QOʻLI YeNGIL HAMShIRA

"Toʻlqin” ovulida tugʻilib oʻsgan Gulbarchin Kamolova 11-sonli maktabda oʻqib yurgan kezlaridanoq hamshira boʻlishni, betob boʻlgan odamlarning dardiga darmon boʻlishni orzu qilardi.

Shu niyatda maktabni tugatgach, 1-sonli Nukus tibbiyot kollejiga oʻqishga kirdi va 2015-yilda muvaffaqiyatli tamomlab, tuman Tibbiyot birlashmasining reabilitatsiya boʻlimiga navbatchi hamshira boʻlib ishga joylashdi.

Oʻz sohasiga mehr qoʻygan Gulbarchinning  masʼuliyatni his qilgan holda xizmat vazifasini sidqidildan ado etishi, barcha bemorlarga birday xushmuomalasi darrov koʻzga tashlandi.

U oʻz ustida ishlashi, tinmay oʻqib-oʻrganishi natijasida joriy yil koʻklamida tuman Tibbiyot birlashmasi hamkor tashkilotlar bilan birga tashkillashtirgan "Yil hamshirasi – 2017”koʻrik-tanlovida gʻoliblikni qoʻlga kiritdi.

Gulbarchin yosh boʻlishiga qaramay, ayni kunda tuman Tibbiyot birlashmasining reabilitatsiya boʻlimi katta hamshirasi.

– Qisqa fursat ichida qanday qilib bunchalik yutuqlarga erishdingiz? – qiziqib soʻradim undan.

– Hamshira bemorni oʻz muolajalaridan sogʻayib ketishiga ishontira olishi kerak. Bemor oldida ikkilanmay, esankiramay, dadil ishlagan hamshira koʻpchilikning ishonchini qozonadi. Buning uchun kasbni puxta egallash, tinmay oʻqib, oʻrganib borish talab etiladi.

1-sonli Nukus tibbiyot kollejida yaxshi oʻqiganim, turli tanlovlarda qatnashib, kasbimni chuqur egallashga intilganim mehnat faoliyatimda yutuqlarga erishishimga  yordam berayapti, – deydi mamnuniyat bilan Gulbarchin.

U mehnat qilayotgan boʻlimda davolanayotgan bemorlar Gulbarchinni "qoʻli yengil hamshira”, – deya atashadi. Bu uning jonkuyarlik bilan qilayotgan mehnatlarining munosib bahosidir.

Oygul RAJABOVA.

Suratda: iqtidorli hamshira Gulbarchin Kamolova.