“ҲУНАРМАНД” УЮШМАСИНИНГ АМУДАРЁ ТУМАНИ БЎЛИМИ ТОМОНИДАН ЁШЛАРГА КАСБ-ҲУНАР ЎРГАТИЛМОҚДА

Жуда қадим замонларда ҳам ҳозирда мамлакатимиз ҳудудида яшовчи халқлар орасида ҳунармандчилик яхши ривожланган. Айниқса, ўзбек миллий ҳунармандчилиги маҳсулотлари – қўлда тўқилган гилам, ранг-баранг гуллар билан безатилган чойшаб ва сочиқлар, ёстиқ ва кўрпа жилдлари, сўзана ва палаклар қардош халқларни ўзига жалб этиб келган. Халқ ҳунармандчилигининг нодир намуналари асрлар оша бетакрор жозибаси билан дунё миқёсидаги кўргазмалар ва тарихий музейлар залларини безаб, миллионлаб инсонларга ҳайрат бағишлагани, айни пайтда, юксак даражада тараққий этган техника асрида ҳам қадр-қимматини йўқотмагани халқ ҳунармандчилиги маҳсулотларининг ҳар бир инсон қалбига яқинлигидан.

Бугунги кунда Қорақалпоғистон Республикасида ҳунармандчилик билан шуғулланаётган “Ҳунарманд” уюшмасининг аъзолари сони 4 316 нафарни ташкил этади. Шундан уста-ҳунармандлар сони 1 035 нафар, шогирдлар сони эса 3 281 нафарни ташкил этади.

Қорақалпоғистон Республикасида Ҳунармандчиликнинг 43та йўналишидан 29та йўналиши мавжуд бўлиб, шулардан бугунги кунда ҳудудимизда гул босилган газламалар ва чокли буюмлар, металлардан буюмлар ясаш, ёғочдан тайёрланган халқ ҳунармандчилиги маҳсулотларини тайёрлаш, миллий либослар тайёрлаш, муаллифлик мебелларини тайёрлаш, тунукадан буюмлар тайёрлаш, мусиқа асбобларини тайёрлаш, эсдалик буюмларини тайёрлаш, қўлда гилам тўқиш, каштачилик ҳамда бош кийимлар тайёрлаш йўналишлари ривожланган.

“Ҳунаманд” уюшмасининг мақсади Ўзбекистон Республикаси ҳудудида халқ ҳунармандчилиги анъаналари асосида фаолият юритаётган ҳунармандлар фаолиятларини мувофиқлаштириш, ўзаро ҳамкорлик ва эркин рақобат муҳитини яратиш, уларнинг қонуний ҳуқуқ ва манфаатларини ҳимоя қилишдан иборат.

“Ҳунарманд” уюшмаси аъзолари бўлган уста ҳунармандлар томонидан устоз-шогирд” анъаналари асосида ишсиз хотин-қизларга ва ёшларга мунтазам равишда турли ҳунарлари ўргатиб келинмоқда.

Жорий йилнинг 12 февраль кунидан бошлаб Қорақалпоғистон Республикаси Прокуратураси ташаббуси билан, “Ҳунарманд” уюшмаси Қорақалпоғистон Республикаси бошқармаси, “Тадбиркор аёл” халқаро ишбилармон аёллар ассоциацияси Қорақалпоғистон Республикаси ҳудудий бўлими, Амударё туман ҳокимлиги ҳамда Ўзбекистон Республикаси Ёшлар ишлари агентлиги Амударё тумани бўлими ҳамкорлигида тумандаги ҳунар ўрганиш, тадбиркорлик фаолиятини йўлга қўйиш ҳамда кенгайтириш истагида бўлган хотин-қизлар ва ёшлар бизнес тренинг курсларида касб-ҳунарга ўқитилди.

Шунингдек, ўқув курсларида ҳунармандчиликнинг қуроқчилик, қўлда гилам тўқиш, оддий металлардан ясалган тақинчоқлар, тикувчилик йўналишлари бўйича бизнес режани ишлаш, уни қандай қилиб амалга ошириш бўйича семинар тренинг ўтказилди.

Амударё туманида ҳозирги вақтда ҳунармандчилик субъектлари сони 141та бўлиб, шундан 45 нафари уста-ҳунармандлар, 96 нафари эса шогирдлар ҳисобланади.

Эндиликда, ушбу ўқув курсларида таҳсил олган хотин-қизлар ва ёшлар ўз тадбиркорлигини йўлга қўйиш орқали даромад топишига ҳамда туманда тадбиркорлар сонининг ошишига ҳам туртки бўлади.

Равшан Баҳромов.