Amudaryolik hamshira “Oʻzbekiston Respublikasi Sogʻliqni saqlash aʼlochisi” koʻkrak nishoni bilan taqdirlandi

“Yilning eng yaxshi oʻrta tibbiyot va farmatsevtika xodimi” tanlovi gʻoliblarini taqdirlash marosimi boʻlib oʻtdi. Unda fidokorona mehnati, kasbiy mahorat va ijtimoiy faolligi bilan ajralib turgan tibbiyot xodimlari alohida eʼtirof etildi. Mazkur tadbirda Amudaryo tumani tibbiyot birlashmasi bosh hamshirasi Luiza Yangiboyeva “Oʻzbekiston Respublikasi Sogʻliqni saqlash aʼlochisi” koʻkrak nishoni bilan taqdirlandi.

20-may kuni Qoraqalpogʻiston Respublikasi Sogʻliqni saqlash vazirligi majlislar zalida sohaga sidqidildan xizmat qilayotgan, kasbiy faoliyati bilan namuna boʻlayotgan tibbiyot xodimlarini taqdirlash marosimi boʻlib oʻtdi. Tadbirda Qoraqalpogʻiston Respublikasi sogʻliqni saqlash vaziri M. Kurbanov, sogʻliqni saqlash xodimlari kasaba uyushmasi Respublika Kengashi raisi L.Baybosinova, Oʻzbekiston Hamshiralar Assotsiatsiyasining Qoraqalpogʻiston boʻlimi boshligʻi R.Mishenova va Respublika davolash-profilaktika muassasalari rahbarlari hamda sohaning ilgʻor va fidoyi vakillari ishtirok etdi.

Marosimda Amudaryo tumani tibbiyot birlashmasi bosh hamshirasi Luiza Yangiboyevaga “Oʻzbekiston Respublikasi Sogʻliqni saqlash aʼlochisi” koʻkrak nishoni hamda kasaba uyushmasining esdalik sovgʻalari tantanali tarzda topshirildi. Bu eʼtirof – uning koʻp yillik samarali mehnati, masʼuliyatli munosabati va tibbiy xizmat sifati yuksalishiga qoʻshgan shaxsiy hissasiga berilgan yuksak baho hisoblanadi.

Shuni alohida qayd etish joizki, Luiza Yangiboyeva joriy yilda “Yilning eng yaxshi oʻrta tibbiyot va farmatsevtika xodimi” tanlovining mamlakat bosqichida munosib ishtirok etib, “Yilning eng yaxshi sogʻlom turmush tarzi targʻibotchisi” nominatsiyasida I oʻrinni qoʻlga kiritgan edi.

Sogʻliqni saqlash tizimida inson hayoti uchun masʼuliyatni zimmasiga olgan, oʻz kasbiga sadoqat bilan yondashadigan, yuksak malakaga ega mutaxassislarga boʻlgan ehtiyoj tobora ortib bormoqda. Tibbiyot fidoyilarini ragʻbatlantirish, ularning mehnatini munosib qadrlash maqsadida anʼanaga aylangan “Yilning eng yaxshi oʻrta tibbiyot va farmatsevtika xodimi” tanlovi ham aynan shu maqsadga xizmat qilmoqda.

Koʻrik-tanlov doirasida qatnashchilar tibbiy hujjatlarni yuritish, shoshilinch tibbiy yordam koʻrsatish, kasallik alomatlari va profilaktikasi, yuqumli kasalliklarga qarshi choralar, inson anatomiyasi va fiziologiyasi, hamshiralik ishi meʼyor va standartlari kabi yoʻnalishlar boʻyicha bilim va koʻnikmalarini namoyon etdilar.

Bundan tashqari, ular sogʻlom turmush tarzini targʻib etish boʻyicha yangicha yondashuvlarni taqdim etish, hozirjavoblik, muloqot madaniyati kabi mezonlar asosida ham baholandi. Tanlov gʻoliblari aynan shu kabi kompleks yondashuvlar asosida saralab olindi.

Aytish joizki, soha vakillarini ragʻbatlantirishga qaratilgan bunday mukofotlar faqatgina bir shaxsning faoliyatiga berilgan baho emas, balki butun jamoaning, butun tizimning fidoyilik asosidagi mehnatiga nisbatan bildirilayotgan munosib eʼtirofdir. Luiza Yangiboyeva kabi salohiyatli, bilimdon va sadoqatli hamshiralarning aholi salomatligini saqlashda tutgan oʻrni beqiyosdir.

Shohzod Qurbonboyev.