Amir Temur nomli ovulda tuman hokimining sayyor qabuli oʻtkazildi

Aholi murojaatlarini qabul qilish va ular bilan tizimli ravishda ishlash, xalq bilan yaqindan muloqot qilishda sayyor qabullar muhim ahamiyatga ega. Bu jarayonlar fuqarolarning davlat organlari bilan bevosita aloqasini taʼminlaydi va ularning muammolari va takliflarini toʻgʻridan-toʻgʻri masʼul tashkilotlarga yetkazish imkonini beradi. Shuningdek, sayyor qabullar joylarda ishlarning haqiqiy ahvolini oʻrganish hamda xalq bilan bevosita muloqotning sifat jihatdan yangi va samarali shakllarini joriy etish imkonini berishi bilan ham ahamiyatlidir.

Bu tizimda amalga oshirilayotgan islohotlar mamlakatda davlat organlarining aholi bilan muloqotini yanada takomillashtirish va fuqarolar huquq hamda erkinliklarining ishonchli himoyasini taʼminlashga qaratilgandir.

Tumanda tasdiqlangan jadvallar asosida hokim va sektorlar rahbarlarining sayyor qabullari muntazam ravishda oʻtkazib kelinmoqda. Yaqinda tumanning Amir Temur nomli ovul fuqarolar yigʻini binosida tuman hokimi Sobir Xoʻjametovning sayyor qabuli boʻlib oʻtdi.

Sayyor qabulda tuman hokimi Sobir Xoʻjametov, 2-sektor rahbari, tuman prokurori Aziz Roʻzmetov, tuman hokimi oʻrinbosari Nodir Kamolov, tumandagi muassasa, korxona va tashkilotlar rahbarlari, mahalla faollari va keng jamoatchilik vakillari ishtirok etdi.

Aytish joizki, aholi muammolari bilan ishlashda murojaatlarni qabul qilish tizimining samaradorligi va shaffofligi, shuningdek, joylarda murojaatlarning oʻz vaqtida ijobiy hal etilishi muhimdir. Bu esa fuqarolarning davlat idoralariga boʻlgan ishonchini oshiradi va ularning muammolarini hal qilishda samarali mexanizmlarni yaratadi. Shu bilan birga, muammolarni mahallaning yoki hududlarning oʻzida hal qilish va ularning kelib chiqish sabablarini bartaraf etish boʻyicha qatʼiy choralar koʻrilishiga imkon yaratadi. Amir Temur nomli ovul ahli bilan oʻtkazilgan sayyor qabul ham ana shunday maqsadlarga xizmat qiladi.

Sayyor qabulda fuqarolardan asosan kundalik maishiy muammolar va infratuzilmalar holatiga doir murojaatlar kelib tushdi. Ovul ahli isteʼmolchilarni elektr energiyasi bilan uzluksiz taʼminlash, ichki yoʻllarni taʼmirlash, moddiy yordam ajratish, ish bilan taʼminlash kabi masalalarda tuman hokimiga murojaat qildilar.

Sayyor qabulda aholining boshqa masalalar boʻyicha ham murojaatlari tinglanib, qabulda ishtirok etayotgan tegishli masʼullarga murojaatlarni oʻz vaqtida, imkon qadar ijobiy hal qilish boʻyicha koʻrsatmalar berildi.

Aytish joizki, Prezidentimizning 2019-yil 2-aprel kungi “Aholi muammolari bilan ishlashda mahalla institutining mavqeini tubdan oshirish chora-tadbirlari toʻgʻrisida”gi farmoniga asosan murojaatlar bilan ishlash, aholi muammolarini aniqlash va hal etish boʻyicha “mahalla – sektor – Xalq qabulxonasi – mahalla” printsipi asosida hamkorlik tizimi joriy qilingan. Mazkur tizimning asosiy maqsadi hududlarni kompleks ijtimoiy-iqtisodiy rivojlantirish, uyma-uy yurish, ijtimoiy va boshqa obʼektlarni oʻrganish orqali muammolarni aniqlash va hamkorlikda bartaraf etish choralarini koʻrish, taʼsirchan jamoatchilik nazoratini oʻrnatishdan iboratdir.

Ushbu farmon asosida joriy qilingan yangi tizimga muvofiq bu kabi sayyor qabullar tumanning barcha ovul va mahallalarida, tasdiqlangan jadval asosida oʻtkazilmoqda. Tuman hokimi va sektorlar rahbarlari boshchiligida tegishli hududlarda oʻtkazilayotgan sayyor qabullar fuqarolar va hukumat oʻrtasidagi muloqotni kuchaytirish va muammolarni samarali hal etishda muhim ahamiyat kasb etmoqda.