"Oʻzbeknavo" bir nechta xonandalarni qoʻshiq aytish huquqidan mahrum qildi

Dilfuza Rahimova, Otabek Mutalxoʻjayev, Dilshod Rahmonov, "Ummon” va "Mango” guruhlari xonandalarining litsenziyalari amal qilish muddati tugatildi.

Bu haqda "Oʻzbeknavo" birlashmasi matbuot xizmati xabar bergan. Xabarda taʼkidlanishicha, milliy estrada sanʼatini rivojlantirish va muvofiqlashtirish Kengashining 2013-yil 23-mart kuni oʻtkazilgan "Oʻzbek estrada sanʼatining rivojlanish jarayonlari haqida”gi 2-son yigʻilishida hukumat tomonidan estrada sanʼati sohasida faoliyat yuritayotgan ijodkorlar uchun  shart-sharoitlar yaratilgani qaramasdan, koʻpgina estrada xonandalari bunday imkoniyatlardan toʻgʻri foydalanish oʻrniga uni suiisteʼmol qilayotganligi tanqid qilinga.

 Bundan tashqari, yosh xonandalar ayniqsa, unvon olgan xonandalarda talabchanlik yoʻqolib, hotirjamlikka, oʻziboʻlarchilikka berilishayotgani, aksar xollarda xonandalarining repertuaridan oʻrin olgan qoʻshiqlar mazmunan sayozligi, badiiy jihatdan boʻshligi, musiqasi va ijro mahorati talab darajasida emasligi, xonandalar asosan toʻy-hashamlar bilan band boʻlib, yangi ijod namunalari yaratishga yetarli eʼtibor qaratmayotganligi, shuningdek, milliy-maʼnaviy qadriyatlarga, odob-ahloq meʼyorlariga va mentalitetga zid boʻlgan qoʻshiqlar yaratib, efirga uzatilayotganligi ham keskin qoralangan. Mazkur yigʻilishda berilgan vazifalarning ijrosi monitoring qilinganda bir qator xonandalar oʻz vaqtida yangi asarlar taqdim etganligi va aksincha, baʼzi xonandalar qaror ijrosini taʼminlamaganligi, bu orqali esa Litsenziya talablari va shartlarini buzganligi aniqlangan.

"Oʻzbeknavo"dan xabar berishlaricha, Oʻzbekiston Respublikasi Prezidentining 2013-yil 12 iyun "Oʻzbekiston Respublikasi davlat mustaqilligining yigirma ikki yillik bayramiga tayyorgarlik koʻrish va uni oʻtkazish toʻgʻrisida”gi PQ-1984-son Qarori mazmun-mohiyatini toʻliq anglab yetmay, bayram tantanalari uchun yangi qoʻshiq tayyorlash borasida jiddiy kamchilikka yoʻl qoʻygan bir qator estrada xonandalariga berilgan litsenziyaning amal qilishini tugatish hamda baʼzi xonandalarni ogohlantirish maqsadida "Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-24-moddalari hamda Oʻzbekiston Respublikasi Vazirlar Mahkamasining 2003-yil 11-noyabrdagi 498-son Qarorining 1-ilovasi 35-bandiga asoslanib, joriy yilning 18-iyun kuni Birlashmaning MR-11/1-son buyrugʻi qabul qilingan. 

Mazkur buyruqqa asosan: 

Oʻzbekistonda xizmat koʻrsatgan artist Dilfuza Rahimova, "Nihol” mukofoti sovrindori Otabek Mutalxoʻjayev, xonanda Dilshod Rahmonov, "Ummon” va "Mango” guruhlari xonandalarining litsenziyalari amal qilish muddati tugatildi. 

Oʻzbekistonda xizmat koʻrsatgan artistlar Izzatilla Ibragimov, Sobirjon Moʻminov, Alisher Turdiyev, Ravshan Komilov, Toir Qoʻziyev, "Nihol” mukofoti sovrindori Hulkar Abdullayeva va xonanda Farhod Saidov qattiq ogohlantirildi hamda ularga mavjud kamchiliklarni bartaraf etish uchun 1-iyulga qadar muddat berildi.

(Manba: http://darakchi.uz)