Ҳоким ва ёшлар учрашуви бўлиб ўтди

Амударё туманининг Тошёп ОФЙ биносида ҳоким ва ёшлар учрашуви бўлиб ўтди. Учрашувда туман ҳокими Собир Хўжаметов, туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов, Ёшлар ишлари агентлиги туман бўлими масъуллари, ОФЙ “еттиллиги”, ҳудуд ёшлар етакчилари ҳамда ёшлар иштирок этдилар.

Учрашувда туман ҳокими Собир Хўжаметов сўнгги йилларда ёшлар сиёсатида амалга оширилаётган туб ислоҳотлар хусусида тўхталиб ўтди. Таъкидланганидек, бугунги кунда мамлакатимизда ёшларнинг ҳуқуқ ва манфаатларини таъминлаш, уларнинг билим олиши, меҳнат қилиши, ўз қобилият ва истеъдодини рўёбга чиқариши учун барча шароитларни яратиш давлат сиёсати даражасига кўтарилди. Ўтган давр мобайнида ёшларни қўллаб-қувватлашга қаратилган, улар ҳаётига бевосита тааллуқли бўлган қонун, фармон ва қарорлар қабул қилингани мамлакатимизда мустақил фикрлайдиган, замонавий билим ва касб-ҳунарларни пухта эгаллаб, халқаро майдонда рақобатга кириша оладиган баркамол шахсларни тарбиялашга ҳуқуқий замин бўлиб хизмат қилмоқда.

Тошёп ОФЙ биносида ташкил этилган учрашув мобайнида туман ҳокими Собир Хўжаметов ёшларнинг қизиқишлари, келажакдаги мақсадлари, муаммо ва таклифлари хусусида яқиндан суҳбатлашди. Ёшларимиз томонидан берилган таклиф ва саволларнинг бир қисми жойида ижобий ечим топган бўлса, яна бир қисми тегишли ташкилотларга йўналтирилиб, ижроси назоратга олинди.

Учрашувда ёшлар томонидан турли муаммоли масалалар юзасидан мурожаатлар келиб тушди. Хусусан, олий ўқув юртида ўқиш учун шартнома пулини тўлашда амалий ёрдам бериш, ўз-ўзини банд қилиш ҳамда тадбиркорлик фаолиятини бошлаш учун кредит ажратилишида, субсидия асосида тикув машинаси олишда амалий ёрдам бериш каби масалалар юзасидан қатор мурожаатлар қабул қилинди. Мурожаатлардаги масалаларнинг аксарияти учрашув жараёнида ижобий ечимини топди. Очиқ мулоқот тарзида ўтказилган учрашувда ёшлар турли йўналишлар бўйича ўзларини қизиқтирган саволларга тегишли жавоблар олдилар.

Таъкидлаш жоизки, ёшларга берилаётган эътибор, уларга давлат томонидан кўрсатилаётган ғамхўрлик миқёси йилдан-йилга кенгайиб бормоқда. Раҳбарларнинг ҳудудларга бориб ёшлар муаммоларини ўрганиши ҳам ана шундай эътибор намунаси десак, муболаға бўлмайди. Дарҳақиқат, ёшларнинг ҳуқуқ ва манфаатларини ҳимоя қилиш, таълим олиши, ижтимоий ва тиббий ҳимояси, уй-жойли бўлиши, бандлиги учун шарт-шароитлар яратиш ёшларга оид давлат сиёсатининг устувор йўналишлари сифатида қаралмоқда.

Шунингдек, бугунги кунда ёшларга мактаб ва олий таълим соҳасида билим олишга, замонавий касб-ҳунар эгаллашга, маданият ва спорт йўналишларида ўз иқтидорини намоён этишга, турли йўналишларда ўз тадбиркорлик фаолиятини юритишга яратилган шароитлар натижасида ёшлар томонидан кўплаб соҳаларда янги марралар забт этилмоқда. Юртимиз ёшлари яратилаётган имкониятлардан унумли фойдаланиб, турли соҳаларда қатор ютуқларни қўлга киритмоқдалар. Ўзбекистонлик ёшлар қатор халқаро фан олимпиадаларида кўплаб олтин, кумуш, бронза медалларнинг соҳиб ва соҳибалари бўлишмоқда. Ёш спортчиларимиз эса халқаро мусобақаларда муваффақиятли иштирок этиб, Ватанимиз байроғини кўкларга кўтармоқдалар.

Қайд этиш жоизки, бутун мамалкатимиз бўйлаб ҳудудларда раҳбарларнинг ёшлар билан учрашувларини ташкил этиш, кўплаб ёшларнинг муаммоларини жойида тизимли ҳал этилишига, бўш вақтларини мазмунли ўтказиш учун янги чора-тадбирлар ишлаб чиқилишига ҳамда бандлиги таъминланишига замин яратмоқда. Тош ёп овулида ўтказилган ҳоким ва ёшлар учрашуви ҳам унда иштирок этган, муаммолари ижобий ҳал қилинган ёшлар ҳаётига ўзгаришлар олиб киргани билан аҳамиятли бўлди.

Чарос Арслонова, туман ҳокимлигининг Ахборот хизмати раҳбари.