TAShRIFINGDAN AYLANAY, NAVROʻZ!

18-mart kuni tongda quyosh Qoratogʻ choʻqqilari uzra qip-qizil shuʼlalarini sochib, yerdan ohista bosh koʻtardi. Ertalabdanoq tomoshaga oshiqqan bolajonlarni, keksa-yu yoshni iliq  nurlari ila siyladi.

- Eh-he-hey! Hamma Navroʻz  bayramiga! Bu chorlov na-faqat koʻhna Mangʻitda, balki tumanimizning olis-olis qishloqlarida ham aks-sado berdi. Shundandir balki "Mangʻit” bolalar sport majmuasi ertalabdanoq odamlar bilan gavjum boʻldi.

Bayramlarga alohida tadorik  koʻrish xalqimizning qon-qoniga singib ketgan odatlaridan. Kun va tun tengligi, Navroʻzni ham tumanimiz mehnatkashlari, butun yoshu qarisi qizgʻin tayyorgarliklar bilan qarshi olishdi. Oʻyingoh kiraverishi oldidagi ulkan sahnda  tumanimizda faoliyat yuritayotgan ovul fuqarolar yigʻinlari, fermer xoʻjaliklariga xizmat koʻrsatuvchi muqobil mashina-traktor parklari, Mangʻit shahridagi umumtaʼlim maktablari jamoalari alohida-alohida cherdak qurishib, bahoriy dasturxon bezashgan.

Ayniqsa, fermerlarning oʻtgan yilgi yetishtirgan mahsulotlari, mevalar, poliz ekinlari va sabzavotlari koʻrgazmasining tomoshabinlari koʻp boʻldi. Dehqonchilik – zahmat, degani. Biroq oʻz halol mehnating samarasidan elga rizq ulashsang, oilangni ham, yurtdoshlaringni ham toʻydirsang, bu mehnat sururlidir.

Ha, dehqonning yil boʻyi qilgan mehnati charchogʻi qoʻliga  ekinining ilk hosilini olgan chogʻlaridayoq unut boʻlib ketadi. Bugungiday sayllarda, tomoshalarda xalqimizning eʼtibori, eʼtirofi kuchiga kuch  qoʻshadi.

Tuman hokimi, hokim oʻrinbosarlari, korxona, tashkilotlar rahbarlari, respublika rahbariyatidan  bayram tomoshasiga tashrif buyurgan vakillarning koʻrgazmani tomosha qilgani, mehnatlariga yuksak baho bergani ularning koʻnglini togʻday koʻtardi. Yanada ezgu ishlarga chorladi.

Koʻrgazmani qishloq xoʻjalik mahsulotlarininggina emas, Navroʻz dasturxonidan tashqari xalqimizning urf-odatlari, anʼanalari namoyishi deb atash ham mumkin edi. Qoʻbiz, surnay chalib, oʻzlari yasagan turli buyum, asboblarni koʻz-koʻz qilayotgan yurtdoshlarimizning  mehnati ham koʻpchilikning eʼtiborini tortdi.

Bayramona bezatilgan Mangʻit bolalar sport majmuasi tashrif buyuruvchilarga bahoriy zavq bagʻishladi. Koʻklamga, yashillikka, gullarga intiq dillar muddosi ushaladi goʻyo. Oppoq-oppoq oʻrik gullari goʻyo oq kapalakday, uchib ketmoqqa shaylanganday. Navroʻzni, koʻklamni madh etuvchi musiqa, raqslar ijro etilmoqda.

Minbarga koʻtarilgan tumanimiz hokimi, Qoraqalpogʻiston Respublikasi Joʻqorgʻi Kengesi deputati, iqtisod fanlari nomzodi Rajabboy Yoʻldoshev tomoshagohga yigʻilganlarni, ular orqali tumanimizning butun xalqini Navroʻz bayrami bilan qizgʻin qutladi. Xalqimizning asrlar osha avloddan-avlodga oʻtib kelayotgan asl milliy bayrami – Navroʻzi olam istiqlol yillarida ayniqsa mazmunan boyib, tobora jozibador boʻlib borayotganini alohida taʼkidladi. Bunyodkor va mehnatkash xalqimizning "Obod turmush yili”dagi har bir kuni bayramdek oʻtishini tiladi.

Tomoshagohda tun zulmati chekinib, tong otishini ifodalovchi kuy yangradi. Sahnaga oppoq liboslardagi yosh raqqosalar goʻyo uchib kelishayapti. Bu manzara xuddi Navroʻz oqcha qori yogʻayotganga mengzaydi. Hademay sahnani ramziy qor qopladi. Bir nafaslik sukutdan soʻng goʻyo koʻklam boshlandi: ramziy "qor” ichidan bahor chechaklari unib chiqdi. Bahor valsi yangradi, ariqda jildirab oqayotgan suv sasi qushlar sayrogʻiga qoʻshilib ketdi. Jarchilar ovozi hammani tomoshagohga chorlaydi.

Bor-ho, kel-ho,

Navroʻzim-ho,

Rizq-roʻzim, ho.

Tezda yetib kel,

Oʻynagani kel,

Quvnagani kel,

Kuylagani kel,

Rizq-roʻzimga kel,,

Tezda yetib kel,

Boshlansin zoʻr tomosha,

Ho-ho-ho!

Sahna uzra saf tortgan bayram tomoshasi ishtirokchilari qoʻllaridagi rang-barang sharlarni osmonga uchirdi. Son-sanoqsiz rangdagi, turli shakldagi sharlar bahor epkinida samolarga parvoz qildi. Yuraklar entikdi. Maydon uzra shoʻx-shodon qiyqiriqlar avjiga chiqdi.

Sahnada "Uchqun” ashula  va raqs xalq ansambli qatnashchilarining qoʻshigʻi yangradi.

Bahorning fayzi boʻlakcha. Yerga ketmon urib, ekin tashvishiga tushgan Dehqonbobo, bugʻdoy maysasini kelida tuyib, sumalak qaynatayotgan momolar, biri velosiped haydab, biri varrak uchirib yayrab oʻynayotgan bolajonlar ham shunchalar koʻngilga yaqin, shunchalar aziz. Sahnada ijro etilayotgan dorboz oʻyiniga qoʻshiq, raqslarga juda-juda hamohang. 83-sonli, 4-sonli, 1-sonli, 5-sonli bolalar bogʻchalari tarbiyalanuvchilarining ijro etgan qoʻshiq, raqslari katta-yu kichikka zavq bagʻishladi. Umrboqiy qadriyatlarimiz timsoli Navroʻz bayrami ruhini koʻngillarga yanada teranroq joyladi. Bolalarga xos xalq oʻyinlari ijrosi qarsaklar bilan olqishlandi.

Oʻzbekiston chamanzor yurt, bagʻri keng diyor,

Sayyoralar oshuftadir samolariga.

Har goʻshasin oʻz sanʼati, taronasi bor,

Dunyolar ham joʻr boʻladi navolariga.

Ha, darhaqiqat shunday. Bayram tomoshasidagi har bir kuy, qoʻshiq, laparlar, yallalar, aytishuvlar buning yaqqol isboti.

Navroʻz bayrami tomoshasiga yigʻilganlarning "Ofarin” folklor-etnografik jamoasi aʼzolarining askiyalari, qiz-yigitlar aytishuvidan, qoʻshiq-raqslaridan, Navroʻz bayramiga bogʻliq qadimiy odatlarimizning ijrosidan zavqlanmagani qolmadi. Tomoshani qizdirgan "Choʻgirma raqsi”, "Chagʻallo” kabi milliy oʻyinlarimizni ijro etgan yigitlarning har bir harakatini tomoshabinlar qarsaklar bilan olqishlab turdi.

Tuman madaniyat va sport ishlari boʻlimi tomonidan Navroʻz bayramiga bagʻishlab tayyorlangan ulkan teatrlashtirilgan bayram tomoshasi namoyishidan keyin davrada tumanimizning iqtidorli polvonlari bel olishdi. Qoʻchqor, xoʻroz urushtirish kabi koʻngilochar tomoshalar anchagacha davom etdi.

Sharqona yangi yil tantanasi dillarga surur, koʻzlarga nur bagʻishladi, vujudlar tozardi. Koʻngillarda yosharish, yashnatish, yaratish ishtiyoqi joʻsh urdi. Bular bari sen tufayli, Navroʻz! Elimga xush kelding, qadimiy bayram! Tashrifingdan oʻrgilay, qadaming elimga qutlugʻ kelsin, Navroʻz!

Oygul RAJABOVA,

"Taraqqiyot koʻzgusi" gazetasi   muxbiri.