VATAN HIMOYaChILARIGA (Qasida)

Ishonch, mehr tuygʻusidan bagʻri butun,

“Temurbeklar maktabi”da yovqur, durkun,

Mustaqillik tengdoshlari zobit bu kun,

Hur Vatanning xizmatida sobit bugun –

Tinchlik, tenglik, Istiqlolning oʻgʻlonlari,

Omon boʻling, hur Vatanning posbonlari!

Mehnat sayqal bergan yurtda qish-u yozga,

Ilm-u ijod loyiq bugun qadr, eʼzozga.

Yarashmasmi, boʻlsa oshno qoʻshiq, sozga,

Intiq boʻlib Siz aytajak sevgi rozga,

Tiniqib, shod yashasin-da, jononlari,

Omon boʻling, Vatanimiz posbonlari!

Oʻzimizga aziz tuz, chang, kuyasi ham,

Tulpor tugʻar bayir, saman, biyasi ham,

Javshan, shuvoq emgan suri, tuyasi ham,

Buzilmasin uchun qushning uyasi ham,

Sergak turing sarhadlarning didbonlari,

Omon boʻling, Vatanimiz posbonlari!

Oʻzimizga tan yaxshisi, yomoni ham,

Koʻl, sahrosi, qum, giyohi, jayroni ham,

Togʻ, daryolar, buloq, chashma, oʻrmoni ham,

Dehqon manglay teri, hosil xirmoni ham,

Choyi – kavsar, huluvvodir tuz-nonlari,

Aziz biling, Vatanimiz posbonlari!

Sohiblari kasb-hunarning alvon-alvon,

Alp yigitlar yetishmoqda chechan, polvon,

Hasad qilmay, havas aylar jumla jahon,

Kuch sinashsa, ana sport, mana – maydon!

Madhiyamiz yangrab ketgan zamonlari

Faxrlaning, Vatanimiz posbonlari!

Askar boʻlmoq uchun sherday yurak kerak,

Yov bilagin qayirmoqqa bilak kerak.

Murod, maqsad, gʻurur, nurdek tilak kerak,

Temur Malik, Jaloliddin kerak! Kerak –

Alpomishlar, Goʻroʻgʻlilar, Arslonlari,

Omon boʻling, Vatanimiz posbonlari!

Xalqim sohib sabr, bardosh, matonatga,

Azon aytib nom qoʻygan choq har zuryodga.

Duo aylar: “Tinch-omonlik, saodatga,

Sodiq boʻlib tantanali qasamyodga

Yildan-yilga baxtli zamon, davronlari,

Omon boʻlsin, Vatanimiz posbonlari!”

Ulgi olib, Sulton Temur tuzugidan,

Moziydagi sarkardalar buyugidan,

Faxr etaylik, Oʻzbegimning oʻzligidan,

Tinchlik bayram – harbiylarning koʻrigida,

Sardor boʻlsin yurtning oliy Qoʻmondoni!

Omon boʻling, Vatanimiz posbonlari!

Yurtning botin-zohir – ichu tashida men,

Sizlar oʻpib tutgan Bayroq qoshida men,

Ota-onangiz-la, toʻyning boshida men,

Salom aytay Goʻroʻgʻlining yoshida men –

Taʼzim qilsin Sizga zamin, osmonlari,

Doim omon boʻling, Vatan posbonlari!

Tursunboy Abdullayev.