QISQA SATRLARDA

19-noyabr

"Jayxun ilhomlari" nodavlat notijorat tashkiloti aʼzosi, Qoraqalpogʻistonda xizmat koʻrsatgan jurnalist Saʼdulla Xoʻjaniyozov tashkilotchiligida sheʼriyat kechasi oʻtkazildi.

Kechada tumanimizning badiiy ijod bilan shugʻullanayotgan 30 nafardan ziyod havaskor ijodkorlari ishtirok etdilar.

Tadbirda taniqli yozuvchi   Bahodir Xudoyberganov ham qatnashib, yosh ijodkorlarning mashqlarini tinglab, yoʻl-yoʻriq va maslahatlar berdi.

* * *

23-noyabr

1-sonli Bolalar va oʻsmirlar sport maktabida seminar boʻlib oʻtdi.

Seminarda "Sport toʻgaraklarida tarbiyalanuvchi bolalarga zarur hollarda birinchi tibbiy yordam koʻrsatish”, "Sportchi shaxsiy gigiyenasi”, "Guruh jurnalini yuritish tartibi”, "Sportchilarni BOʻSMga qabul qilish” kabi mavzularda maʼruzalar tinglandi.

Shuningdek, kelgusida oʻtkazilishi rejalashtirilayotgan musobaqalar tartibiga kiritilgan yangiliklar haqida batafsil maʼlumot berildi.

* * *

24-noyabr

 Mangʻit Iqtisodiyot kollejida Oʻzbekiston Respublikasi Adliya Vazirligi faxriylar Kengashi tomonidan Oʻzbekiston Respublikasi Konstitutsiyasi qabul qilinganligining 23 yilligi oldidan oʻquvchi-yoshlar bilan tadbir oʻtkazildi. Tadbirda Oʻzbekiston Respublikasi Adliya Vazirligining faxriylar Kengashi raisi Ermuhammad Shermatov ishtirok etdi va Konstitutsiyamizning xalqimiz, ayniqsa, yoshlar hayotida tutgan oʻrni va ahamiyati haqida gapirdi.

* * *

25-noyabr

Mangʻit iqtisodiyot kollejida "Mahallam – mening taqdirimda” koʻrik-tanlovining tuman bosqichi boʻlib oʻtdi. Unda koʻrik-tanlovning saralash bosqichida eng yuqori ball toʻplashga erishgan 11 ta ovul va mahallalar jamoalari ishtirok etishdi.

Uchta shartdan iborat boʻlgan koʻrik-tanlov natijalariga koʻra "Qilichboy” ovulining "Nurafshon” jamoasi birinchi, Oybek nomli mahallaning "Oybek” jamoasi ikkinchi, "Toshyop” ovulining "Kelajak” jamoasi esa faxrli uchinchi oʻrinni egalladi.

Gʻoliblikni qoʻlga kiritgan "Nurafshon” jamoasi mazkur koʻrik-tanlovning Qoraqalpogʻiston Respublikasi bosqichida qatnashish huquqini qoʻlga kiritdi.

* * *

26-noyabr

Toʻrtkoʻl shahrida Qoraqalpogʻiston Respublikasi Joʻqorgʻi Kengesi va xalq deputatlari Amudaryo va Toʻrtkoʻl tuman Kengashlarining qoʻshma majlisi boʻlib oʻtdi.

Qoʻshma majlisni Qoraqalpogʻiston Respublikasi Joʻqorgʻi Kengesi raisi M.Yerniyazov ochdi va olib bordi.

Qoʻshma majlisda "Amudaryo va Toʻrtkoʻl tumanlarida 2016-yil hosili uchun zamin yaratish, qishloq xoʻjaligi ekin maydonlaridan samarali foydalanish, qishloq xoʻjaligida toʻlov intizomini mustahkamlash va fermer xoʻjaliklarining yer uchastkalari maydonlarini maqbullashtirish boʻyicha qoʻshimcha chora-tadbirlar haqida”gi masala muhokama qilindi.

Qoʻshma majlis qarori bilan Amudaryo va Toʻrtkoʻl tumanlari hokimlariga yer uchastkalarini berish (realizatsiya qilish) masalalarini koʻrib chiqish boʻyicha tuman komissiyalari tomonidan yer maydonlari maqbullashtirilgan va yangidan tashkil qilingan fermer xoʻjaliklari bilan yer ijara shartnomalarini tuzish topshirildi.