Farovonligimiz omili

Bugun rivojlangan dunyo iqtisodiyotida kichik biznes aholi bandligini taʼminlash va farovonligini oshirishning muhim omiliga aylanib bormoqda. Bozor konʼyukturasiga tez moslashuvchan, global iqtisodiy taʼsirlarga bardosh bera oladigan mazkur sohaning jamiyat taraqqiyotida qanchalik muhim ahamiyat kasb etishi jahon moliyaviy-iqtisodiy inqirozi sharoitida yana bir bor oʻz tasdigʻini topdi. Kichik biznes va xususiy tadbirkorlikni rivojlantirishga qaratilayotgan yuksak eʼtibor samaralari barqaror taraqqiy etayotgan mamlakatimiz iqtisodiyotida ham oʻz ifodasinin topmoqda.

Mustaqillik yillarida yurtimizda Prezidentimiz tashabbusi va bevosita rahbarligi ostida tadbirkolrlik harakati rivojlantirilib, mulkdorlar sinfi shakllandi, kichik biznes va xususiy tadbirkorlik subʼektlari vujudga keldi. Mazkur tizimga qaratilayotgan alhida eʼtibor, yaratilayotgan qulay shart-sharoit, eng asosiysi davlatimiz tomonidan berilayotgan imtiyozlar tufayli ular bugungi kunda iqtisodiyotimizda yetakchi kuchga aylandi.

Mamlakatimizda tadbirkorlikni jadal rivojlantirishni ragʻbatlantirish, mamlakat iqtisodiyotida uning roli va ahamiyatini tubdan oshirish maqsadida Oʻzbekiston Respublikasi Prezidentining Farmonlari hamda Vazirlar Mahkamasining Qarorlariga asosan bir qator imtiyozlar berilib kelinmoqda.

Yurtimizda Davlat hokimiyati organlari hamda tadbirkorlik subʼektlari oʻrtasida muloqotsiz munosabatlarni rivojlantirish orqali xoʻjalik yurituvchi subʼektlar bilan davlat organlari oʻrtasidagi munosabatlarda subʼektiv aralashuvlarni bartaraf qilish borasida bir qator meʼyoriy xujjatlar qabul qilindi. Jumladan Prezidentimizning 2014-yil 7-apreldagi " Oʻzbekiston Respublikasida investitsiya iqlimi va ishbilarmonlik muhitini yanada takomillashtirishga doir qoʻshimcha chora tadbirlar toʻgʻrisida”gi Farmoni va 2014-yil 15-apreldagi "Tadbirkorlik faoliyatini amalga oshirish va davlat xizmatlarini koʻrsatish bilan bogʻliq tartibotlarni yanada takomillashtirish chora-tadbirlari toʻgʻrisida”gi qarori mamlakatimizda ishbilarmonlik muhitini yanada yaxshilash, qulay investitsiya iqlimini yaratish, tadbirkorlik faoliyatini kengaytirish, natijada iqtisodiyotning xususiy sektorida aholi bandligini taʼminlash borasida oʻziga xos omil boʻldi. Shuningdek mamlakatimizda Prezidentimiz Farmon va Qarorlari, Vazirlar Mahkamasi Qarorlariga asosan soliq tizimida ham tadbirkorlar manfaatiga xizmat qiluvchi oʻzgarishlar amalga oshirilmoqda.

Masalan yangi roʻyxatdan oʻtgan yakka tartibdagi tadbirkorlarning oʻz faoliyatini boshlashi uchun qulay shart-sharoitlar yaratish hamda kasb-hunar kollejlari bitiruvchilarini tadbirkorlikka keng jalb qilishni ragʻbatlantirish maqsadida Soliq kodeksining 311- va 375-moddalariga qoʻshimchalar kiritilib, yangi roʻyxatdan oʻtgan yakka tartibdagi tadbirkorlar va yuridik shaxs tashkil etmagan holda faoliyat koʻrsatuvchi oilaviy tadbirkorlik subʼektlari tomonidan sugʻurta badallari va qatiy belgilangan soliqni toʻlash ular davlat roʻyxatidan oʻtkazilgan oydan keyingi oydan boshlab (tegishli oyning 25-sanasiga qadar) amalga oshirilishi belgilab qoʻyildi.

Soliq kodeksining 375-moddasiga kiritilgan yana bir muhim yangilik kasb-hunar kollejlari bitiruvchilariga tadbirkorlik faoliyatlarini amalga oshirishlari uchun katta imkoniyatlarni yaratib beradi. Yaʼni, 2015yildan boshlab, kasb-hunar kollejlari bitiruvchilari kollejni tamomlagandan keyin oʻn ikki oy ichida yakka tartibdagi tadbirkor sifatida davlat roʻyxatidan oʻtgan taqdirda, davlat roʻyxatidan oʻtgan sanadan eʼtiboran qatʼiy belgilangan soliqni toʻlashdan 6 oy muddatga ozod etiladi.

Yurtimizda aholi turmush farvonligini yuksaltirish, uning bandligi darajasini oshirish, umuman mamlakatimiz iqtisodiy taraqqiyotini taʼminlashda kichik biznes va xususiy tadbirkorlik subʼektlari hal qiluvchi kuchga aylanmoqda.

Ulugʻbek BOZORBOYeV, DSI boʻlim boshligʻi.

(Foto - http://uza.uz)

Maqola Oʻzbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan loyiha doirasida eʼlon qilindi.