MEHNATIMIZ SAMARASIDAN MAMNUN BOʻLDIK

Istiqlol yillarida yosh avlod taʼlim-tarbiyasiga ulkan eʼtibor qaratilmoqda. Ularni faqat bilimligina emas, yuksak maʼnaviyatli, intiluvchan qilib tarbiyalashga, intellektual salohiyatini yuksaltirishga alohida eʼtibor qaratilmoqda.

Bunda oʻquvchilarning intilish – qobiliyatlarini sinovdan oʻtkazuvchi turli koʻrik-tanlovlarning oʻrni ulkan.

Maktabimizning 9-sinf oʻquvchisi Munojot Omonova ham oʻtgan oʻquv yilida "Orasta qizlar” tanlovida ishtirok etib, oʻz qobiliyati, intilishi tufayli maktab, hududiy, tuman va Qoraqalpogʻiston respublikasi bosqichlarida gʻoliblikni qoʻlga kiritdi.

Tumanimizning eng chekka hududi -  Doʻrmanda yashaydigan oddiy qishloq oʻsmir qizi barcha raqiblarini yengib, tanlovning respublika bosqichi gʻolibi boʻldi va Oʻzbekiston Respublikasi miqyosida Toshkent shahrida boʻlib oʻtgan "Orasta qizlar” festivaliga qatnashib, bir olam taassurotlar bilan qaytdi. Festivalda unga Respublika xotin-qizlar qoʻmitasi raisi E.Bositxonova imzosi bilan tengdoshlari qalbida vatanparvarlik tuygʻularini tarbiyalash, ulardagi yetakchilik qobiliyatini yuksaltirish, doʻstlarining oʻqishga boʻlgan intilishini qoʻllab-quvvatlash, 12-yillik majburiy taʼlim mohiyatini tushuntirish, balogʻatga yetmasdan turmush qurishning oldini olish, xonadoni va mahallasini ozoda saqlash, "Orasta qizlar” toʻgaragi faoliyatini kuchaytirish kabi vazifalar yuklanganligi haqidagi sertifikat topshirildi. Munojot umumtaʼlim maktabini tugatib, NDPI qoshidagi 3-sonli Amudaryo akademik litseyiga hujjat topshirdi va test sinovlaridan muvaffaqiyatli oʻtdi. Munojotning yutuqlari bizni cheksiz quvonchga beladi. Chunki oʻqituvchi mehnati samarasi oʻquvchilar erishgan muvaffaqiyatlar bilan oʻlchanadi-da.

Biz iqtidorli oʻquvchimiz Munojot Omonovaning kelgusidagi oʻqishlarida ham muvaffaqiyatlar tilaymiz.

Erkin QURBONBOYeV,

20-sonli umumtaʼlim maktabi direktori oʻrinbosari.

Suratda: "Orasta qizlar" tanlovi ishtirokchilari Mustaqillik maydonida.