“Hamshira–2024” koʻrik-tanlovining respublika bosqichida yuqori natijalarni qayd etgan hamshiralar tuman Tibbiyot birlashmasi tomonidan taqdirlandi

Oʻrta tibbiyot xodimlari sogʻliqni saqlash sohasining tayanchi va suyanchi, desak mubolagʻa boʻlmaydi. Odamlar hamshira deganda, bemorlarni parvarish qiluvchi, xushmuomala, qoʻli yengil, bilim va malakasi shifokorlardan qolishmaydigan jonkuyar insonni tasavvur qiladi. Shu sababli ham yurtimizda hamshiralarning mavqeini oshirish, mehnatini qadrlash va ragʻbatlantirish masalalariga katta eʼtibor qaratilmoqda. Shu maqsadda turli tanlovlar oʻtkazilib, ilgʻor hamshiralar mukofotlanmoqda. Har yili anʼanaviy tarzda oʻtkazib kelinayotgan “Hamshira” koʻrik-tanlovi ham shular jumlasidandir.

Bu yil ham Toshkent shahrida 12-may – Xalqaro hamshiralar kuni munosabati bilan oʻtkazilgan tantanali tadbirda “Hamshira–2024” koʻrik-tanlovining respublika bosqichi gʻoliblari aniqlandi va munosib taqdirlandi. Bellashuvning hududiy bosqichlarida birinchi oʻrinni qoʻlga kiritgan 15 nafar soha xodimlari orasidan shaffof va adolatli shart va mezonlar asosida saralab olingan uch nafar hamshiraga maxsus mukofotlar taqdim etildi.

Tanlovning tuman va Qoraqalpogʻiston Respublikasi bosqichlarida gʻoliblikni qoʻlga kiritgan Amudaryo tuman Tibbiyot birlashmasining Jarrohlik boʻlimi navbatchi hamshirasi Qozoqboyeva Hulkar Muzaffar qizi mamlakat miqyosidagi bosqichda faxrli 2-oʻrinni egalladi.   
Shuningdek, Amudaryo tuman tibbiyot birlashmasining yana bir jonkuyar xodimi Sanobar Ahmedova ham “Hamshira–2024” koʻrik-tanlovda “Yilning eng yaxshi muolaja va emlash hamshirasi” nominatsiyasi boʻyicha Oʻzbekiston miqyosida 3-oʻrin sohibasi boʻldi.

Tuman Tibbiyot birlashmasida oʻtkazilgan tadbirda koʻrik-tanlovda yuqori natijalarga erishgan hamshiralar Hulkar Qozoqboyeva hamda Sanobar Ahmedova, shuningdek, Tibbiyot birlashmasining bosh hamshirasi Luiza Yangiboyevalar rahbariyat tomonidan faxriy yorliq, tashakkurnoma va esdalik sovgʻalari bilan taqdirlandi.

Hulkar Qozoqboyeva 1998-yilda Amudaryo tumanining Choykul ovulida tugʻilgan. Bolalikdan tibbiyot sohasiga qiziqqan Hulkar 2016-yilda 1-sonli Nukus tibbiyot kollejini “Umumiy amaliyot hamshirasi” mutaxassisligi boʻyicha muvaffaqiyatli tugatgan. 2018-yildan bugungi kunga qadar Tuman tibbiyot birlashmasining Jarrohlik boʻlimida navbatchi hamshira vazifasida ishlab kelmoqda.

Hulkar Qozoqboyeva 2021-yilda “Zamonaviy jarrohlikda hamshiralik ishi” sikli boʻyicha oʻz malakasini oshirgan. 2022-yilda Qoraqalpogʻiston Respublikasi Sogʻliqni saqlash vazirligining buyrugʻi bilan hamshira mutaxassisligi boʻyicha 2-malaka toifasini, Innavotsion sogʻliqni salash milliy palatasi raisining buyrugʻi bilan 1-malaka toifasini olgan.

U sogʻlikni saqlash tizmida olib borilayotgan islohatlar va yaratilayotgan imkoniyatlarning tumanimizdagi faol targʻibotchisi ham sanaladi. Kasbining fidokor hamshirasi bemorlarning dardiga malham boʻlib kelmoqda.

Hulkar Qozoqboyeva oʻz ishining bilimdoni, jonkuyar va tashabbsukor xodim. Faoliyati davomida shifokor tamonidan berilgan har bir tibbiy topshiriqni sidqidildan bajarib, tizimning qoida-meʼyorlariga qatʼiy amal qilib, namunali mehnat qilib kelmoqda. U bemorlar orasida yuqumli va oʻta xavfli kasalliklarning oldini olish, aholi hayotida sogʻlom turmush tarzini shakllantirish ishlarida ham faol xodim sanaladi.

Sohaga doir ilmiy jurnallarda Hulkar Qozoqboyevaning qator maqolalari nashr qilingan. Termiz davlat pedogogika institutida boʻlib oʻtgan “Taʼlim tizimida psixologik xizmatning zamonaviy tendentsiyalari: nazariya va amaliyot” nomli konferentsiyada “Maktab yoshidagi bolalarda uchraydigan ruhiy-emotsional muammolarga psixologik yondashuv” nomli maqolasi bilan ishtirok etdi.

Shuningdek, Taʼlimni rivojlantirish tahliliy onlayn jurnalida maqolasi xorijiy tilda eʼlon qilindi.

“Hamshira–2024” koʻrik-tanlovda “Yilning eng yaxshi muolaja va emlash hamshirasi” nominatsiyasi boʻyicha Oʻzbekiston miqyosida 3-oʻrin sohibasi boʻlgan tuman tibbiyot birlashmasining yana bir jonkuyar xodimi Sanobar Ahmedova 1985-yilda Amudaryo tumani Mangʻit shahrida tugʻilgan. U Toshkent tibbiyot kollejini “Hamshiralik ishi” mutaxassisligi boʻyicha 2005-yilda muvaffaqiyatli tugatgan.

Sanobar Ahmedova Amudaryo tuman tibbiyot birlashmasida 2012-yildan 2017-yilga qadar tugʻruqxona boʻlimi chaqaloqlar xonasi xamshirasi, 2017-yildan 2020-yilga qadar emlash xonasi xamshirasi, 2020-yildan bugunga qadar esa tugʻruq kompleksi chaqaloqlar xonasi hamshirasi vazifasida ishlab kelmoqda.

U 2021-yilda Respublika oʻrta tibbiyot va dorishunos xodimlar malakasini oshirish va ixtisoslashtirish markazi Nukus filialida “Neontologiya hamshiralik ishi” mutaxassisligi boʻyicha malakasini oshirgan.

2022-yilda Qoraqalpogʻiston Respublikasi Sogʻlikni saqlash vazirligi oʻrta tibbiyot xodimlariga toifa berish attestatsiyasi komissiyasidan muvaffaqiyatli oʻtib, Innovatsion sogʻliqni saqlash milliy palatasi raisining buyrugʻi bilan hamshiralik ishi mutaxassisligi boʻyicha oliy toifali hamshira sertifikatiga ega boʻldi. Koʻp yillik samarali mehnati, bilim va tajribasi bilan tibbiyot xodimlari orasida oʻz oʻrniga ega boʻlgan hamshira bemorlarga sirinsoʻzligi, mehribonligi bilan namuli xizmat koʻrsatib kelmoqda.

Oʻz ustida tinimsiz shugʻullanib, muntazam ravishda malaka oshirish kurslarida tajribasini oshirib kelayotgan Sanobar Ahmedova har bir ishni sidqidildan bajarishi, oʻziga va atrofdagilarga talabchanligi bilan mehnat jamoasida katta hurmat qozongan.

Xalq salomatligi yoʻlida fidokorana xizmat qilayotgan shifokor va hamshiralarning, barcha tibbiyot xodimlarining mehnati tahsinga sazovor. Ularning kelgusidagi ishlariga omad va zafarlar tilab, xalq salomatligi yoʻlida xizmat qilishdan aslo charchamang, deymiz.

Luiza Yangiboyeva, TTB bosh hamshirasi