MAMLAKATIMIZDA INVESTITsION FAOLIYaT ERKINLIGINING HUQUQIY KAFOLATLARI
Oʻzbekiston Respublikasi oʻz mustaqilligini qoʻlga kiritishi natijasida juda koʻp sohalarda yutuqlarga erishdi. Buni biz birgina tashqi siyosat misolida tahlil qiladigan boʻlsak, aytish mumkinki, Oʻzbekiston Respublikasi dunyo davlatlari orasida oʻzining mustahkam oʻrnini egalladi hamda buni dunyoning barcha davlatlari tan oldi.
Oʻzbekiston hukumati iqtisodiy islohotlarni amalga oshirish jarayonida mamlakatimizning jahon miqyosidagi oʻrnini taʼminlashda bir qancha xalqaro tashkilotlar, jumladan, Yevropa tiklanish va taraqqiyot banki, Xalqaro valyuta fondi, Jahon banki bilan oʻzaro yaqindan hamkorlik qilib kelmoqda. Ushbu hamkorliklar natijasi sifatida, Oʻzbekistonga xorijiy investitsiyalarning kirib kelishi koʻpaydi. Natijada rivojlanishi sust borayotgan korxonalar faoliyati qayta tiklandi hamda zamonaviy ishlab chiqarish tizimiga oʻtdi. Bozorlarimizda sifatli mahsulotlarning soni ortdi, aholining ish bilan taʼminlanish darajasi oʻsdi. Albatta, bu borada davlatimiz tomonidan ushbu faoliyatning huquqiy asoslari yaratilayotganligi eng muhim xususiyatlardan hisoblanadi.
Oʻzbekistonda bevosita investorlarning huquqlarini himoya qilish borasida bir qancha davlat organlari – jumladan, Tashqi iqtisodiy aloqalar, investitsiyalar va savdo vazirligi, Oʻzbekiston Respublikasi Adliya Vazirligi huzuridagi xorijiy investorlar hamda xorijiy investorlar ishtirokidagi korxonalarni huquqiy himoya qilish boshqarmasi, "Oʻzbekinvest” milliy sugʻurta kompaniyasi, Vazirlar Mahkamasi huzuridagi BMT (YuNIDO) bilan birgalikdagi texnikaviy yordam loyihasi doirasida investitsiyalarga koʻmaklashish xizmati, Davlat mulk qoʻmitasi huzuridagi koʻchmas mulk va xorijiy investitsiyalar agentligi investorlar huquqlarini kafolatli himoya qiladi.
Oʻzbekistonning tashqi iqtisodiyot sohasidagi yana bir muhim qadami bu - Navoiy viloyatida erkin iqtisodiy zona tashkil qilinishidir. Bu borada 1996-yil 25-aprelda "Erkin iqtisodiy zonalar toʻgʻrisida”gi Oʻzbekiston Respublikasi Qonuni qabul qilingan edi. Oʻzbekiston Respublikasi Prezidentining "Navoiy viloyatida erkin industrial – iqtisodiy zona tashkil etish toʻgʻrisida”gi (PF – 4059) Farmoni asosida Vazirlar Mahkamasi tomonidan "Navoiy” erkin industrial – iqtisodiy zonasi boʻyicha Nizom ishlab chiqildi.
Bugungi kunda Navoiy viloyatining Navoiy va Zarafshon shaharlarida chet el investitsiyalari ishtirokidagi 40 ta korxona oʻz faoliyatini olib bormoqda. Investitsiya kiritgan davlatlar qatorida AQSh, Xitoy, Rossiya, Ukraina davlatlari salmoqli oʻrinlarni egallaydi. Oʻzbekiston Respublikasi Prezidenti Sh. Mirziyoyev 2017-yil 3-mayda PF-5032-sonli «Nukus-farm», «Zomin-farm», «Kosonsoy-farm», «Sirdaryo-farm», «Boysun-farm», «Boʻstonliq-farm» va «Parkent-farm» erkin iqtisodiy zonalarini tashkil etish toʻgʻrisida»gi Farmonni imzoladi.
Erkin iqtisodiy zonalar samarali faoliyat koʻrsatishi uchun Prezidentimiz 2017-yil 7-avgustda "Erkin iqtisodiy zonalar samarali faoliyat koʻrsatishi uchun vazirliklar, idoralar va joylardagi davlat hokimiyati organlarini muvofiqlashtirishni kuchaytirish va ularning masʼuliyatini oshirish chora-tadbirlari toʻgʻrisida”gi yana bir muhim hujjatni imzoladi.
Xulosa oʻrnida shuni aytish mumkinki, bugungi kunda Oʻzbekiston kundan-kunga dunyo bozoriga chuqur kirib bormoqda. Bu – dunyo bozoriga sifatli va arzon narxda hamda qulay tarzda mahsulotlarni yetkazib berayotganimiz, tuzilgan shartnomalarning oʻz vaqtida bajarilishi, investitsiyaga qulay muhit yaratilganligining yaqqol dalilidir. Bir soʻz bilan aytganda, bularning barchasi mustaqillik bergan katta imkoniyatlardir.
Yu.S.Yerjanov, Qoraqalpogʻiston Respublikasi Adliya vazirligining Shartnomaviy-huquqiy ishlarni nazorat qilish boʻlimi katta maslahatchisi.
(Foto - http://uzlidep.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
