PAXTA XIRMONIMIZ TOBORA YuKSALAYaPTI

Mustaqillik yillarida mamlakatimizda qishloq xoʻjaligi sohasining eng asosiy boʻgʻini hisoblangan paxtachilikni rivojlantirishga alohida eʼtibor berildi. Shu boisdan ham ilgarigi davlat va jamoa xoʻjaliklari oʻrnida fermer xoʻjaliklari tashkil etilib, ularning zimmalariga har bir qarich yerdan unumli foydalanib, paxta hosildorligini oshirish vazifasi yuklatildi.

Yerning haqiqiy egalariga aylangan fermer xoʻjaliklari rahbarlari paxta hosildorligini oshirish yoʻlida barcha bilim va tajribalarini, kuch-gʻayratlarini safarbar etib, bu vazifani astoydil bajarishga harakat qildilar.

Mana, bir necha yildirki, tumanimizda davlatga paxta topshirishning shartnomaviy rejalari oshirib bajarib kelinmoqda. Keyingi yillarda 40-45 tsentnerchi fermer xoʻjaliklari safi ancha kengaydi.

Bu yilgi ogʻir ob-havo sharoitida mehnat qilgan paxtakorlarimiz tabiat qiyinchiliklarini mardonavor yengib, oʻz dalalarida moʻl hosil yetishtirdilar. Ayni kunda barcha paxta dalalarida yigʻim-terim ishlari jadal surʼatlarda olib borilayapti.

Bizning “Amudaryo paxta tozalash” aktsiyadorlik jamiyatimiz mehnat jamoasi joylardagi 6 ta paxta qabul qilish maskanlarini mavsumga barvaqt shay qilib qoʻyishga harakat qildi. 31 dona paxta gʻaramlashda foydalaniladigan “PL” va “Transporter - 650” mexanizmlari, 6 ta elektron tarozi va boshqa zarur uskunalar mavsumga shay qilib qoʻyildi. Shuningdek, ichkaridagi ish jarayonini va tashqaridagi holatni kuzatishga moʻljallangan 56 ta onlayn kuzatuv kameralari belgilangan joylariga oʻrnatildi.

Ayni kunda bu yil 11240 tonna paxta qabul qiladigan “Oq oltin”, 4936 tonna paxta qabul qiladigan Qipchoq, 7623 tonna paxta qabul qiladigan Xitoy, 3699 tonna paxta qabul qiladigan Qilichboy, 3364 tonna paxta qabul qiladigan “Paxtakor” va 1662 tonna paxta qabul qiladigan Nazarxon paxta qabul qilish maskanlarida ishchilarimiz kechayu kunduz mehnat qilishayapti. Natijada xirmonga olib kelingan hosil peshma-pesh qabul qilinayapti.

Paxta qabul qilish maskanlarida mehnat qiladigan ishchilarimizning maxsus kiyimlar va issiq ovqat bilan taʼminlanganligi ularning barakali mehnat qilishlariga omil boʻlayapti.

Bizning “Amudaryo paxta tozalash” aktsiyadorlik jamiyati korxonamiz yiliga 50 000 tonna paxta xom-ashyosini qayta ishlash quvvatiga ega. Shunday ekan, biz bu yil tumanimiz paxtakorlari tomonidan topshiriladigan 33000 tonnaga yaqin paxta xom-ashyosini oʻz vaqtida qayta ishlashga erishamiz.

Biz bu miqdordagi paxta xom-ashyosini qayta ishlashimiz natijasida 11000 tonnadan ziyod paxta tolasini tayyorlashga erishamiz. Keyin bu paxta tolasi vaqtinchalik saqlashni amalga oshiradigan “Qoraqalpoq tola” va “Parvoz” terminallariga yuboriladi.

“Amudaryo paxta tozalash” AJ da urugʻlik chigit tayyorlashga ham alohida eʼtibor berilayapti. Hozirgi kunda korxonamizda “S 47 27”, “Sulton”, “Ravnaq” va “Buxoro 102” navlaridan jami 3033,4 tonna urugʻlik chigit tayyorlash boʻyicha ishlar qizgʻin davom etayapti.

“Amudaryo paxta tozalash” AJ paxta hosilini topshirayotgan fermer xoʻjaliklari bilan har kuni hisob-kitob ishlarini amalga oshirib, tegishli pullarni ularning bankdagi hisob raqamlariga oʻtkazib berayapti.

Biz bugungi kunda paxtakorlarimizning gʻayrat-shijoatlari tufayli xirmonimizning tobora yuksalayotganidan cheksiz xursand boʻlayapmiz. Paxtakorlarimizning tez kunlar ichida shartnomaviy rejalarini bajarib, oq yuzli, obroʻli boʻlishlariga tilak bildiramiz.

Sardor SULTONOV, “Amudaryo paxta tozalash” AJ Bosh direktori.