Aholi bandligini taʼminlash va kambagʻallikni qisqartirish masalalari yuzasidan respublika miqyosidagi seminar boʻlib oʻtdi

Bugungi kunda aholini kambagʻallikdan chiqarish, tadbirkorlikni rivojlantirish orqali yangi ish oʻrinlarini yaratish, bandlikni taʼminlashga eng ustuvor vazifalar sifatida alohida eʼtibor qaratilib, muhtaram Prezidentimiz tashabbusi bilan bu borada muhim islohotlar amalga oshirilmoqda. Amudaryo tumanida tashkil etilgan respublika miqyosidagi seminar ham aynan ushbu masalalarga bagʻishlandi.

Tuman hokimligining majlislar zalida oʻtkazilgan seminarda Qoraqalpogʻiston Respublikasi Vazirlar Kengashi masʼullari, vazirliklar, respublika va tumanlar miqyosidagi tegishli tashkilotlar rahbarlari, shahar va tumanlar hokimlarining moliya, iqtisodiyot va kambagʻallikni qisqartirish masalalari boʻyicha birinchi oʻrinbosarlari ishtirok etdi. Oʻzaro bilim va tajriba almashish maqsadi koʻzlangan seminarda soʻzga chiqqanlar kun tartibidagi masalalar boʻyicha fikr-mulohazalar bildirdilar.

Seminarda soʻzga chiqqanlar tomonidan hududlarda aholi turmush sharoitini yaxshilash, tadbirkorlikni rivojlantirish, kambagʻallikni qisqartirish va ijtimoiy qoʻllab-quvvatlash dasturlarining natijadorligiga erishish maqsadida imzolangan Oʻzbekiston Respublikasi Prezidentining “Kambagʻallikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish toʻgʻrisida”gi farmoni bu borada muhim dasturulamal boʻlib xizmat qilayotganini taʼkidladilar.

Shuningdek, aholi bandligini taʼminlashda tomorqalardan samarali foydalanish, uy sharoitida dehqonchilik, hunarmandchilik, chorvachilik, parrandachilik, tarmoqa xoʻjaligi bilan shugʻullanishni tashkil etish, har bir hudud uchun moʻljallangan “drayver” loyihalarni ishlab chiqish kabi vazifalar xususida soʻz yuritildi.

Seminar ishtirokchilari tuman hududidagi ovul va mahallalarda tomorqalardan samarali foydalanish, tadbirkorlikni rivojlantirish va kambagʻallikni qisqartirish borasida amalga oshirilayotgan ishlar bilan tanishdilar.

Dastlab seminar ishtirokchilari Boy ovul mahallasida tadbirkor Doniyor Jumamuratov tomonidan uy sharoitida tashkil etilgan mebel ishlab chiqarish tsexi faoliyati bilan tanishdilar.

Keyingi manzil Beruniy mahallasida yashovchi hunarmand Inobat Xoʻjaniyazovaning xonadoni boʻldi. Mehmonlar oila bekasi tomonidan uy sharoitida tashkil qilingan hunarmandchilik faoliyati bilan yaqindan tanishib, uning tajribalari boshqa hududlarda ham ommalashtirish taklifini bildirdilar.

Shuningdek, seminar ishtirokchilari Choykoʻl ovulida yashovchi fuqaro Davlatboy Bobojonovning tomorqasidan samarali foydalanib, toʻqsonbosti usulida ekinlarni yetishtirish borasida erishayotgan natijalari bilan tanishib, oʻzlarini qiziqtirgan savollarga namunali tomorqachidan javoblar oldilar.

Navbatdagi manzil ham shu ovuldagi ilgʻor tomorqachi Mahmud Norboyevning xonadoni boʻldi. Tadbir ishtirokchilari xonadon egasining tomorqasida va dehqon xoʻjaligida tashkil etgan issiqxonalari faoliyati bilan tanishdilar hamda qishning izgʻirinli kunlarida issiqxonada yetishtirilayotgan mahsulotlar aholi dasturxonining toʻkinligi va bozorlardagi narx-navoning barqarorligini taʼminlashga hissa qoʻshishini eʼtirof etdilar.

Mehmonlar shuningdek, chorvachilik va parrandachilik tarmoqlarini yanada rivojlantirish boʻyicha tumanda amalga oshirilayotgan ishlar bilan ham yaqindan tanishib, bu borada tomorqa xoʻjaliklarining hissasi alohida ahamiyat kasb etayotganini eʼtirof etdilar. Qangli ovulida yashovchi Gulmon Saparov tomonidan uy sharoitida tashkil etilgan parrandachilik va issiqxona faoliyati bu ishlarga yaqqol misoldir.

Masʼullar tadbirkorlar, tomorqachilar hamda hunarmandlar bilan suhbatlar mobaynida ushbu tarmoqlarni yanada rivojlantirish borasida yaratilayotgan yangi imkoniyatlar xususida soʻz yuritdilar hamda ulardan unumli foydalanish yuzasidan qator tavsiyalar berdilar.

Charos Arslonova, tuman hokimligining Axborot xizmati rahbari.