SOFLOM OILA SOFLOM FARZANDLARNI KAMOLGA YeTKAZADI

Prezidentimiz I.A.Karimov tashabbusi bilan amalga oshirilayotgan «Sogʻlom ona va bola» kontseptsiyasi zamirida ona va bola salomatligini asrash, kelajak avlodlarning kamolotini taʼminlashdek ezgu maqsad mujassam.

Prezidentimiz I.A.Karimovning 2008-yil 18-iyun kungi «Bolalikdan nogironlar tugʻilishining oldini olish uchun tugʻma va irsiy kasalliklarni barvaqt aniqlash davlat dasturi toʻgʻrisida»gi Qarori asosida onalar va bolalar salomatligini muhofaza qilish, sogʻlom avlod tugʻilishi va tarbiyalanishi uchun zarur shart-sharoitlarni yaratish, homilador ayollar va chaqaloqlar patologiyasini barvaqt aniqlash borasida keng qamrovli ishlar olib borilmoqda. Homilador ayollarni tibbiy koʻrikdan oʻtkazish orqali irsiy kasalliklarni mumkin qadar erta aniqlovchi skrining markazlari tashkil etildi.

Natijada onalar va bolalar oʻlimi keskin kamaydi. Aholiga birlamchi tibbiy-profilaktika, shoshilinch va ixtisoslashtirilgan tibbiy yordam koʻrsatishning zamonaviy tizimi shakllantirilib, fertil yoshdagi ayollarni mukammal tibbiy koʻrikdan oʻtkazish yoʻlga qoʻyildi.

Prezidentimiz I.A.Karimovning 2009-yil 13 apreldagi «Ona va bola salomatligini muhofaza qilish, sogʻlom avlodni shakllantirishga doir qoʻshimcha chora-tadbirlar toʻgʻrisida»gi,  2009-yil 1 iyuldagi «2009-2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari dasturi toʻgʻrisida»gi qarorlari bu yoʻnalishdagi ishlarni yanada yuqori bosqichga olib chiqishda muhim asos boʻlmoqda.

Mazkur hujjatlarda belgilangan vazifalar ijrosini taʼminlash maqsadida barcha joylarda tibbiyot muassasalari, taʼlim maskanlari, mahallalar bilan birgalikda turli targʻibot ishlari olib borilmoqda.

Jumladan, boʻlajak kelin-kuyovlarga nikohgacha tibbiy koʻrikdan oʻtishning zarurati, erta turmush qurish va qarindoshlar oʻrtasida nikohning salbiy oqibatlari, oila salomatligi borasida atroflicha maʼlumot berilmoqda. Bu kabi tadbirlar yoshlarimizning tibbiy va huquqiy madaniyatini yuksaltirishda katta ahamiyat kasb etadi. Eng muhimi, aholi oʻrtasida sogʻlom turmush tarzini qaror topdirishda asosiy omil boʻlmoqda.

2013 yil 30-aprelda imzolangan «Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisidagi»gi Qonun oila institutini mustahkamlashga qaratilgan boʻlib, unga muvofiq nikoh yoshiga amal qilmaslikka qarshi chora-tadbirlar kuchaytirildi. Chunki sogʻlom farzand faqatgina sogʻlom ota-onadan tugʻiladi.   

Shunday ekan, kelajagi buyuk davlatni barpo etish, fuqarolik jamiyatini yuksaltirish, yosh avlodni sogʻlom va barkamol etib tarbiyalash barchamizning eng oliy maqsadimizdir.