USTUVOR VAZIFALAR MUHOKAMASI

2015-yil 30 oktyabr kuni tuman hokimligida "2015-yilning 9 oyida tumanni ijtimoiy-iqtisodiy rivojlantirish yakunlari va 2015-yilgi iqtisodiy dasturining eng muhim ustuvor vazifalarini amalga oshirilishini soʻzsiz taʼminlash chora-tadbirlar toʻgʻrisida”gi masala boʻyicha yigʻilish boʻlib oʻtdi.

Yigʻilishda hokim oʻrinbosarlari va hokimlik masʼul xodimlari, boʻlimlar, muassasa, korxona va tashkilotlar rahbarlari, fuqarolar yigʻinlari raislari, taʼlim muassasalari rahbarlari va ommaviy axborot vositalari vakillari ishtirok etdilar.

Yigʻilishni tuman hokimining birinchi oʻrinbosari B.Ernazarov ochdi va olib bordi.

Yigʻilish kun tartibida "2015 yilda sanoat mahsulotlari ishlab chiqarish prognoz parametrlarining soʻzsiz bajarilishini taʼminlash, shuningdek 2016-yilda iqtisodiyot tarmoqlarini barqaror rivojlantirish uchun mustahkam zamin yaratish boʻyicha qoʻshimcha chora tadbirlar, eksport prognoz parametrlarining bajarilishini soʻzsiz taʼminlash, eksportni koʻpaytirishning mavjud rezervlarini yuqori darajada safarbar qilish va meva-sabzavot mahsulotlari va kartoshkani qishga gʻamlash toʻgʻrisida”gi hamda "2015-yilda ishga tushiriladigan eng muhim obʼektlarning soʻzsiz foydalanishga topshirilishini taʼminlash, muhandislik-kommunikatsiya va yoʻl-transport infratuzilmasini rivojlantirish boʻyicha 2016-2019-yillarda bajarilishi nazarda tutilgan investitsiya loyihalarining amalga oshirilishini boshlashni jadallashtirish va tarmoqlar va hududlar rahbarlarining kuz-qish mavsumiga tayyorgarlik koʻrish boʻyicha ishlarni tugallash toʻgʻrisida”gi masalalar koʻrib chiqildi.

Kun tartibidagi birinchi masala boʻyicha tuman Iqtisodiyot boʻlimi boshligʻi A.Yusupov maʼruza qildi.

Taʼkidlanganidek, 2015-yilning oʻtgan davrida, 2014 yilning mos davriga nisbatan sanoat maxsulotlari xajmi 101,5 foizga, xalk isteʼmoli mollari ishlab chikarish hajmi 104,8 foizga, qishloq xoʻjaligi yalpi mahsuloti 100,3 foizga, kapital qoʻyilmalar hajmi 100,8 foizga, pudrat ishlari hajmi 100,4 foizga, chakana savdo aylanmasi 113,8 foizga, pullik xizmat koʻrsatish hajmi esa 119 foizga oʻsgan.

Shuningdek, maxalliy byudjet daromadlari 102,4 foizga, yuk va yoʻlovchi tashish hajmi mos ravishda 101 va 100,2 foizga, eksport va import hajmi esa mos ravishda 100,1 va 104,1 foizga oshgan.

Kun tartibidagi ikkinchi masala boʻyicha tuman Arxitektura boʻlimi boshligʻi S.Muratov maʼruza qildi. Maʼruzada 2015-yilda ishga tushiriladigan eng muhim obʼektlarning soʻzsiz foydalanishga topshirilishini taʼminlash, muhandislik-kommunikatsiya va yoʻl-transport infratuzilmasini rivojlantirish boʻyicha 2016-2019-yillarda bajarilishi nazarda tutilgan investitsiya loyihalarining amalga oshirilishi boʻyicha atroflicha maʼlumot berildi.

Shuningdek, yigʻilish davomida tarmoqlar va hududlar rahbarlarining kuz-qish mavsumiga tayyorgarlik boʻyicha amalga oshirgan ishlari muhokama qilinib, kelgusidagi vazifalar belgilab olindi.

Yigʻilishda Qoraqalpogʻiston Respublikasi Xususiylashtirish, monopoliyadan chiqarish va raqobatni rivojlantirish qoʻmitasi raisi M.Qosnazarov ishtirok etdi va nutq soʻzladi.

Kun tartibidagi barcha masalalar boʻyicha tegishli qarorlar qabul qilindi va shuning bilan yigʻilish oʻz ishini yakunladi.

Tuman hokimligining axborot xizmati.