МАМЛАКАТИМИЗДА ИНВЕСТИЦИОН ФАОЛИЯТ ЭРКИНЛИГИНИНГ ҲУҚУҚИЙ КАФОЛАТЛАРИ
Ўзбекистон Республикаси ўз мустақиллигини қўлга киритиши натижасида жуда кўп соҳаларда ютуқларга эришди. Буни биз биргина ташқи сиёсат мисолида таҳлил қиладиган бўлсак, айтиш мумкинки, Ўзбекистон Республикаси дунё давлатлари орасида ўзининг мустаҳкам ўрнини эгаллади ҳамда буни дунёнинг барча давлатлари тан олди.
Ўзбекистон ҳукумати иқтисодий ислоҳотларни амалга ошириш жараёнида мамлакатимизнинг жаҳон миқёсидаги ўрнини таъминлашда бир қанча халқаро ташкилотлар, жумладан, Европа тикланиш ва тараққиёт банки, Халқаро валюта фонди, Жаҳон банки билан ўзаро яқиндан ҳамкорлик қилиб келмоқда. Ушбу ҳамкорликлар натижаси сифатида, Ўзбекистонга хорижий инвестицияларнинг кириб келиши кўпайди. Натижада ривожланиши суст бораётган корхоналар фаолияти қайта тикланди ҳамда замонавий ишлаб чиқариш тизимига ўтди. Бозорларимизда сифатли маҳсулотларнинг сони ортди, аҳолининг иш билан таъминланиш даражаси ўсди. Албатта, бу борада давлатимиз томонидан ушбу фаолиятнинг ҳуқуқий асослари яратилаётганлиги энг муҳим хусусиятлардан ҳисобланади.
Ўзбекистонда бевосита инвесторларнинг ҳуқуқларини ҳимоя қилиш борасида бир қанча давлат органлари – жумладан, Ташқи иқтисодий алоқалар, инвестициялар ва савдо вазирлиги, Ўзбекистон Республикаси Адлия Вазирлиги ҳузуридаги хорижий инвесторлар ҳамда хорижий инвесторлар иштирокидаги корхоналарни ҳуқуқий ҳимоя қилиш бошқармаси, "Ўзбекинвест” миллий суғурта компанияси, Вазирлар Маҳкамаси ҳузуридаги БМТ (ЮНИДО) билан биргаликдаги техникавий ёрдам лойиҳаси доирасида инвестицияларга кўмаклашиш хизмати, Давлат мулк қўмитаси ҳузуридаги кўчмас мулк ва хорижий инвестициялар агентлиги инвесторлар ҳуқуқларини кафолатли ҳимоя қилади.
Ўзбекистоннинг ташқи иқтисодиёт соҳасидаги яна бир муҳим қадами бу - Навоий вилоятида эркин иқтисодий зона ташкил қилинишидир. Бу борада 1996 йил 25 апрелда "Эркин иқтисодий зоналар тўғрисида”ги Ўзбекистон Республикаси Қонуни қабул қилинган эди. Ўзбекистон Республикаси Президентининг "Навоий вилоятида эркин индустриал – иқтисодий зона ташкил этиш тўғрисида”ги (ПФ – 4059) Фармони асосида Вазирлар Маҳкамаси томонидан "Навоий” эркин индустриал – иқтисодий зонаси бўйича Низом ишлаб чиқилди.
Бугунги кунда Навоий вилоятининг Навоий ва Зарафшон шаҳарларида чет эл инвестициялари иштирокидаги 40 та корхона ўз фаолиятини олиб бормоқда. Инвестиция киритган давлатлар қаторида АҚШ, Хитой, Россия, Украина давлатлари салмоқли ўринларни эгаллайди. Ўзбекистон Республикаси Президенти Ш. Мирзиёев 2017 йил 3 майда ПФ-5032-сонли «Нукус-фарм», «Зомин-фарм», «Косонсой-фарм», «Сирдарё-фарм», «Бойсун-фарм», «Бўстонлиқ-фарм» ва «Паркент-фарм» эркин иқтисодий зоналарини ташкил этиш тўғрисида»ги Фармонни имзолади.
Эркин иқтисодий зоналар самарали фаолият кўрсатиши учун Президентимиз 2017 йил 7 августда "Эркин иқтисодий зоналар самарали фаолият кўрсатиши учун вазирликлар, идоралар ва жойлардаги давлат ҳокимияти органларини мувофиқлаштиришни кучайтириш ва уларнинг масъулиятини ошириш чора-тадбирлари тўғрисида”ги яна бир муҳим ҳужжатни имзолади.
Хулоса ўрнида шуни айтиш мумкинки, бугунги кунда Ўзбекистон кундан-кунга дунё бозорига чуқур кириб бормоқда. Бу – дунё бозорига сифатли ва арзон нархда ҳамда қулай тарзда маҳсулотларни етказиб бераётганимиз, тузилган шартномаларнинг ўз вақтида бажарилиши, инвестицияга қулай муҳит яратилганлигининг яққол далилидир. Бир сўз билан айтганда, буларнинг барчаси мустақиллик берган катта имкониятлардир.
Ю.С.Ержанов, Қорақалпоғистон Республикаси Адлия вазирлигининг Шартномавий-ҳуқуқий ишларни назорат қилиш бўлими катта маслаҳатчиси.
(Фото - http://uzlidep.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
