DEPUTAT XONIMJON RAJABOVA NOGIRONLIGI BOʻLGAN FUQAROLAR BILAN UChRAShDI

3-dekabr – Xalqaro nogironlar kuni Birlashgan millatlar tashkiloti tomonidan 1992-yilda belgilangan va butun dunyoda keng nishonlanib kelinmoqda. Uning maqsadi – jamiyat hayotining barcha sohalarida nogironlar ijtimoiy faolligini oshirish, ularning huquqlarini himoya qilish, shuningdek, nogironlar muammolariga keng jamoatchilik eʼtiborini jalb qilish orqali nogironligi boʻlgan shaxslarning har qanday sogʻlom odamdan kam emasligini amalda namoyon etishdir. Mamlakatimizda, shu jumladan Amudaryo tumanida ham ushbu tadbirni nishonlash anʼanaga aylangan. Nafaqat sana munosabati bilan, balki yil davomida, turli bayramlarda ham tumanning turli hududlarida istiqomat qiluvchi nogironligi boʻlgan shaxslarga hurmat-ehtirom koʻrsatiladi.

“Bir miskin koʻngilni shod etish – Kaʼbatullohni ziyorat qilish bilan barobar”, deydi dono xalqimiz. Haqiqatan ham salgina mehr va eʼtibordan qalblari bir olam shodlikka toʻluvchi nogironligi boʻlgan insonlarning quvonchlariga sherik boʻlish, orzu-intilishlarini ragʻbatlantirish, ularning muammolarini hal etishga koʻmaklashish, haq-huquqlarini himoya qilish har bir sogʻlom insonning burchidir.

Xalq deputatlari Amudaryo tuman Kengashi deputati Xonimjon Rajabova Xalqaro nogironlar kuni arafasida Mangʻit shahrining Boyovul mahallasida istiqomat qiluvchi nogironligi boʻlgan fuqarolar bilan uchrashdi va oʻzining deputatlik vakolati doirasida ularning muammolarini oʻrganib, orzu-intilishlarini ragʻbatlantirish maqsadida dildan suhbat oʻtkazdi.

Deputat mahallada yashovchi 1992-yilda tugʻilgan II guruh nogironi Inobat Karimova, Bahor koʻchasida istiqomat qiluvchi, 1977-yilda tugʻilgan I guruh nogironi Salomat Kazakova, Qilichboy koʻchasida yashovchi, II guruh nogironlari, 1988-yilda tugʻilgan Ravshan Atabayev va 1992-yilda tugʻilgan Shoira Yerlapasova hamda 1996-yilda tugʻilgan Yulduz Gabdulxabirovalar bilan uchrashib, ularga bayram munosabati bilan shaxsiy sovgʻalarini topshirdi.

Nogironligi boʻlgan fuqarolar orasida shunday insonlar ham borki, sogʻlom odamlarga nisbatan ularning imkoniyatlari cheklangan boʻlsalar-da. alohida qobiliyatlari bilan ajralib turishadi. Boyovul mahallasida ham bunday iqtidor egalari talaygina. Ulardan biri – I guruh nogironi Salomat Kazakova sheʼriyat, adabiyot shaydosi. U “men nogironman”, deb oʻzining koʻnglini oʻzi choʻktirmadi. Oʻz ustida tinimsiz ishlab, biri-biridan dilbar sheʼrlar, hayotiy hikoyalar yozdi. Yozganlari tuman va respublika miqyosidagi gazetalarda yoritilib, davriy nashrlar orqali keng ommaga tarqatilganida, uni har doim ijod qilishga undagan ustozlari – “Taraqqiyot koʻzgusi” gazetasi tahririyati ijodkorlarining ishonchini oqlashga intildi. Salomatning turli davriy nashrlarda chop etilgan ijod namunalari moʻʼjaz bir kitob boʻlgulik.

Xonimjon Rajabova Boyovul mahallasida istiqomat qiluvchi nogironligi boʻlgan fuqarolar bilan uchrashuvida dildan, samimiy muloqot qilish orqali ularning har biriga maʼnaviy kuch va bayramona kayfiyat bagʻishladi.

Robiya Yoʻldosheva.