“Ҳамшира–2024” кўрик-танловининг республика босқичида юқори натижаларни қайд этган ҳамширалар туман Тиббиёт бирлашмаси томонидан тақдирланди

Ўрта тиббиёт ходимлари соғлиқни сақлаш соҳасининг таянчи ва суянчи, десак муболаға бўлмайди. Одамлар ҳамшира деганда, беморларни парвариш қилувчи, хушмуомала, қўли енгил, билим ва малакаси шифокорлардан қолишмайдиган жонкуяр инсонни тасаввур қилади. Шу сабабли ҳам юртимизда ҳамшираларнинг мавқеини ошириш, меҳнатини қадрлаш ва рағбатлантириш масалаларига катта эътибор қаратилмоқда. Шу мақсадда турли танловлар ўтказилиб, илғор ҳамширалар мукофотланмоқда. Ҳар йили анъанавий тарзда ўтказиб келинаётган “Ҳамшира” кўрик-танлови ҳам шулар жумласидандир.

Бу йил ҳам Тошкент шаҳрида 12-май – Халқаро ҳамширалар куни муносабати билан ўтказилган тантанали тадбирда “Ҳамшира–2024” кўрик-танловининг республика босқичи ғолиблари аниқланди ва муносиб тақдирланди. Беллашувнинг ҳудудий босқичларида биринчи ўринни қўлга киритган 15 нафар соҳа ходимлари орасидан шаффоф ва адолатли шарт ва мезонлар асосида саралаб олинган уч нафар ҳамширага махсус мукофотлар тақдим этилди.

Танловнинг туман ва Қорақалпоғистон Республикаси босқичларида ғолибликни қўлга киритган Амударё туман Тиббиёт бирлашмасининг Жарроҳлик бўлими навбатчи ҳамшираси Қозоқбоева Ҳулкар Музаффар қизи мамлакат миқёсидаги босқичда фахрли 2-ўринни эгаллади.   
Шунингдек, Амударё туман тиббиёт бирлашмасининг яна бир жонкуяр ходими Санобар Аҳмедова ҳам “Ҳамшира–2024” кўрик-танловда “Йилнинг энг яхши муолажа ва эмлаш ҳамшираси” номинацияси бўйича Ўзбекистон миқёсида 3-ўрин соҳибаси бўлди.

Туман Тиббиёт бирлашмасида ўтказилган тадбирда кўрик-танловда юқори натижаларга эришган ҳамширалар Ҳулкар Қозоқбоева ҳамда Санобар Аҳмедова, шунингдек, Тиббиёт бирлашмасининг бош ҳамшираси Луиза Янгибоевалар раҳбарият томонидан фахрий ёрлиқ, ташаккурнома ва эсдалик совғалари билан тақдирланди.

Ҳулкар Қозоқбоева 1998 йилда Амударё туманининг Чойкул овулида туғилган. Болаликдан тиббиёт соҳасига қизиққан Ҳулкар 2016 йилда 1-сонли Нукус тиббиёт коллежини “Умумий амалиёт ҳамшираси” мутахассислиги бўйича муваффақиятли тугатган. 2018 йилдан бугунги кунга қадар Туман тиббиёт бирлашмасининг Жарроҳлик бўлимида навбатчи ҳамшира вазифасида ишлаб келмоқда.

Ҳулкар Қозоқбоева 2021 йилда “Замонавий жарроҳликда ҳамширалик иши” сикли бўйича ўз малакасини оширган. 2022 йилда Қорақалпоғистон Республикаси Соғлиқни сақлаш вазирлигининг буйруғи билан ҳамшира мутахассислиги бўйича 2-малака тоифасини, Иннавоцион соғлиқни салаш миллий палатаси раисининг буйруғи билан 1-малака тоифасини олган.

У соғликни сақлаш тизмида олиб борилаётган ислоҳатлар ва яратилаётган имкониятларнинг туманимиздаги фаол тарғиботчиси ҳам саналади. Касбининг фидокор ҳамшираси беморларнинг дардига малҳам бўлиб келмоқда.

Ҳулкар Қозоқбоева ўз ишининг билимдони, жонкуяр ва ташаббсукор ходим. Фаолияти давомида шифокор тамонидан берилган ҳар бир тиббий топшириқни сидқидилдан бажариб, тизимнинг қоида-меъёрларига қатъий амал қилиб, намунали меҳнат қилиб келмоқда. У беморлар орасида юқумли ва ўта хавфли касалликларнинг олдини олиш, аҳоли ҳаётида соғлом турмуш тарзини шакллантириш ишларида ҳам фаол ходим саналади.

Соҳага доир илмий журналларда Ҳулкар Қозоқбоеванинг қатор мақолалари нашр қилинган. Термиз давлат педогогика институтида бўлиб ўтган “Таълим тизимида психологик хизматнинг замонавий тенденциялари: назария ва амалиёт” номли конференцияда “Мактаб ёшидаги болаларда учрайдиган руҳий-эмоционал муаммоларга психологик ёндашув” номли мақоласи билан иштирок этди.

Шунингдек, Таълимни ривожлантириш таҳлилий онлайн журналида мақоласи хорижий тилда эълон қилинди.

“Ҳамшира–2024” кўрик-танловда “Йилнинг энг яхши муолажа ва эмлаш ҳамшираси” номинацияси бўйича Ўзбекистон миқёсида 3-ўрин соҳибаси бўлган туман тиббиёт бирлашмасининг яна бир жонкуяр ходими Санобар Аҳмедова 1985 йилда Амударё тумани Манғит шаҳрида туғилган. У Тошкент тиббиёт коллежини “Ҳамширалик иши” мутахассислиги бўйича 2005 йилда муваффақиятли тугатган.

Санобар Аҳмедова Амударё туман тиббиёт бирлашмасида 2012 йилдан 2017 йилга қадар туғруқхона бўлими чақалоқлар хонаси хамшираси, 2017 йилдан 2020 йилга қадар эмлаш хонаси хамшираси, 2020 йилдан бугунга қадар эса туғруқ комплекси чақалоқлар хонаси ҳамшираси вазифасида ишлаб келмоқда.

У 2021 йилда Республика ўрта тиббиёт ва доришунос ходимлар малакасини ошириш ва ихтисослаштириш маркази Нукус филиалида “Неонтология ҳамширалик иши” мутахассислиги бўйича малакасини оширган.

2022-йилда Қорақалпоғистон Республикаси Соғликни сақлаш вазирлиги ўрта тиббиёт ходимларига тоифа бериш аттестацияси комиссиясидан муваффақиятли ўтиб, Инновацион соғлиқни сақлаш миллий палатаси раисининг буйруғи билан ҳамширалик иши мутахассислиги бўйича олий тоифали ҳамшира сертификатига эга бўлди. Кўп йиллик самарали меҳнати, билим ва тажрибаси билан тиббиёт ходимлари орасида ўз ўрнига эга бўлган ҳамшира беморларга сиринсўзлиги, меҳрибонлиги билан намули хизмат кўрсатиб келмоқда.

Ўз устида тинимсиз шуғулланиб, мунтазам равишда малака ошириш курсларида тажрибасини ошириб келаётган Санобар Аҳмедова ҳар бир ишни сидқидилдан бажариши, ўзига ва атрофдагиларга талабчанлиги билан меҳнат жамоасида катта ҳурмат қозонган.

Халқ саломатлиги йўлида фидокорана хизмат қилаётган шифокор ва ҳамшираларнинг, барча тиббиёт ходимларининг меҳнати таҳсинга сазовор. Уларнинг келгусидаги ишларига омад ва зафарлар тилаб, халқ саломатлиги йўлида хизмат қилишдан асло чарчаманг, деймиз.

Луиза Янгибоева, ТТБ бош ҳамшираси