Амир Темур номли овулда туман ҳокимининг сайёр қабули ўтказилди

Аҳоли мурожаатларини қабул қилиш ва улар билан тизимли равишда ишлаш, халқ билан яқиндан мулоқот қилишда сайёр қабуллар муҳим аҳамиятга эга. Бу жараёнлар фуқароларнинг давлат органлари билан бевосита алоқасини таъминлайди ва уларнинг муаммолари ва таклифларини тўғридан-тўғри масъул ташкилотларга етказиш имконини беради. Шунингдек, сайёр қабуллар жойларда ишларнинг ҳақиқий аҳволини ўрганиш ҳамда халқ билан бевосита мулоқотнинг сифат жиҳатдан янги ва самарали шаклларини жорий этиш имконини бериши билан ҳам аҳамиятлидир.

Бу тизимда амалга оширилаётган ислоҳотлар мамлакатда давлат органларининг аҳоли билан мулоқотини янада такомиллаштириш ва фуқаролар ҳуқуқ ҳамда эркинликларининг ишончли ҳимоясини таъминлашга қаратилгандир.

Туманда тасдиқланган жадваллар асосида ҳоким ва секторлар раҳбарларининг сайёр қабуллари мунтазам равишда ўтказиб келинмоқда. Яқинда туманнинг Амир Темур номли овул фуқаролар йиғини биносида туман ҳокими Собир Хўжаметовнинг сайёр қабули бўлиб ўтди.

Сайёр қабулда туман ҳокими Собир Хўжаметов, 2-сектор раҳбари, туман прокурори Азиз Рўзметов, туман ҳокими ўринбосари Нодир Камолов, тумандаги муассаса, корхона ва ташкилотлар раҳбарлари, маҳалла фаоллари ва кенг жамоатчилик вакиллари иштирок этди.

Айтиш жоизки, аҳоли муаммолари билан ишлашда мурожаатларни қабул қилиш тизимининг самарадорлиги ва шаффофлиги, шунингдек, жойларда мурожаатларнинг ўз вақтида ижобий ҳал этилиши муҳимдир. Бу эса фуқароларнинг давлат идораларига бўлган ишончини оширади ва уларнинг муаммоларини ҳал қилишда самарали механизмларни яратади. Шу билан бирга, муаммоларни маҳалланинг ёки ҳудудларнинг ўзида ҳал қилиш ва уларнинг келиб чиқиш сабабларини бартараф этиш бўйича қатъий чоралар кўрилишига имкон яратади. Амир Темур номли овул аҳли билан ўтказилган сайёр қабул ҳам ана шундай мақсадларга хизмат қилади.

Сайёр қабулда фуқаролардан асосан кундалик маиший муаммолар ва инфратузилмалар ҳолатига доир мурожаатлар келиб тушди. Овул аҳли истеъмолчиларни электр энергияси билан узлуксиз таъминлаш, ички йўлларни таъмирлаш, моддий ёрдам ажратиш, иш билан таъминлаш каби масалаларда туман ҳокимига мурожаат қилдилар.

Сайёр қабулда аҳолининг бошқа масалалар бўйича ҳам мурожаатлари тингланиб, қабулда иштирок этаётган тегишли масъулларга мурожаатларни ўз вақтида, имкон қадар ижобий ҳал қилиш бўйича кўрсатмалар берилди.

Айтиш жоизки, Президентимизнинг 2019 йил 2 апрель кунги “Аҳоли муаммолари билан ишлашда маҳалла институтининг мавқеини тубдан ошириш чора-тадбирлари тўғрисида”ги фармонига асосан мурожаатлар билан ишлаш, аҳоли муаммоларини аниқлаш ва ҳал этиш бўйича “маҳалла – сектор – Халқ қабулхонаси – маҳалла” принципи асосида ҳамкорлик тизими жорий қилинган. Мазкур тизимнинг асосий мақсади ҳудудларни комплекс ижтимоий-иқтисодий ривожлантириш, уйма-уй юриш, ижтимоий ва бошқа объектларни ўрганиш орқали муаммоларни аниқлаш ва ҳамкорликда бартараф этиш чораларини кўриш, таъсирчан жамоатчилик назоратини ўрнатишдан иборатдир.

Ушбу фармон асосида жорий қилинган янги тизимга мувофиқ бу каби сайёр қабуллар туманнинг барча овул ва маҳаллаларида, тасдиқланган жадвал асосида ўтказилмоқда. Туман ҳокими ва секторлар раҳбарлари бошчилигида тегишли ҳудудларда ўтказилаётган сайёр қабуллар фуқаролар ва ҳукумат ўртасидаги мулоқотни кучайтириш ва муаммоларни самарали ҳал этишда муҳим аҳамият касб этмоқда.