7-СОНЛИ МТТДА БОЛАЖОНЛАР УЧУН БАРЧА ШАРОИТЛАР ЯРАТИЛГАН

Сўнгги йилларда мамлакатимизда ёш авлод таълим-тарбиясига кўрсатилаётган эътибор туфайли мактабгача таълим ташкилотларига болаларни қамраб олиш, уларга замон талаблари даражасида таълим-тарбия бериш сифати яхшиланиб, фарзандларини МТТларга бериш истагидаги ота-оналар сафи ҳам ошиб бормоқда. Буни давлат ва нодавлат мактабгача таълим ташкилотларида амалга оширилаётган кенг қамровли маънавий-маърифий тарбиявий ишларда яққол кўриш мумкин.

Амударё туманидаги Дўстлик маҳалла фуқаролар йиғини ҳудудида жойлашган 7-сонли мактабгача таълим ташкилоти 2010 йилда, Амударё тумани ҳокимининг қарори асосида ташкил этилиб, муассаса дастлаб “Роҳат” болалар боғчаси мақомида фаолият олиб борди. Аҳолининг ўсиб бораётган талаб ва эҳтиёжларига мувофиқ болалар муассасаси 2018 йилда реконструкция қилиниб, қайта жиҳозланди. 70 ўринга мўлжалланган мактабгача таълим ташкилоти атрофи тўлиқ иҳоталаниб, ободонлаштирилди ва 2-қаватли кўркам бино Дўстлик маҳалласида истиқомат қилувчи оилаларнинг жажжи болажонларини ўз бағрига олди.

Айни пайтда мазкур мактабгача таълим ташкилотида 195 нафар болажонлар замонавий педтехнологиялар талаблари асосида тарбияланишмоқда. Учта асосий гуруҳнинг ҳар бирида 30 нафардан 90 нафар, 2та қисқа муддатли гуруҳларнинг ҳар бирида 40 нафар, битта мажбурий гуруҳда 20 нафар болага ўз касбининг моҳир билимдонлари бўлган тарбиячи-педагог ходимлар таълим-тарбия беришмоқда.

МТТда фаолият олиб борувчи 36 нафар ходимнинг 6 нафари олий, 2 нафари тугалланмаган олий маълумотга эга мутахассислар бўлиб, қолган барча ходимлар ўрта махсус маълумотга эга. МТТ ходимларининг босқичма-босқич малакаларини ошириб боришларига қаратилаётган эътибор туфайли, таълим-тарбия сифати ошиб, МТТ тарбияланувчилари мактаб таълимига йўналтирилгач, умумтаълим фанларини ҳеч қийинчиликсиз ўзлаштириб олишга эришмоқдалар. Чунки болажонларнинг бу борада муассасада зарур кўникмаларга эга бўлишлари учун барча шарт-шароитлар яратилган.

Хусусан, ота-оналарнинг талаб ва истаклари, қолаверса, болажонларнинг қизиқиш ва интилишлари инобатга олинган ҳолда ташкил этилган ментал арифметика, рус тили, шахмат, шашка тўгараклари машғулотлари кичкинтойларнинг интеллектуал ривожланишлари, дунёқарашлари кенгайишида муҳим омил бўлмоқда.

Муассаса ҳузуридаги тиббий хизмат бўлими томонидан болажонларнинг саломатлиги доимий равишда назорат қилиб борилади. Уларнинг мусиқа ва спорт билан шуғулланишларини рағбатлантириб боришга мўлжалланган машғулотлар замонавий спорт ва мусиқа хоналарида амалга оширилади. Муассаса ҳовлисидаги барча қулайликларга эга болалар майдончасида ва ёзги айвон, спорт майдончасида ҳаво иссиқ ва мўътадил бўлган кунларда кичкинтойлар мириқиб ўйнашади.

Муассаса ҳудудида барпо этилган омборхонада озиқ-овқат маҳсулотлари сифатли сақланади ва болажонлар МТТ пазандалари томонидан тайёрланган таомларни севиб истеъмол қилишади.

Мактабгача таълим ташкилоти соҳа вазирлигининг қарорига кўра, ҳар бир гуруҳга мос жиҳозлар, болалар дунёқараши ва интеллектуал салоҳиятини оширишга хизмат қилувчи ўйинчоқлар, телевизор билан жиҳозланган. Бу эса ҳар бир болани ёшига мос равишда қизиқарли машғулотлар билан қамраб олиш имконини яратди.

Муассаса тарбияланувчиларини она Ватанга, атрофимиздаги оламга меҳр-муҳаббат руҳида тарбиялаш, айниқса, улар онгида табиатни севиш, яшил оламни янада бойитиш туйғусини шакллантиришга қаратилган машғулотлар, табиат бағрида ўтказиладиган суҳбатлар муҳим аҳамият касб этмоқда. Болажонлар учун тарбиячи опалари билан муассаса ҳудудидаги экинзорлар, гулзорда сайр этиш, дов-дарахтларнинг инсон ҳаётидаги аҳамияти ҳақидаги эртакларни тинглаш жуда қизиқарли. Айниқса, дидактик ўйинлар уларга завқ-шавқ бағишлайди.

Муассаса ходимлари эса жажжи болажонларга қувонч ва шодлик улашиб яшашга ўзларини ҳамиша бурчли деб биладилар.

Робия ЙЎЛДОШЕВА.