7-SONLI MTTDA BOLAJONLAR UChUN BARChA ShAROITLAR YaRATILGAN

Soʻnggi yillarda mamlakatimizda yosh avlod taʼlim-tarbiyasiga koʻrsatilayotgan eʼtibor tufayli maktabgacha taʼlim tashkilotlariga bolalarni qamrab olish, ularga zamon talablari darajasida taʼlim-tarbiya berish sifati yaxshilanib, farzandlarini MTTlarga berish istagidagi ota-onalar safi ham oshib bormoqda. Buni davlat va nodavlat maktabgacha taʼlim tashkilotlarida amalga oshirilayotgan keng qamrovli maʼnaviy-maʼrifiy tarbiyaviy ishlarda yaqqol koʻrish mumkin.

Amudaryo tumanidagi Doʻstlik mahalla fuqarolar yigʻini hududida joylashgan 7-sonli maktabgacha taʼlim tashkiloti 2010-yilda, Amudaryo tumani hokimining qarori asosida tashkil etilib, muassasa dastlab “Rohat” bolalar bogʻchasi maqomida faoliyat olib bordi. Aholining oʻsib borayotgan talab va ehtiyojlariga muvofiq bolalar muassasasi 2018-yilda rekonstruktsiya qilinib, qayta jihozlandi. 70-oʻringa moʻljallangan maktabgacha taʼlim tashkiloti atrofi toʻliq ihotalanib, obodonlashtirildi va 2-qavatli koʻrkam bino Doʻstlik mahallasida istiqomat qiluvchi oilalarning jajji bolajonlarini oʻz bagʻriga oldi.

Ayni paytda mazkur maktabgacha taʼlim tashkilotida 195 nafar bolajonlar zamonaviy pedtexnologiyalar talablari asosida tarbiyalanishmoqda. Uchta asosiy guruhning har birida 30 nafardan 90 nafar, 2ta qisqa muddatli guruhlarning har birida 40 nafar, bitta majburiy guruhda 20 nafar bolaga oʻz kasbining mohir bilimdonlari boʻlgan tarbiyachi-pedagog xodimlar taʼlim-tarbiya berishmoqda.

MTTda faoliyat olib boruvchi 36 nafar xodimning 6 nafari oliy, 2 nafari tugallanmagan oliy maʼlumotga ega mutaxassislar boʻlib, qolgan barcha xodimlar oʻrta maxsus maʼlumotga ega. MTT xodimlarining bosqichma-bosqich malakalarini oshirib borishlariga qaratilayotgan eʼtibor tufayli, taʼlim-tarbiya sifati oshib, MTT tarbiyalanuvchilari maktab taʼlimiga yoʻnaltirilgach, umumtaʼlim fanlarini hech qiyinchiliksiz oʻzlashtirib olishga erishmoqdalar. Chunki bolajonlarning bu borada muassasada zarur koʻnikmalarga ega boʻlishlari uchun barcha shart-sharoitlar yaratilgan.

Xususan, ota-onalarning talab va istaklari, qolaversa, bolajonlarning qiziqish va intilishlari inobatga olingan holda tashkil etilgan mental arifmetika, rus tili, shaxmat, shashka toʻgaraklari mashgʻulotlari kichkintoylarning intellektual rivojlanishlari, dunyoqarashlari kengayishida muhim omil boʻlmoqda.

Muassasa huzuridagi tibbiy xizmat boʻlimi tomonidan bolajonlarning salomatligi doimiy ravishda nazorat qilib boriladi. Ularning musiqa va sport bilan shugʻullanishlarini ragʻbatlantirib borishga moʻljallangan mashgʻulotlar zamonaviy sport va musiqa xonalarida amalga oshiriladi. Muassasa hovlisidagi barcha qulayliklarga ega bolalar maydonchasida va yozgi ayvon, sport maydonchasida havo issiq va moʻʼtadil boʻlgan kunlarda kichkintoylar miriqib oʻynashadi.

Muassasa hududida barpo etilgan omborxonada oziq-ovqat mahsulotlari sifatli saqlanadi va bolajonlar MTT pazandalari tomonidan tayyorlangan taomlarni sevib isteʼmol qilishadi.

Maktabgacha taʼlim tashkiloti soha vazirligining qaroriga koʻra, har bir guruhga mos jihozlar, bolalar dunyoqarashi va intellektual salohiyatini oshirishga xizmat qiluvchi oʻyinchoqlar, televizor bilan jihozlangan. Bu esa har bir bolani yoshiga mos ravishda qiziqarli mashgʻulotlar bilan qamrab olish imkonini yaratdi.

Muassasa tarbiyalanuvchilarini ona Vatanga, atrofimizdagi olamga mehr-muhabbat ruhida tarbiyalash, ayniqsa, ular ongida tabiatni sevish, yashil olamni yanada boyitish tuygʻusini shakllantirishga qaratilgan mashgʻulotlar, tabiat bagʻrida oʻtkaziladigan suhbatlar muhim ahamiyat kasb etmoqda. Bolajonlar uchun tarbiyachi opalari bilan muassasa hududidagi ekinzorlar, gulzorda sayr etish, dov-daraxtlarning inson hayotidagi ahamiyati haqidagi ertaklarni tinglash juda qiziqarli. Ayniqsa, didaktik oʻyinlar ularga zavq-shavq bagʻishlaydi.

Muassasa xodimlari esa jajji bolajonlarga quvonch va shodlik ulashib yashashga oʻzlarini hamisha burchli deb biladilar.

Robiya YOʻLDOShEVA.