻz hissalarini qoʻshdilar. Fermer va dehqonlarning mashaqqatli mehnatlari evaziga yetishtirilgan hosilning isrof boʻlishiga yoʻl qoʻymaslik uchun bor kuch-gʻayratlarini ishga soldilar.

14-noyabr kuni tumandagi Navoiy nomidagi mahallada paxta yigʻim-terimi mavsumida tashkil etilgan terim otryadining ilgʻor terimchilarini taqdirlashga bagʻishlangan tadbir boʻlib oʻtdi. Tadbirda tuman hokimligidan Ilhom Nurullayev, Mahalla fuqarolar yigʻini raisi Vahob Oʻrozaliyev, hudud boʻyicha tuman Ichki ishlar boʻlimi profilaktika inspektori Ilhom Abutov, mahalla posboni Quvvat Esamurodov, “Qaynonalar” kengashi raisi Zulxumor Shixniyozova hamda mahalla faollari ishtirok etdilar. Mahalla fuqarolar yigʻini raisi Vahob Oʻrozaliyev terim otryadi boshligʻi, mahalla faoli Azimboy Doʻschonovning tashabbuskorligi, terimchilarning jadal saʼi-harakatlari natijasida kuniga 6 tonnadan ziyod paxta topshirilib borilgani, ilgʻor terimchilarning 4 mln.ga yaqin daromad topishga erishganlari hamda barcha terimchilarning tuman paxta xirmoni yuksalishiga munosib hissa qoʻshganlari haqida mamnuniyat bilan soʻzladi. Shuningdek, tumanning 4-sektor hududida joylashgan fermer xoʻjaliklaridagi dalalarda paxta yigʻim-terimiga koʻmaklashgan mahalla terim otryadi uchun qulay sharoit yaratilgani, tushlik vaqtida muntazam isssiq ovqat bilan taʼminlanib turilgani va terim pullarining oʻz vaqtida toʻlanib borilgani terim surʼatini yanada oshirganini ham aytib oʻtdi.

Tadbirda terim otryadining ilgʻor terimchilari,eng koʻp paxta terib, mahalla fuqarolaridan 4 mln.ga yaqin daromad topgan Saida Abdullayeva, 3 mln.dan ziyod daromad olgan Rayhon Kenjaboyeva, Sabohat Bobojonova, Boris Nojkin, Oʻrozboy Ibodullayev, Gulnoza Davletova, Sanobar Tojimurodova, Zulfiya Otajonovalarga “Faxriy yorliq”lar berildi. Ular bilan birga terim davomida faol ishtirok etgan yana 40 nafar mahalla fuqarolariga ham tuman hokimligi va mahalla fuqarolar yigʻini nomidan sovgʻalar topshirildi.

O.Xudoyberganova.