DAVLAT BYuDJETIDA FIRIB IShLATILGANI MAʼLUM BOʻLDI

Oʻzbekiston milliy axborot agentligi Davlatimiz rahbari tanqid qilgan Ella Ostrogojskayaning oʻz lavozimida qilgan firiblari haqida rasmiy maʼlumotlarga tayangan xolda maʼlumot berdi.

E.Ostrogojskaya koʻp yillar Moliya vazirligining Davlat byudjeti bosh boshqarmasining boshligʻi lavozimida ishlagan. Faoliyati davomida respublika iqtisodiyotiga va davlat byudjetiga katta zarar yetkazgan. Oʻzini xon, koʻlankasini maydon, deb hisoblagan bu xonim byudjet profitsiti koʻrsatkichlarini soxtalashtirish, bu orqali esa soxta obroʻ-eʼtibor qozonishga harakat qilgan.

Har yili hisobot yilining 15-dekabridan boshlab byudjet tashkilotlari boʻyicha barcha turdagi harajatlarni, shu jumladan oziq-ovqat, dori-darmon va boshqa zaruriy toʻlovlarni sunʼiy toʻxtatib qoʻygan. Sobiq vazir bilan til biriktirib Davlat rahbariga yolgʻon hisobot berishni odatiy holga aylantirgan.

Oqibatda hududlarning rejadan oshirib bajargan daromadlari respublika byudjetiga majburan olib qoʻyilgan. Ularning ustidan hukm oʻtkazib, bosh egib kelmaguncha erkin mablagʻlar qoldigʻi ularning ixtiyoriga berilmagan.

Vaziyat shungacha borganki, E.Ostrogojskaya sobiq vazir va Xodimlar boshqarmasining sobiq boshligʻi bilan til biriktirib, vazir oʻrinbosarlariga ham tazyiq oʻtkaza boshlagan. Oʻziga yoqmaganlarning lavozimini pasaytirgan yoki ularni ishdan boʻshatib, qutilib qoʻyaqolgan.

Birgina misol: hududlarning moliyaviy haq-huquqlarini himoya qilgan vazir oʻrinbosarlaridan birini dastlab, Jamgʻarmaga, keyinchalik eng quyi boʻgʻinga ishga yuborgan.

Bugungi kunda haqiqat qaror topib, Prezidentimiz Shavkat Mirziyoyev tomonidan mazkur shaxs munosib lavozimga tayinlandi.

Davlat byudjeti loyihasini tayyorlashda xalqimizning eng zarur ehtiyojlari umuman hisobga olinmagan.

Shu oʻrinda bir fakt: 2016-yilda Davlat byudjetidan Tez tibbiy yordamning bir chaqiruvi uchun bor-yoʻgʻi 483 soʻm koʻzda tutilgan. Respublika boʻyicha jami dori-darmon va tibbiyot vositalariga 229 milliard soʻm mablagʻ ajratilgan. Bu raqamlarni taqqoslash uchun 2018-yil Davlat byudjeti parametrlarida Tez tibbiy yordamning bir chaqiruvi uchun 5 000 soʻm yoki jami dori-darmon va tibbiyot vositalariga 915 milliard soʻm (4 baravarga koʻp) rejalashtirilganligini koʻrsatib oʻtish mumkin. Endi tasavvur qiling: Tez tibbiy yordamning bir chaqiruvi uchun 483 soʻm belgilagan bu «jonkuyalar» nahotki ketadigan xarajatlarni hisobga olmagan boʻlsa?

Bitta shprits yoki bint ham bundan qimmat-ku?

Texnika xarajatlari, shifokorning bir kunlik mehnatini kim qoplaydi?

Aslida Tez tibbiy yordamga chaqirilgan shifokorning koʻzingizga qarab turishiga, jamiyatimizda korruptsiyaga yoʻl ochgan shaxslar shular emasmikan?!