KEKSALAR DUOSINI OLAYoTGAN MAHALLADOShLAR

Bizning Oybek nomli mahalla fuqarolar yigʻini kengashi 15 nafar kishidan iborat boʻlib, hamkor tashkilotlar, jamoatchilik hamda mahalla faollari bilan hamkorlikda bir oila vakillaridek bamaslahat ish olib boradilar. Mahallamizda 3546 nafardan ziyod har xil millat vakillari boʻlib, 8 nafar mehnat faxriylari, 60 yoshdan oshgan 154 nafar otaxon va onaxonlarimiz farzandlari eʼzozida yashashadi.

"Keksalarni eʼzozlash yili” Davlat Dasturida "Hech kim mehr-eʼtibordan chetda qolmasin!”, "Keksalarning duosini olaylik”, "Qariyalarimiz - xonadonimiz fayzi”, "Mehr va muhabbatda kechayotgan umr”, "Qarisi bor uyning parisi bor”, "Uch avlod uchrashuvi” kabi bir qancha aktsiyalar oʻtkazish belgilab berilgan. Kengash aʼzolarining qarori bilan mahallamizda "Hech kim mehr-eʼtibordan chetda qolmasin” aktsiyasi boʻyicha 60 yoshdan oshgan 88 nafar onaxonlar bilan xomiylar yordamida "Orzu” toʻyxonasida "Bir piyola choy ustida” suhbat oʻtkazildi va 55-sonli maktabning "Orasta qizlar” guruhi va oʻquvchilari, 6-sonli MTM tarbiyalanuvchilarining "Zumradoylar” guruhi tomonidan tayyorlangan kontsert dasturlari namoyish etildi. Hududga biriktirilgan shifokorlardan Mohimjon Abdurahmonova, hamshiralar Saragul Tangirberganova, Feruza Bekimbetovalar ishtirokida Oybek nomli mahalla fuqarolar yigʻini binosida 57 nafar 60 yoshdan oshgan fuqarolar tibbiy koʻrikdan oʻtkazilib, 50 nafar onaxon va otaxonlar gepatit B ga qarshi vaktsina bilan emlandi.

Bundan tashqari, "Keksalar duosini olaylik” deb nomlangan aktsiya oʻtkazilib, 53 nafar keksa otaxonlar uchun 6-sonli MTM tarbiyalanuvchilari tomonidan kontsert dasturi namoyish etildi, dasturxonga osh tortildi.

Yoqubov Matkarim bobo, Masharipov Rahim bobo va Bozorboyev Soliy bobolar front ortida qilgan mehnatlari va boshidan oʻtgan qiyinchiliklar haqida gapirib berdilar hamda hozirgi farovon hayotga yetkazganiga shukronalar aytib, Yurtboshimiz keksalarni eʼzozlayotgani uchun mingdan-ming rahmat aytib, duo qildilar. Bu tadbirda tuman Mudofaa boʻlimi tomonidan 2 nafar mutaxassis ishtirok etishib, keksalarni bayram bilan tabrikladilar.

Qurboniyozov Kenjaboy, Avezov Yoʻldosh, Jabborov Erimbat, Erdoshev Qurbonboy, Allayorov Toʻraboy otalar el-yurt farovonligi uchun qilgan mehnatlari samarasini koʻrib, hozirgi tinch va osoyishta zamonlarga yetkazganiga shukronalik bilan, dildan suhbatlashdilar. Hududdagi 55-sonli maktabda tashkil etilgan "Yordamchi kamolotchilar” guruhi aʼzolaridan 7 nafar bolalar kelib, ota-xonlarga xizmat koʻrsatishdi. Tadbirdan keyin Jabborov Saʼdulla boboning tomarqasini tartibga keltirib, kartoshka ekishga yordamlashdilar va otaxonlarning duolarini oldilar.

Mahallada yashovchi "Jayxun Amu mebel” MChJ rahbari, tadbirkor usta Rajab aka Matsapoyev 8 nafar keksa onaxon va otaxonlarga oʻz sovgʻasini topshirdi. 14-aprel kuni mahalla faoli Soatboy Dalimov homiyligida mahallada yashovchi 39 nafar keksalar "Shayx Jalil bobo” ziyoratgohiga borishdi. Keksalar mahalladoshlari koʻrsatayotgan hurmat va eʼzozdan juda xursand boʻlishdi.

Momojon RAHIMOVA,

Oybek nomli MFY maslahatchisi.

(Foto - http://fikr.uz)