OILANING USTUNI

"Toʻlqin" ovuli markazidagi fayzli bir xonadonga kirib borar ekanmiz, "mehnatdan kelsa boylik – turmush boʻlar chiroylik”, degan maqol bejiz emasligiga amin boʻldim.

Xonadon sohibasi - yuzlaridan nur yogʻilib turgan Karima hoji ona bizni ochiq chehra bilan qarshi oldi. Farzandlar kamolini koʻrib, pir-u badavlat keksalik gashtini surayotgan onaxon 1947-yil "Toʻlqin” ovulida tugʻildi. Suyagi mehnatda qotgan Karima ona esini taniganidan buyon dehqonchilik uning hayoti mazmuniga aylangan.

1966-yilda oʻzi kabi mehnatkash ovul yigiti Ahmad aka bilan turmush qurdi. Ahmad aka bir umr ovulda mexanik boʻlib xizmat qildi. Bu davrda tugʻilgan farzandlar ham ota-onasi kabi mehnatsevar boʻlib voyaga yetishdi. Ular 8 nafar farzandlarining barchasi oʻqimishli boʻlishini orzu qildi va bunga erishdilar.

Katta farzandi Koʻklan Kudenov Odessa Farmatsevtika Institutining farmatsevtika fakultetini bitirdi va malakali dorishunos boʻlib yetishdi. Shu oʻrinda bir narsani aytib oʻtishni istar edimki, "Koʻklan aptekachi” degan nomni bugungi kunda tumanda bilmaydigan odam boʻlmasa kerak. Dardiga darmon izlovchi xasta kishilar uchun uning dorixonasi najot eshigi boʻlib koʻrinadi. Xushmuomala, bilimdon bu dorishunos-shifokor qanchadan-qancha xasta koʻngillarga malham boʻlmagan deysiz.

Oʻgʻli Rustam "Kamolot” yoshlar ijtimoiy harakati tuman boʻlimida hisobchi boʻlib xizmat qilmoqda. Hurliqo va Gulnora ham uning izidan borib, hisobchi boʻlib yetishdilar. Rashid Samarqand davlat Universitetining kimyo-biologiya fakultetini bitirib, hozirgi kunda dorishunos boʻlib ishlayapti.

Oilaning keyingi farzandlari Xurshid, Jamshid, Bahodir ham tumanimizda farmatsevtika sohasida faoliyat yuritishmoqda. Ular ham Koʻklan akasining kasbiga mehr qoʻyishgan.

Oiladagi 6 oʻgʻil, 2 qizning barchasi oʻqimishli, el koriga yaragan, oʻzlariga yetarli obroʻga ega boʻlib yetishdilar. Bunday barkamollikning orqasida Ahmad ota va Karima hoji onalarning fidoyiliklari mujassam.

Karima ona paxta dalasida mehnat qilish bilan birga xonadon tomorqasida dehqonchilik qilar, Ahmad ota ertadan kechgacha el xizmatida, qishloqda mexanik boʻlib ishlar edi. Bu orada boʻy koʻrsatgan farzandlar ham ota-onaga eng yaqin koʻmakdosh boʻla boshladilar. Farzand tarbiyasini muhim deb bilgan ota-ona ularni odamiylikka oshno, mehnatsevar qilib oʻstirdi, har bir ishni pishiq-puxta bajarishga oʻrgatdi.

Yillar shu tarzda oʻtaverdi, farzandlar birin-ketin oliy oʻquv yurtini tamomlab, mustaqil faoliyat yurita boshladi, ota-ona ularni oilali, uyli-joyli qilishdi. Endi bu xonadon faqat mehnatsevar, ochiq koʻngilligi bilan emas qoʻni-qoʻshni, ovul oʻrtasida oʻqimishli farzandlari bilan ham obroʻ-eʼtiborga ega boʻla boshladi.

Toʻsatdan oila boshligʻining vafoti ona va farzandlarini esankiratib qoʻydi, ona oʻzini qoʻlga oldi, farzandlariga ibrat boʻlib, oilani boshqara boshladi, endi u ham ota, ham ona, katta oilaning ustuni edi.

- Taqdir ekan, endi paygʻambar yoshiga yetgan edi, - deya xoʻrsinadi onaxon.

Ayol xonadon fayzi, obodonligi ramzi. Karima ona koʻp yillar paxta dalasida, keyinchalik 10-yil davomida bolalar bogʻchasida ishladi. Oila sarmoyasi  birmuncha toʻplanganidan keyin farzandlari bilan bamaslahat Mangʻit shahrida goʻzallik salonini ishga tushirib, toʻrt nafar qizni ish bilan taʼminladi.

Ovul markazida hashamatli toʻyxona qurdirib, unga "Ahmedova Diana” deb nom berdi, endi ovuldagi toʻy va quvonchli marosimlar shu toʻyxonada oʻtkazila boshladi.

Toʻyxonada 8 nafar ovul yoshlari ish bilan taʼminlandi.

Makkai Mukarrama, Madinai Munavvarani ziyorat qilish har bir musulmonning orzusi, bu orzuga erishish ham baxt. Karima onaga ham shunday baxt nasib yetdi. 2011-yilda Muborak Haj ziyoratiga borib, hoji ona boʻldi.

Tinib-tinchimagan onaxon oʻgʻillariga bosh boʻlib toʻyxona yonida tikuvchilik tsexini ishga tushirdi, 7 nafar qishloq qizlarini ish bilan taʼminlashdi. Hozirgi kunda katta farzandi Koʻklan aka Mangʻit shahrida hashamatli 2 qavatli dorixona binosi qurdirib, ishga tushirish arafasida, dorixonaning shundoqqina yonboshida goʻzallik saloni faoliyat yuritmoqda.

8 nafar farzand, 6 ta kelin, 2 nafar kuyov, 23 nafar nevara ardogʻida, toʻkin-sochinlikda, baxtiyor yashayotgan bu onaxonga uzoq umr, yaxshi niyatlar bildirib xayrlashar ekanmiz, Muborak Ramazon oyida boʻlgan bu ziyoratdan mening ham koʻnglim koʻtarildi: bu oyda qilingan barcha yaxshi ishlar savobga aylanishidan, qilingan barcha ezgu tilaklar ijobat boʻlishidan, kamtarin, shirin soʻzligi, obroʻsi bilan el hurmatini qozonib yashayotgan, qalbi ezgulikka oshno Karima hoji ona va uning farzandlari kabi hamyurtlarim borligidan suyundim.

Feruza RAZZOQOVA.