Dastlabki dovondan oshdik
Bugungi kunda barchamiz paxtakormiz. Har birimizning oʻrnimiz paxta dalalarida. Negaki, yoz boʻyi qilingan mehnatlarimiz paxtazorlarda moʻl paxta hosili boʻlib dalalarni toʻldirib turibdi. Shu bois, asosiy boyligimiz boʻlgan oppoq paxtalarni yigʻib terib olishga butun kuch-gʻayratimizni sarflamoqdamiz. Har kuni 140-150 terimchi yigʻim-terim ishlarida faol qatnashib terim surʼatining oshishiga oʻz hissalarini qoʻshmoqdalar. Ularning unumli mehnat qilishlari uchun dala boshida barcha qulay shart-sharoitlarni yaratib berganmiz. Qaynatilgan suv hamma vaqt muhayyo. Tushlikda issiq choy, issiq ovqat bilan albatta taʼminlanadi. Terimchilarning tergan paxtasiga qarab mehnat haqlari oʻz vaqtida muntazam ravishda berib borilmoqda. Ilgʻor terimchilar moddiy va maʼnaviy jihatdan ragʻbatlantirilmoqda. Natijada mehnat unumdorligi oshib, terim surʼatiga surʼat qoʻshilmoqda. Mana shunday yaratuvchanlik omillarining samarasi qisqa muddat ichida fermer xoʻjaligimiz paxtakorlari dastlabki dovondan oshib yillik shartnomaviy rejalarini oshirib bajardilar va 92 gektar paxta maydonidan 200 tonnadan ziyod aʼlo navli paxta hosilini davlat xazinasiga topshirdilar. Paxtani davlatga sotishdan olingan daromad 200 mln. soʻmdan oshdi.
Bugungi mehnat gʻalabamizda albatta ilgʻor terimchilarning munosib ulushlari bor. Oqiljon Hayitboyeva, Baxtigul Erlapasova, Gulora Xudoyberganova, Gulandom Qoʻshimova, Akmal Ollaberganov va Ravshanoy Turimbetovalarning har biri mavsum boshidan buyon 5-6 tonnadan paxta terib topshirib, bugungi yuksak xirmonimizni bunyod etishda oʻzlarining salmoqli hissalarini qoʻshdilar.
Paxtazorlarimizni oralab, qolgan hosil choʻgʻini chamalab koʻrganimizda yana rejaga qoʻshimcha 160-165 tonna paxta hosilini yigʻib-terib olish imkoniyatimiz borligi ayon boʻldi. Shunda yalpi xirmonimiz 360 tonnadan oshadi va 40 tsentnerlik yuksak marraga erishamiz.
Erkin RASULOV,
"Amudaryo-Panasham” fermer xoʻjaligi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
