OILANING MOʻL DAROMAD MANBAI

Mamlakatimiz tabiiy iqlim sharoitida 300 kundan ortiq quyoshli kunlarning mavjudligi hududimiz dehqonlari uchun oddiy konstruktsiyali issiqxonalarda ham tabiiy sharoitda turli koʻkatlar, ismaloq va ertagi ekinlar koʻchatlarini yetishtirish imkonini beradi.

Tumanimizda plyonka bilan yopilgan issiqxonada isitish vositalari oʻrnatmasdan, koʻklamda ertagi sabzavotlar koʻchatlari bilan dehqonlarimizni taʼminlab, yurtdoshlarimiz dasturxoni toʻkinligiga munosib hissa qoʻshayotganlar talaygina.
Qilichboy ovulida istiqomat qiluvchi mohir tomorqachi Qoʻchqorboy Nurimov shularning biri. U oʻz tomorqasiga oʻrnatgan qoʻlbola 4 sotixlik issiqxonasida qish boʻyi turli koʻkatlar, barra piyoz, ismaloq yetishtirib, bozorga sotadi. Erta koʻklamda esa issiqxonaning piyoz, ismaloqdan boʻshagan yerlarida ertagi ekinlar koʻchati yetishtiradi. Uy sharoitida ekkan bodring, pomidor, baqlajon, bulgʻor qalampiri kabi roʻzgʻor uchun kerakli ekinlar urugʻlari unib chiqqach, hozirgi kunda yashiklarga koʻchirib oʻtqazib, issiqxonasida parvarish qilmoqda.

Issiqxonaga kirgan kishi quyosh nuridan bahra olib, durkun rivojlanayotgan koʻchatlarning xuddi yoz pishiqchiligining hidini taratayotganiga guvoh boʻladi, koʻzi quvonadi.

– Bularning bari mehnat tufayli. Oila aʼzolarimiz bilan bekor oʻtirmay, necha yillardan beri turli koʻkatlar, ismaloq, ertagi ekinlar koʻchati yetishtiramiz, kelgusida zamonaviy issiqxona qurib, faoliyatimizni kengaytirish niyatimiz bor, – deydi Qoʻchqorboy Nurimov.

Uning amalga oshirayotgan ishlari bilan tanishgan odam agar koʻngilda niyat boʻlsa, oilada ham daromad manbalarini yaratish mumkin ekanligiga iqror boʻladi.

Asli mirishkor dehqonlar yurti hisoblanmish Qilichboyda Qoʻchqorboy Nurimov kabi dehqonchilikdan moʻl daromad olib, oilasi farovonligini taʼminlayotganlar safi ortib bormoqda.

Oygul RAJABOVA.
Suratda: Qilichboy ovul fuqarolar yigʻini raisi Bahrom Qodirov (chapda)

va tomorqachi Qoʻchqorboy Nurimovlar ekinlarni koʻzdan kechirmoqda.
Mahmudjon ShOMURODOV
olgan surat.