FILIPPINDAN AMUDARYoGA BRONZA MEDAL BILAN

  Yaqinda Filippin davlatida oʻsmirlar oʻrtasida boks boʻyicha boʻlib oʻtgan Osiyo chempionatida  tumanimizdagi Bolalar-oʻsmirlar sport maktabining "Toʻlqin” ovulida faoliyat yuritayotgan boks guruhi tarbiyalanuvchisi Sherzod Qodirboyev ham qatnashib, 3 ta oltin, 3 ta kumush, 4 ta bronza medalini yengib olib, umumjamoa hisobida birinchi oʻrinni egallagan oʻzbekistonliklar gʻalabasiga munosib hissa qoʻshdi.

Sherzod Qodirboyev 60 kilogramm vazn toifasida kurash olib borib, faxrli uchinchi oʻrinni egalladi va bronza medal bilan taqdirlandi.

Nukus olimpiya zahiralari kollejining birinchi bosqichini endigina tugatgan yosh bokschi bu gʻalabasi bilan oʻz yoʻnalishi boʻyicha oliygohga imtihonsiz kirish imtiyoziga ham ega boʻldi.

Oddiy qishloq oʻgʻlonining erishgan bu natijasi nafaqat uning yaqinlari, balki butun tumanimiz xalqi uchun ham faxrdir.

– Shu kungacha oʻzim shugʻullanayotgan guruh aʼzolari ichidan Qoraqalpogʻiston, Oʻzbekiston chempionlari, nufuzli xalqaro musobaqalar sovrindorlari yetishib chiqqan edi. Sherzod ilk bor Osiyo chempionatida qatnashib, bronza medaliga sazovor boʻlgan shogirdim, – deydi uning murabbiyi Azimjon Muxtorov quvonch bilan.

Hamyurtlarimiz qayd etgan quvonarli natijalarni quyidagi saytda toʻliq oʻqishingiz mumkin.