Халқ депутатлари Амударё туман Кенгашининг 74-сессияси тўғрисида АХБОРОТ
2024 йил 30 май куни Амударё тумани ҳокимлигининг мажлислар залида Халқ депутатлари туман Кенгашининг 74-сессияси бўлиб ўтди.
Сессияда туман ҳокими Собир Хўжаметов, секторлар раҳбарлари, ҳоким ўринбосарлари, ҳокимлик масъул ходимлари, қишлоқ хўжалигига хизмат кўрсатувчи ташкилотлар ҳамда фермер хўжаликлари раҳбарлари, оммавий ахборот воситалари вакиллари иштирок этди.
Сессияни халқ депутатлари туман Кенгаши раисининг ўринбосари Ғуломжон Ешниёзов очди ва олиб борди. Сессия котиблигига 13-Қиличбой сайлов округидан депутат Баҳром Қодиров сайланди.
Сессия кун тартибидаги дастлабки масала юзасидан Амударё тумани қишлоқ хўжалиги бўлими бошлиғи Қудрат Абдикаликов ҳисобот берди. Ҳисоботда 2024 йил ҳосили учун туман бўйича 353 та фермер хўжаликлари томонидан 16 минг 154 гектар майдонга чигит, 313 та фермер хўжаликлари томонидан 5 минг 630 гектар майдонга ғалла экилиб, агротехника қоидалари асосида парвариш қилинаётгани таъкидланди.
Ҳукуматнинг тегишли қарорлари билан туманда 2024 йил ҳосили учун қишлоқ хўжалиги экинлари оқилона жойлаштирилган ва аксарият фермер хўжаликлари шу асосида экин экиб, ер ва сувдан унумли фойдаланишмоқда. Лекин баъзи фермер хўжаликлари томонидан тегишли қарор талаблари бузилиб, сувни кўп талаб қиладиган, жойлаштиришда кўрсатилмаган шоли экинини экиш ҳолатлари ҳам кузатилмоқда. Жумладан туман бўйича 96 та фермер хўжаликларида жами 533,5 гектар майдонларга режасиз шоли экилганлиги аниқланган.
Ушбу масала юзасидан Агросаноат мажмуаси устидан назорат қилиш инспекцияси туман бўлими бошлиғи Сарвар Матякубов, туман Ирригация бўлими бошлиғи Шукрулло Юсупов, туман ҳокимининг қишлоқ ва сув хўжалиги масалалари бўйича ўринбосари Анвар Йўлдошевлар сўзга чиқиб, мониторинг натижасида аниқланган режасиз экилган шоли сувнинг меъёридан ортиқ истеъмол қилинишига, бошқа ҳудудларга сув етиб бормаслигига сабаб бўлаётганини таъкидлашди.
Сессия кун тартибидаги навбатдаги масала юзасидан туман Фермер, деҳқон хўжаликлари ва томорқа ер эгалари кенгаши раиси Илҳом Палванов ахборот берди. Депутатлар Хитой овули ҳудудидан туман ер заҳира фонди ҳисобидан умумий майдони 10 гектар бўлган ерни очиқ электрон танловга чиқариш таклифига розилик билдирдилар.
Кун тартибидаги сўнгги масала юзасидан Давлат кадастрлари палатаси Амударё тумани филиали бошлиғи Шерзод Султанов сўзга чиқиб, Президентимизнинг 2023 йил 28 июль кунги фармонида кўрсатилган шартларни бажарган фуқароларга тегишли бўлган ер участкаларига ижара ҳуқуқи ҳамда бино ва иншоотларга мулк ҳуқуқини эътироф этиш бўйича Кенгашга таклиф киритди. Таклиф депутатлар томонидан маъқулланди.
Сессия сўнгида туман ҳокими Собир Хўжаметов сўзга чиқиб, тумандаги фермер хўжаликлари раҳбарларига ердан ва сув ресурсларидан оқилона, қонунга мувофиқ фойдаланиш бўйича мурожаат қилди. Тегишли ташкилотларнинг тақдимномаларидан кейин аксарият фермер хўжаликлари шоли майдонларини бузиб, ушбу майдонларга бошқа қишлоқ хўжалиги экинларини эккани, қолган фермер хўжаликлари раҳбарлари ҳам 2 кунлик муҳлат ичида шоли майдонларини бузиб, ердан ва сувдан ўзбошимчалик билан фойдаланиш ҳолатига барҳам бериши лозимлиги таъкидланди.
Ушбу таклиф депутатлар томонидан маъқулланди ва 2 кунлик муҳлатда топшириқни бажармаган фермер хўжаликлари билан тузилган ер ижара шартномасини бир томонлама бекор қилиб, ер майдонини туман ҳокимлиги захира ер фонди ҳисобига қайтариб олиш масаласи кўриб чиқилиши бўйича тегишли фермер хўжаликлари раҳбарлари қатъий огоҳлантирилди.
Сессия кун тартибига киритилган барча масалалар атрофлича кўриб чиқилиб, фаол муҳокамалардан кейин барча масалалар бўйича тегишли қарорлар қабул қилинди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
