DILGA KOʻChAR QOʻShIQLAR

Aytilmoqchi boʻlgan tuygʻular, aytilmoqchi boʻlgan dil soʻzlari, aytilmoqchi boʻlgan iqrorlar Xudoybergan Jumamurodovning qalamiga mansub "Men aytmoqchi boʻlgan qoʻshiqlar” nomli sheʼrlar toʻplamidan joy olgan. Joʻshqinlik va samimiyat ufurib turgan satrlarda shoirning koʻngil kechinmalari, hayratlari, shukronalari ifodalangan.

Misralarida dil tuygʻularini qoʻshiq qilib kuylagan ijodkor ularni nazm ahli bilan baham koʻrishni istadi. Soʻz tizginini oʻziga boʻysundirib, tafakkurini jonlantirdi. Tuygʻularidan guldasta yasab, dilda borini toʻkib soldi:

Dilda borin kuylamoq istab,

Sheʼr yozishga boʻldim muyassar.

Ilhom kelib tebratgach dilni,

Sheʼriyatga chogʻladim yoʻlni,

Ufqlarga choʻzgandek qoʻlni,

Sheʼr yozishga boʻldim muyassar.

Hayot gulbogʻlarida Vatanni buyuk deb umr kechirayotgan ijodkor Xudoybergan Jumamurodov tumanimizda yashab, ijod qilib kelmoqda. Uning sheʼrlari 1967-yildan boshlab, tuman gazetasida chop etila boshladi. Ijodga, adabiyotga boʻlgan muhabbati uni  1968-yilda Nukus davlat pedagogika institutining filologiya fakultetiga boshladi. Tahsil davri tugaganidan soʻng, Xudoybergan Jumamurodov pedagoglik faoliyati bilan shugʻullandi. Umrining  qirq yilini yosh avlodga oʻzbek tili va adabiyoti fanidan saboq berishga bagʻishlagan  bu inson hozir nafaqada.

Ijodkor ellik yildan buyon koʻngil daftarini sheʼriyat ahliga ochib, ijod zavqini surib kelmoqda. Uning ijod namunalarida samimiylikni, onaga, oilaga, farzandga, hayotga muhabbatni koʻrasiz. U hatto, oʻz sheʼrlari  bilan kimlargadir darddosh, kimlargadir taskin, umid va ishonch bagʻishlashni istayotgandek tuyuladi. Bunday hamdardlik, munosabat uning har bir satrida aks etadi.

Dilsayyor, hayot murakkab,

Yashash oʻzi katta bir maktab.

Sheʼrlar yozsam xalqimga atab,

Yaxshi armon-niyatlar bordir.

Har bir otgan tongni hayotdan nishon deb bilgan ijodkor Xudoybergan Jumamurodov uning goʻzalligidan ilhomlanadi. Mana shu ilhomlarining mahsullarini jamlab, sheʼriyat shaydolari uchun "Men aytmoqchi boʻlgan qoʻshiqlar” kitobini yaratdi. Aminmizki, shoirning ilk kitobidan oʻrin olgan sheʼrlar qoʻshiq boʻlib koʻngillarni yayratadi va dillarga koʻchadi.

Ozoda XUDOYBERGANOVA.