Shunday oila bor...
"Oq oltin” ovulida istiqomat qiluvchi Xoʻjanovlar oilasi oʻzlarining mehmondoʻstligi, bagʻrikengligi bilan elu yurtning nazariga tushishgan. Xonadon sohibasi Toʻlgʻonoy opa Xudoybergenova oʻn barmogʻi hunarli ayollardan. Turmush oʻrtogʻi Otamurod Xoʻjanov bilan yigirma besh yildan beri bir oila boʻlib ahil turmush kechirib, uch nafar farzandni oq yuvib, oq tarab voyaga yetkazgan.
Toʻlgʻonoy opa hozirgi kunda ikki kelinning suyukli qaynonasi, hayot maktabida koʻp yutuqlarga erishgan, yuzlaridan nur yogʻilib turgan Guljon momoning esa suyukli kelini, fayzli, obod oila bekasi.
Otamurod Xoʻjanov koʻp yillar sobiq Turgenev nomli maktabda ishlagan, hozirda esa dehqon va chorvador. Toʻlgʻonoy opa oʻsimliklarni himoya qilish stantsiyasida, biolaboratoriyada ishladi. Hozirdanafaqada boʻlishiga qaramay hunarmandchilik bilan shugʻullanadi. Opaning qoʻlidan chiqqan quroq yostiq, koʻrpachalarning oʻzi naq sanʼat asariga mengzaydi. Chiroyli nimchadan tortib, zamonaviy kiyim-kechaklargacha toʻqiydi. Ularning xonadoni boʻsagʻasidan hatlar ekansiz, oyogʻingiz ostidagi gilamlar koʻzingizni quvontiradi. Bir qarashda bozordagi qimmat gilamlardan boʻlsa kerak deb oʻylashingiz mumkin. Aslida esa bular opaning oʻzi toʻqigan ijod namunalaridir. U gilamdoʻzlik bilan ham shugʻullanadi va koʻplab shogirdlari ham bor. Uning isteʼdodli shogirdlaridan Oypora, Muyassar, Tursunoy, Sanamjon, Gulbahor, Halimalar ham mohir gilamdoʻz boʻlib qolishgan. Opa uchun hunar - tuganmas boylik. Uni yoshlarga boshqalarga oʻxshab falon soʻm evaziga emas, shunchaki qiziqishlariga qarab oʻrgatadi. Shogirdlarining hech biridan hech narsa olmaydi. Sidqidildan oʻrgatadi. "Har bir ishda shogird qolish kerak, shogird boʻlganda ham ustozdan oʻtadigan shogird” qabilida ish tutadi. Oʻgʻillari ham usta, hunarmand, sportchi. Kichik oʻgʻli Mansur Nukus olimpiya zahiralari sport kollejida oʻqib yurgan kezlarida sportning suzish turi boʻyicha Respublika birinchiligida qatnashib uchinchi oʻrinni egalladi. Toʻlgʻonoy opa yana boʻsh vaqtlarida shirinliklar, tortlar ham pishiradi.
- Bu ishlardan ortib dam ololma-sangiz kerak-a, - deb soʻraganimda:
- Mening mana shu quroq tikib, gilamlarni toʻqiganim dam olganimda,- deb kulib qoʻydi. Mana shunday jonkuyar, fidoyi ayollar koʻpayayotganligidan suyundim. Hunarmandchilik ishlaridan ortib vaqt topib dehqonchilik va bogʻdorchilik ishlarida turmush oʻrtogʻiga yordam beradi. Ularning hovlisidagi tomorqa yerida mevali daraxtlar koʻp. Ayniqsa, olma.
Toʻlgʻonoy opada havas qilsa arzigulik xislatlar koʻp. Mehribon, bagʻrikeng, kelinlarini ham xuddi oʻz qizlaridek yaxshi koʻradi. Hovlisiga kirishingiz bilan tozalikka, orastalikka guvoh boʻlasiz. Hovlidan begʻubor qishloq havosiyu, obod turmush nafasi ufurib turadi. Eng muhimi, bu xonadon sohib va sohibalarining koʻngillari oboddir. Har qanday obod turmush eng avval, koʻngil obodligidan boshlanadi
Aziza MADRAHIMOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
