DARSLARIMIZ YaNADA MUKAMMAL BOʻLADI

Oʻzbekiston Respublikasi Prezidentining 2012-yil 10 dekabrdagi "Chet tillarni oʻrganish tizimini yanada takomillashtirish chora-tadbirlari toʻgʻrisida”gi qaroriga muvofiq endilikda taʼlim muassasalarida chet tillarni oʻrgatishga  eʼtibor kuchaydi. Qarorni taʼlim jarayoniga tadbiq qilish uchun tayyorgarlik ishlari barcha taʼlim muassasalarida boshlanib ketdi.

Bizning 40-sonli umumtaʼlim maktabimizda ham qaror asosida sinflar uchun maxsus xonalar ajratish va ularni jihozlash , bolalarning oʻziga xos xususiyatlarini oʻrganish, taʼlim sifatini yanada yuqori bosqichlarga koʻtarish va darslarga puxta tayyorgarlik koʻrish kabi ishlar boshlab yuborildi. Qarorga asosan joriy oʻquv yilidan boshlab 1-sinf oʻquvchilari chet tilida oʻyinlar oʻynaydi, ogʻzaki soʻzlashadilar, 2-sinfdan esa alifbo oʻqish va grammatikani oʻrganishga kirishadilar.

Albatta boshlangʻich taʼlim kelgusi taʼlim bosqichlarining asosi boʻlib xizmat qiladi. Maktabimizda ingliz tilini oʻrganishga bagʻishlangan burchak tashkil qilindi. Burchakka har yangi soʻzlar tarjimasi bilan yozib boriladi va mavzuga mos qiziqarli maʼlumotlar, krossvordlar ilib boriladi.

Albatta taʼlim tizimidagi islohotlardan koʻzlangan maqsad yurtimizning porloq kelajagini taʼminlash, maʼrifatli, mustaqil fikrlaydigan tashabbuskor yoshlarni voyaga yetkazishdan iboratdir.

2012-2013 oʻquv yilida "Dars muqaddas” tadbirining davomi sifatida "Oʻrgan-oʻrgat” tadbiri joriy etildi. Ushbu tadbirda maktabimiz oʻqituvchilari jadval asosida ochiq darslar tashkil qildilar. Ingliz tili fanidan esa 8 "V” – sinfda Ollaniyozova Amina "Klassik musiqa va raqs” mavzusida, 7 "V”–sinfda men "Reklama bu ....” mavzusida namunali ochiq darslar oʻtib berdik. Dars jarayonida biz yangi pedagogik texnologiyalardan va axborot-kommunikatsion texnologiyalaridan foydalanib dars olib bordik. Darslar juda qiziqarli boʻlib oʻtdi.

Shuningdek 2012-yilning 11-may kuni respublika miqyosida uzluksiz taʼlimni tashkil etish boʻyicha koʻrgazma boʻlib oʻtdi. Bu tadbirda ham faol ishtirok etib, koʻrgazmali qurollardan, kartochkalardan va axborot-kommunikatsion texnologiyalardan samarali foydalanib, 31-maktabning 7-sinflarida "Orzular mamlakatiga xush kelibsiz” mavzusida dars oʻtdim.

Darsni bir nechta maktablardan oʻqituvchilar kelib kuzatdilar va oʻz tavsiyalarini berdilar. Darslarimizni mukammal tashkil etish uchun kelgusida ham harakat qilaveramiz.

Saida KARIMOVA,

40-sonli maktab ingliz tili fani oʻqituvchisi.