Doʻrmanlik Erkinoy Yuldasheva bir kunda 257 kilogramm paxta terdi

4-oktyabr kuni Doʻrman ovulidagi “Beshbayev Qurbangʻaliy” fermer xoʻjaligida “Ilgʻor terimchi” musobaqasi oʻtkazilib, unda tumandagi ovul va mahallalardan 44 nafar terimchi ishtirok etishdi.

Musobaqa yakunlari koʻra 257 kilogramm paxta tergan doʻrmanlik Erkinoy Yuldasheva 1-oʻrinni egalladi. Unga “Artel” televizori topshirildi. Shuningdek, 245 kilogramm paxta terib, ikkinchi oʻrinni egallagan “Bogʻ” mahallalik Shohida Egamberdiyevaga ham “Artel” televizori, 217 kilogramm paxta terib, uchinchi oʻrinni egallagan choykoʻllik Nilufar Toʻqliboyevaga “Artel” kir yuvish mashinasi topshirildi.

Musobaqada ishtirok etgan barcha 44 nafar terimchilarga Amudaryo tumani hokimligi tomonidan 1 donadan velosiped sovgʻa qilindi.

Shuningdek, “Ilgʻor terimchi” musobaqasini oʻtkazish uchun barcha sharoitlarni yaratib bergan fermer Qurbangʻaliy Beshbayevga ham tuman hokimligi tomonidan velosiped topshirildi.

8 soat davomi etgan musobaqa davomida terilgan jami 7025 kilogramm paxta uchun terim puli shu kunning oʻzida naqd shaklda berildi.

Musobaqa gʻoliblarini aniqlash va taqdirlash marosimida Oʻzbekiston Yoshlar Ittifoqi Markaziy Kengashi raisi Qahramon Quronboyev va tuman hokimi S.Yoʻldashevlar ishtirok etib, terimchilar uchun yaratilgan sharoitlar bilan yaqindan tanishdi. Shuningdek, Q.Quronboyev “Fidoyi yoshlar” otryadi aʼzolari bilan ham suhbat oʻtkazdi.

Paxtakorlarning dam olish vaqtlarini mazmunli oʻtkazish maqsadida Madaniyat boʻlimi sanʼatkorlari musiqiy chiqishlar uyushtirib, terimchilarning salomatligi tuman Tibbiyot birlashmasi shifokorlari tomonidan nazorat qilib borildi.

Allambergan JUMANIYoZOV.