Hokim va yoshlar uchrashuvi boʻlib oʻtdi

Amudaryo tumanining Toshyop OFY binosida hokim va yoshlar uchrashuvi boʻlib oʻtdi. Uchrashuvda tuman hokimi Sobir Xoʻjametov, tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, Yoshlar ishlari agentligi tuman boʻlimi masʼullari, OFY “yettilligi”, hudud yoshlar yetakchilari hamda yoshlar ishtirok etdilar.

Uchrashuvda tuman hokimi Sobir Xoʻjametov soʻnggi yillarda yoshlar siyosatida amalga oshirilayotgan tub islohotlar xususida toʻxtalib oʻtdi. Taʼkidlanganidek, bugungi kunda mamlakatimizda yoshlarning huquq va manfaatlarini taʼminlash, ularning bilim olishi, mehnat qilishi, oʻz qobiliyat va isteʼdodini roʻyobga chiqarishi uchun barcha sharoitlarni yaratish davlat siyosati darajasiga koʻtarildi. Oʻtgan davr mobaynida yoshlarni qoʻllab-quvvatlashga qaratilgan, ular hayotiga bevosita taalluqli boʻlgan qonun, farmon va qarorlar qabul qilingani mamlakatimizda mustaqil fikrlaydigan, zamonaviy bilim va kasb-hunarlarni puxta egallab, xalqaro maydonda raqobatga kirisha oladigan barkamol shaxslarni tarbiyalashga huquqiy zamin boʻlib xizmat qilmoqda.

Toshyop OFY binosida tashkil etilgan uchrashuv mobaynida tuman hokimi Sobir Xoʻjametov yoshlarning qiziqishlari, kelajakdagi maqsadlari, muammo va takliflari xususida yaqindan suhbatlashdi. Yoshlarimiz tomonidan berilgan taklif va savollarning bir qismi joyida ijobiy yechim topgan boʻlsa, yana bir qismi tegishli tashkilotlarga yoʻnaltirilib, ijrosi nazoratga olindi.

Uchrashuvda yoshlar tomonidan turli muammoli masalalar yuzasidan murojaatlar kelib tushdi. Xususan, oliy oʻquv yurtida oʻqish uchun shartnoma pulini toʻlashda amaliy yordam berish, oʻz-oʻzini band qilish hamda tadbirkorlik faoliyatini boshlash uchun kredit ajratilishida, subsidiya asosida tikuv mashinasi olishda amaliy yordam berish kabi masalalar yuzasidan qator murojaatlar qabul qilindi. Murojaatlardagi masalalarning aksariyati uchrashuv jarayonida ijobiy yechimini topdi. Ochiq muloqot tarzida oʻtkazilgan uchrashuvda yoshlar turli yoʻnalishlar boʻyicha oʻzlarini qiziqtirgan savollarga tegishli javoblar oldilar.

Taʼkidlash joizki, yoshlarga berilayotgan eʼtibor, ularga davlat tomonidan koʻrsatilayotgan gʻamxoʻrlik miqyosi yildan-yilga kengayib bormoqda. Rahbarlarning hududlarga borib yoshlar muammolarini oʻrganishi ham ana shunday eʼtibor namunasi desak, mubolagʻa boʻlmaydi. Darhaqiqat, yoshlarning huquq va manfaatlarini himoya qilish, taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish yoshlarga oid davlat siyosatining ustuvor yoʻnalishlari sifatida qaralmoqda.

Shuningdek, bugungi kunda yoshlarga maktab va oliy taʼlim sohasida bilim olishga, zamonaviy kasb-hunar egallashga, madaniyat va sport yoʻnalishlarida oʻz iqtidorini namoyon etishga, turli yoʻnalishlarda oʻz tadbirkorlik faoliyatini yuritishga yaratilgan sharoitlar natijasida yoshlar tomonidan koʻplab sohalarda yangi marralar zabt etilmoqda. Yurtimiz yoshlari yaratilayotgan imkoniyatlardan unumli foydalanib, turli sohalarda qator yutuqlarni qoʻlga kiritmoqdalar. Oʻzbekistonlik yoshlar qator xalqaro fan olimpiadalarida koʻplab oltin, kumush, bronza medallarning sohib va sohibalari boʻlishmoqda. Yosh sportchilarimiz esa xalqaro musobaqalarda muvaffaqiyatli ishtirok etib, Vatanimiz bayrogʻini koʻklarga koʻtarmoqdalar.

Qayd etish joizki, butun mamalkatimiz boʻylab hududlarda rahbarlarning yoshlar bilan uchrashuvlarini tashkil etish, koʻplab yoshlarning muammolarini joyida tizimli hal etilishiga, boʻsh vaqtlarini mazmunli oʻtkazish uchun yangi chora-tadbirlar ishlab chiqilishiga hamda bandligi taʼminlanishiga zamin yaratmoqda. Tosh yop ovulida oʻtkazilgan hokim va yoshlar uchrashuvi ham unda ishtirok etgan, muammolari ijobiy hal qilingan yoshlar hayotiga oʻzgarishlar olib kirgani bilan ahamiyatli boʻldi.

Charos Arslonova, tuman hokimligining Axborot xizmati rahbari.