OQ YOʻL, QOʻSh SOHIL YoShLARI
Yaqinda Urganch shahrida Xorazm viloyati va Qoraqalpogʻiston Respublikasi yosh ijodkorlarining VII mintaqaviy seminari boʻlib oʻtdi. Bu seminarni oʻtkazish uchun Oʻzbekiston Respublikasi yozuvchilar ushmasi raisi oʻrinbosari Sirojiddin Sayyid, uyushma aʼzolaridan Rustam Musulmon, shoira Farogʻat Xudoyqulovalar tashrif buyurishdi. Shuningdek, bir guruh iqtidorli yoshlar bilan birga ustoz ijodkor yozuvchilardan Qoraqalpogʻiston Respublikasi Yozuvchilar uyushmasi raisi Kengesboy Karimov, Beknazar Yernazarov, Oʻrazboy Abdurahmonov, shoira Munavvar Qurbonboyevalar ishtirok etishdi.
Seminarga kelgan mehmonlarni Xorazm viloyati Madaniyat saroyida kutib olishdi va Xorazm viloyati hokimining muovini, Xotin qizlar qoʻmitasi raisi Shakarjon Xoʻjaniyozova "Isteʼdodlilar maktabi” VII mintaqaviy seminarini ochib berdi. Seminarning birinchi kunida yurtimizning joʻshqin daryosi Amudaryoning qoʻsh sohili ijodkor yoshlari oʻz sheʼrlaridan oʻqib, bir-birlari bilan tanishdilar va fikrlashdilar. Shu kuni kechqurun Xorazm viloyati va Qoraqalpogʻiston Respublikasi yosh ijodkorlarining "Isteʼdodim, ijodim bagʻringda gullar Vatan” shiori ostidagi "Isteʼdodlilar maktabi” VII mintaqaviy seminarning taqdirlash marosimi boʻlib oʻtdi. Bunda yosh ijodkorlar - Amudaryo tumani "Barkamol avlod” bolalar markazidagi "Yosh jurnalist va notiq” toʻgaragi aʼzosi Jamila Yangiboyeva, Umida Erdasheva, Javohir Yoʻldoshevlar va Melioratsiya va suv xoʻjaligi kasb-hunar kollejidan Yulduz Yusupova, 36-sonli maktabdan Shahzod Qurbonboyev, "Barkamol avlod” bolalar markazi toʻgarak rahbari Manzura Ashirboyevalar seminar sertifikati va maxsus sovgʻalar bilan taqdirlandilar. Seminarning ikkinchi kunida ertalab ijodkor yoshlar viloyatning yangi 17 turdagi sport oʻyinlari oʻtkazishga moʻljallangan oʻyingohini tomosha qildilar va ajoyib taassurotlarga ega boʻldilar. Shuningdek, yosh ijodkorlar Xorazm Davlat Universiteti yoshlari bilan ham uchrashdilar.
Uchrashuvni Oʻzbekiston Yozuvchilar Uyushmasi raisi oʻrinbosari Sirojiddin Sayyid olib bordi va koʻngilga yaqin sheʼrlari bilan tinglovchilar qalbidan joy oldi. Shoir va tarjimon Rustam Musulmon, xorazmlik ustoz shoirlar va yozuvchilardan Erkin Madrahimov, Komil Avaz, Ismoil Allambergenov, Sotim Avaz, Bibisara Otayeva, Gavhar Ibodullayevalar ishtirokida mushoira avj oldi. Kunning ikkinchi yarmida seminar ishtirokchilari qadimiy va navqiron Xiva shahriga sayohatga bordilar.
Mintaqaviy seminarda qatnashgan tumanimizning ijodkor yoshlari olam-olam taassurotlar bilan qaytdilar.
Zulfiya OLLAYoROVA,
"Barkamol avlod” bolalar markazi toʻgarak rahbari.
(Foto - http://myday.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
