Istiqlol madhi

Elim

Koʻngil boʻstonining koʻshkiga chiqib,

Amu tonglarini kuylayman toʻlib.

Gʻanim boʻhtonlarin xilvatga tiqib,

Istiqbol iqbolin jamlayman yelib.

Huv ana, koʻringan dugonalarim,

Qishloqning bagʻrini toʻldirib turar.

Amudaryo elimning durdonalarin,

Yildan-yil oshirib, doʻndirib borar,

Har biri  elimning ziynati boʻlib,

Mehnatdan yaralgan halol boyligi.

Qoratov, Jumurtov xazinaga boy,

Mehnatkash elim tur tutib biyligi.

Elimning koʻrkini maqtab, quvonib,

Keng, tekis yoʻllarda yugurgim kelar.

Shodligim hovuchlab butun dunyoga

Ulashib, dardlarin supurgim kelar.

Moviy osmonida qush boʻlib uchgan

Qalbim qoʻshigʻiga qulogʻim tutdim.

Duk-duk, duk-duk deya, bong urib turgan

Chorlovni his etib, shu sheʼrni bitdim.

Zulfiya OLLAYoROVA.

Istiqlolim

Istiqlolim - baxtim mening,

Nurli yoʻlim, omadim.

Necha yillik armonlarim,

Ushalgan orzularim.

Istiqlolim - huquqimsan,

Qonunlarda bitilgan.

Necha modda va boʻlimda,

Takror-takror yozilgan.

Erkim, shaʼnim, nomusim,

Farzandlarim baxtisan.

Ona-bola taqdirlari,

Oʻgʻil-qizim taxtisan.

Istiqlolim – erkim mening,

Humo qushi charx urgan.

Yer yuziga tinchlik soʻzin,

Yoymoqqa tayyor turgan.

Zuhra AHMEDOVA,

"Jayxun ilhomlari”

NNT aʼzosi.

Vatan sogʻinchi

Oʻzim senga dasta-dasta gul tutay,

Dardlaringni olib sen-chun dard chekay.

Sogʻinchlarda qolsam axir men netay,

Nechun buncha sogʻintirding, ey Vatan.

Sendan boshqa hech narsa yoʻq ulugʻroq,

Bogʻlaringda hushovoz qushing sayroq.

Oʻzing ulugʻ, oʻzing suyuk, azizroq,

Nechun buncha sogʻintirding, ey Vatan.

Bagʻrin ochib, qarshilagan tonglaring,

Gul uzatib, erkalagan onlaring.

Yuragimning sen deb urgan bonglarin

Nechun buncha sogʻintirding, ey Vatan.

Koʻrmadingmi, erka qizing seni deb,

Har bir giyoh, tikanzoring quchganin.

Koʻksimdagi gullarni senga sochib

Intilaman, sogʻintirma, ey Vatan.

Dinora KARIMBOYeVA.

TAʼRIF BERSAM OZ...

Vatanim, goʻzalsan, nechogʻlik bugun,

Goʻzalsan barchadan, barcha Vatandan.

Oʻzgacha boʻlmoqda har qarich yering,

Muqaddas va aziz Vatanim mening!

Hatto choʻllaring ham boʻldi, chamanzor,

Maqtashga arzirli daholaring bor.

Tillarda dostondir "oʻzbek” degan nom,

Ahli olam bugun yurtimga mehmon.

Mustaqillik qilar koʻklarda parvoz,

Tinch-totuv koʻngillar mehribon, hamroz.

Istiqlol mangu boʻl, Vatan, omon boʻl,

Yurtim, senga qancha taʼrif bersam oz!

Iroda

YeRDOShEVA,

38-sonli maktab oʻquvchisi.

VATAN

Vatan – tomirdagi qondek muqaddas,

Onajonim kabi bagʻri keng, aziz.

Shu yurtga mehrimiz aslo tugamas,

Noming ulugʻlaydi har bir oʻgʻil-qiz.

"Hech kimga bermaymiz seni”, ey Vatan,

Yuraklar toʻrida yashaysan mangu.

Senga fido boʻlsin shirin jon-u tan.

Bayrogʻ-u tugʻingga sodiqmiz mangu.

Chinoroy OʻRINBOYeVA.