SOLIQ INTIZOMINI BUZGANLAR JAZOGA TORTILMOQDA

Bugungi kunda mamlakatimizda tadbirkorlik faoliyatini yanada rivojlantirish, ularga qulay ishbilarmonlik muhiti yaratish, yoshlarni tadbirkorlik sohasiga keng jalb etish, aholining bandligini taʼminlash hamda oilalar daromadlarini oshirish borasida keng koʻlamli ishlar amalga oshirilmoqda.

Yaratilgan imkoniyatlardan foydalanib, tumanimizda faoliyat yuritayotgan yakka tartibdagi tadbirkorlar orasida ish faoliyati davomida soliqlarni oʻz muddatida toʻlab, boshqalarga oʻrnak boʻlib kelayotganlar bilan bir qatorda, soliq majburiyatini bajarmasdan, soliqlar va majburiy toʻlovlarni oʻz muddatida toʻlamasdan kelayotgan tadbirkorlar ham uchrab turibdi. Yakka tartibdagi tadbirkorlarning 2016-yil 20-oktyabr holatiga daromad soligʻidan 208,0 mln. soʻm, pensiya jamgʻarmasiga sugʻurta badali toʻlovidan 219,0 mln. soʻm qarzdorligi mavjud.

Ushbu boqimanda qarzdorliklarni undirish maqsadida hozirgi kunda 621 nafar yakka tartibdagi tadbirkorlarga 651,8 mln. soʻmlik ogohlantirish talabnomalari tarqatildi, 658 nafar yakka tadbirkorlarning bankdagi hisob raqamlariga 1 511,6 mln. soʻmlik inkassa topshiriqnomalari qoʻyildi. Soliq va majburiy toʻlovlardan qarzlari toʻlanmaganligi sababli 2016-yil 20-oktyabr kuniga 43 nafar yakka tartibdagi tadbirkorlarning 100,7 mln. soʻm qarzlarini mol-mulki hisobidan undirish boʻyicha Xoʻjalik sudi ijro varaqalari chiqarilgan va ijrosini taʼminlash uchun tuman Sud ijrochilari boʻlimiga oʻtkazilib, undirish ishlari amalga oshirilmoqda.

Ularning xatlangan mol-mulklari "Kim oshdi” savdolariga qoʻyilib, sotilgan mablagʻlar evaziga soliq qarzdorligi qoplanmoqda.

Taʼkidlash lozimki, toʻlanayotgan ushbu soliqlar davlatimizning iqtisodiy barqarorligini mustahkamlash, shahar va qishloqlarimizni ijtimoiy-iqtisodiy rivojlantirish va obodonlashtirish orqali fuqarolarimizning turmushini yanada yaxshilashga sarflanadi.

J.RAHIMOV,

tuman DSI soliq boʻyicha qarzlarni majburiy undirish shoʻʼbasi boshligʻi.

(Foto - http://turkistonpress.uz)