FIDOYI

(Lavha)

Hayot – tasodiflarga toʻla. Ish vaqti tugab, endigina ustki kiyimlarini almashtirib boʻlganida, boʻlim mudirining xonasiga deyarli yugurib kirib kelgan navbatchi hamshira:

- Olimboy aka, yangi bemorni olib kelishdi, ahvoli juda ogʻir,  – deya xabarladi.

Bunday xabarni eshitgan shifokor "kim u, qayerlik?” – deb surishtirib oʻtirmaydi. Ayniqsa, butun boshli shoshilinch tibbiy yordam boʻlimidagilar zudlik bilan bemorning ahvolini yaxshilash choralarini koʻrishayotgan paytda. Olimboy Shomurodov esa boʻlim mudiri, boshqalardan koʻra masʼuliyatni chuqurroq his qilishga odatlangan. U yelkasiga xalatini tashlagancha boʻlimning bemorlarni qabul qilish xonasiga oshiqdi. 5-6 yoshlardagi bola onasining qoʻlida hushsiz yotar, rangida qon yoʻq edi. Zudlik bilan bolani tekshiruvdan oʻtkazishdi. Bolalar jarrohi Shukurilla Ismoilov, terapevt Zulxumor Gaipova, bolalar reanimatologi Egambergan Xidirovlar  bilan birgalikda oʻtkazilgan tekshiruv natijalaridan soʻng bemor bolaning ovqatdan zaharlangani maʼlum boʻldi. Vujudi oʻtolov boʻlib yonayotgan bolakayning hayoti uchun kurash boshlandi. Oshqozon yuvilganida shu narsa maʼlum boʻldiki, hazm qilish organlari haddan tashqari zoʻriqib turgan bir paytda bolani ota-onasi oʻzlaricha "davolashgan”, turli xil tabletkalar ichirishgan. Natijada bolaning kichkina jussasi bu notoʻgʻri "davo usuli”ni koʻtara olmay, hushidan ketgan.

Shu kuni tuman tibbiyot birlashmasining shoshilinch tibbiy yordam boʻlimi shifokorlari ham, boʻlim mudiri Olimboy Shomurodov ham bir zum tin olishmadi. Tongda issigʻi tushib, oʻziga kelgan bolakay va bundan xursand boʻlgan ota-onaning quvonchini koʻrgan Olimboy Shomurodov horgʻinlik bilan oʻz  xonasiga kirganida devordagi soat uning yangi ish kuni boshlanganini koʻrsatib turardi.

Yangi ish kuni. Kimningdir dardiga darmon boʻlish, mushkulini oson qilish bilan boshlanadigan xayrli ish soatlari. 25-yildirki, Olimboy Shomurodovning hayoti insonlarga shirin hayot gashtini ato etish, salomatlik, oilalariga quvonch baxsh etishdek ezgu ish bilan egiz. 1991-yilda 1-Toshkent davlat tibbiyot oliygohini jarrohlik mutaxassisligi boʻyicha tugatib, oddiy jarroh-shifokor sifatida oʻz ish faoliyatini boshlagan Olimboy Shomurodov oʻz kasbiga boʻlgan cheksiz mehr-muhabbati va sadoqati tufayli el aro obroʻ-eʼtibor qozondi. Kasbdoshlari, ayniqsa, ustozlari, qolaversa, tuman tibbiyot birlashmasi rahbariyatining ishonch va hurmatiga sazovor boʻldi.

- Mamlakatimizda mustaqillik yillarida inson salomatligiga eʼtibor davlat siyosatining ustuvor yoʻnalishiga aylandi, - deydi Olimboy Shomurodov oʻzi rahbarlik qilayotgan shoshilinch tibbiy yordam boʻlimining bugungi  imkoniyatlari haqida gapirarkan. – Muhtaram Birinchi Prezidentimiz I.A.Karimovning 1998-yil 10-noyabrdagi "Oʻzbekiston Respublikasi Sogʻliqni saqlash tizimini isloh qilish davlat dasturi toʻgʻrisida”gi Farmoni ijrosini taʼminlash maqsadida TTB bosh shifokorining buyrugʻiga asosan shoshilinch tibbiy yordam boʻlimining tashkil etilishi tumanimiz xalqiga tez va sifatli tibbiy xizmat koʻrsatish imkoniyatini yaratdi.

Haqiqatan ham mazkur boʻlim tashkil etilgan 2000-yilda 15 ta oʻringa ega boʻlgan boʻlsa,  tibbiyot birlashmasi rahbariyatining qoʻllab-quvvatlashi tufayli oʻrinlar soni 2013-yilda 40 taga yetkazildi. Bundan ham muhimi, jarrohlik xonasi va muolaja xonalari zamonaviy tibbiy asbob-anjomlar bilan jizohlandi. Boʻlimning moddiy-texnika bazasi tubdan yangilanib, 17 turdagi eng zamonaviy davolash-diagnostika jihozlari olib kelib oʻrnatildi. Faqat 2015-yilning oʻzida bitta yangi EKT tibbiy apparati va jami qiymati 11 mln. 966 ming 400 soʻmlik qattiq jihozlar hamda 2 mln. 850 ming soʻmlik yumshoq jizohlar bilan jihozlangan boʻlimda nafaqat shifokorlar va bemorlar uchun, balki oʻz yaqinlarini koʻrgani kelganlar uchun ham koʻngildagiday qulayliklar yaratildi. Ogʻir ahvolda boʻlimga keltirilgan bemorlarning yaqinlari uchun yaratilgan qulay shart-sharoitlardan, shinam va ozoda maishiy  xonalardan bemorlar ham, ularning yaqinlari ham mamnun.

– Boʻlimimiz shifokorlarining 16 nafari oliy toifali, - deydi mamnuniyat bilan Olimboy Shomurodov. – Bu – jami xodimlarimizning 50 foizini tashkil etadi. Xodimlarimizning 4 nafari birinchi, bir nafari esa ikkinchi toifaga ega. Boʻlimda barcha shifokorlar navbati bilan oʻz malakalarini oshirib borishadi. Oʻrta tibbiyot xodimlari uchun birlashmamizda doimiy ravishda malaka oshirish oʻquv jarayonlari olib boriladi. Tajribali shifokorlar tomonidan  oʻtkaziladigan bu oʻquv jarayonlarida tibbiyot sohasidagi yangiliklar, ayniqsa, dorishunoslik sohasidagi yangiliklar xususida batafsil maʼlumotlar beriladi.

Ana, boʻlimga yana yangi bemor keltirildi. Avtohalokat natijasida jiddiy shikastlangan er-xotinning holati barcha mutaxassislar ishtirokida zudlik bilan tekshiruvdan oʻtkazildi. Ayolning homilador ekanligi maʼlum boʻlgach, ginekolog shifokor, bolalar reanimatologi, urolog, terapevt shifokorlar ham jarrohlik amaliyotiga jalb etildi. Bir emas, ikki  emas, uch insonning hayoti uchun kurash boshlandi. Boʻlim shifokorlarining fidoyiligi, oʻz vaqtida koʻrsatilgan tibbiy yordam, aniq qoʻyilgan tashxis tufayli, jarrohlik muvaffaqiyatli yakunlandi. Er-xotinning ham, ona qornidagi yetti oylik chaqaloqning ham hayotlari saqlab qolindi. Hali dunyoga kelmasdan yoʻl hodisasi tufayli hayotning ilk zarbasiga uchragan mitti vujud  chaqaloqlarni jonlantirish boʻlimiga oʻtkazildi. Goʻdakning yashab ketishiga yuz foiz umid borligini bilgach, jarrohlik xonasida hayot uchun kurashgan shifokorlarning barchasi bir-birlarini tabriklashdi.

Olimboy Shomurodovning koʻz oʻngida oʻzining toʻrt nafar farzandi, erining ishdan qaytishiga hamisha shirin taom tayyorlab, kutib oʻtiradigan rafiqasi Soliya gavdalandi. Bugun ham tun yarmidan ogʻdi. Bolalar shifokor otasini kuta-kuta uxlab qolishgan boʻlsa kerak. Faqat rafiqasi... rafiqasi usti doka bilan yopilgan xontaxtaning bir chekkasida eshikka qaragancha kutib oʻtirgan boʻladi har gal.

Shifokorning esa beorom tunlarining aslo adogʻi yoʻq. Bu beorom tunlarni bir ezgu maqsad yoritib turadi – xalq salomatligini saqlash. Ana shu maqsad sari intilgan salomatlik posbonlari safida mening qahramonim – Qipchoq qishlogʻida tugʻilib-oʻsgan, el-yurt xizmatiga hamisha kamarbasta, tuman tibbiyot birlashmasining shoshilinch tibbiy yordam boʻlimi bosh shifokori Olimboy Shomurodov ham bor.

Robiya YOʻLDOShEVA.