Tomorqadan samarali foydalanish – kambagʻallikni qisqartirish va bandlikni taʼminlash omili

Tomorqa – har bir xonadon uchun baraka manbai. Ayniqsa, oziq-ovqat xavfsizligini taʼminlash, aholining daromadini oshirish hamda ijtimoiy muammolarni bartaraf etishda tomorqachilik muhim ahamiyat kasb etadi. Bugungi kunda davlatimiz rahbari tashabbusi bilan tomorqa va ijara yerlardan samarali foydalanishga alohida eʼtibor qaratilib, tomorqa egalarini imtiyozli kreditlar, urugʻlik va koʻchatlar, agrotexnik xizmatlar hamda zaruriy vositalar bilan taʼminlash borasida qator yangi imkoniyatlar yaratilmoqda.

Aholining turmush darajasini oshirish, kambagʻallikni qisqartirish va bandlikni taʼminlash davlat siyosatining ustuvor yoʻnalishlari sifatida qaralib, bu borada tomorqachilikni rivojlantirish, mavjud yer resurslaridan samarali foydalanish muhim ahamiyat kasb etmoqda.

Amudaryo tumanidagi mahallalarda davlatimiz rahbari tomonidan joriy qilingan yangi tizim asosida tomorqa va aholi tomonidan ijaraga olingan yerlardan samarali foydalanish, shu orqali oilalar daromadlarini oshirish, kambagʻallikni qisqartirish va bandlikni taʼminlash masalalariga bagʻishlangan seminar tashkil etildi.

Toʻlqin ovulidagi namunali tomorqachi Azimjon Muxtorov tomorqasida tashkil etilgan seminarda Qoraqalpogʻiston Vazirlar Kengashi raisining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari — iqtisodiyot va moliya vaziri Nurullan Yerlepesov, Kambagʻallikni qisqartirish va bandlik vaziri Quanishbay Azerbayev, tuman hokimi Sobir Xoʻjametov, hokim oʻrinbosarlari, tegishli tashkilotlar rahbarlari hamda 49 ta “Mahalla yettiliklari” masʼullari ishtirok etdilar.

Seminarda soʻzga chiqqan masʼullar har bir mahallani kambagʻallikdan holi hududga aylantirish, bandlikni taʼminlashda tomorqalardan samarali foydalanishini tashkil etish eng asosiy omil ekanligini, bunda mahallalar masʼullari oʻzaro hamkorlikdagi ishlarni tashkil etishlari, har bir hududda namunali tomorqachilar bilan tajriba almashish maqsadida seminarlar tashkil etish, hududlarga namunali tomorqachilarni biriktirish lozimligi xususida soʻz yuritdilar.

Taʼkidlash joizki, tomorqadan unumli foydalanish, eng avvalo, ishni toʻgʻri rejalashtirishdan boshlanadi. Yerni maqsadli tarzda ishlatish, zamonaviy sugʻorish texnologiyalaridan foydalanish, ekin turlarini ilmiy asosda tanlash orqali ham ozgina yerda ham katta hosil olish mumkin. Masalan, sabzavot, meva-cheva, poliz mahsulotlari yoki dorivor oʻsimliklarni ekish orqali yil davomida bozorda talab yuqori boʻlgan mahsulotlar yetishtiriladi. Bu esa, bir tomondan, oila daromadini oshirsa, ikkinchi tomondan, ichki bozorda narx-navo barqarorligiga xizmat qiladi. Tomorqadan unumli foydalanish orqali har bir xonadon oʻz tomorqasida doimiy yoki mavsumiy ish joyi yaratishi mumkin. Ayniqsa, ayollar va yoshlar uchun tomorqachilik orqali oʻz biznesini yoʻlga qoʻyish imkoniyati ochiladi.

Toʻlqinlik ilgʻor tomorqachi Azimjon Muxtarov mavjud yer imkoniyatlaridan oqilona foydalanib, tomorqasida karam, 7 sotix issiqxonasida pomidor va bodring, bulgʻor qalampiri kabi sabzavot mahsulotlari va turli koʻchatlarini yetishtirib, 2 marotaba yaxshi hosil va yuqori daromad olib kelmoqda.

Seminar ishtirokchilari tomorqada tashkil etilgan ishlar bilan yaqindan tanishdilar hamda oʻzaro bilim va tajriba almashdilar.

Charos Arslonova, tuman hokimligining Axborot xizmati rahbari.