Бокс бўйича ҳоким соврини учун мусобақаларда амударёлик спортчилар умумжамоа ҳисобида 1-ўринни эгаллашди

Мамлакатимизда аҳолини спорт билан шуғулланишга фаол жалб қилиш, ёшларнинг жисмоний тарбия ва спортга бўлган қизиқишларини янада ошириш борасида амалий ишлар қилинмоқда. Зеро, аҳоли, айниқса ёшларнинг соғлом турмуш кечиришида спорт ва жисмоний-тарбиянинг аҳамияти беқиёсдир. Спортни янада ривожлантириш, келажак эгаларининг ҳар хил спорт турларига қизиқишларини ошириш борасида олиб борилаётган тизимли ишлар натижасида юртимизни дунёга танитаётган етук спортчилар етишиб келмоқда.

Амударё туманида спортни ривожлантириш, болалар ва ўсмирларни спортга қизиқтириш жисмоний тарбия ва спорт билан шуғулланишга жалб қилиш, Республика босқичига олиб чиқиш мақсадида спортнинг бокс тури бўйича ҳоким соврини учун мусобақалари ўтказилди.

Жорий йилнинг 15-19 февраль кунлари туман Спорт мактабининг 1-филиалида бўлиб ўтган мусобақаларда 2011-2012 йилларда туғилган болалар ва ўсмирлар иштирок этдилар.

Мусобақаларда республикамизнинг турли ҳудудларидан келган боксчи ёшлар қатнашдилар. Хусусан, Жиззах вилояти Пахтакор тумани, Хоразм вилояти Хива шаҳри, Гурлан тумани, Қорақалпоғистон Республикасининг Қўнғирот, Хўжайли, Тахиятош туманлари ҳамда Амударё тумани болалар ва ўсмирлар жамоалари иштирок этдилар.

Мусобақаларда 13 та вазн тоифаси бўйича, ҳар вазн тоифасидан бир нафардан спортчи, 1 нафар мураббий ва бир нафар ҳакам қатнашди.

4 кун мобайнида бўлиб ўтган беллашувлар муросасиз ва баҳсларга бой тарзда ўтди. Спортчилар бор куч ва имкониятларини ишга солдилар, ғолибликни қўлга киритиш учун астойдил ҳаракат қилдилар.

Айтиш жоизки, ҳоким соврини учун мусобақалар бокс спорт турини мактаб ўқувчилари ва аҳоли ўртасида оммавийлаштириш, жойларда турли ёш гуруҳидаги аҳоли ўртасида бокс бўйича тайёргарлик даражасини аниқлаш, туман терма жамоларини шакллантириш мақсадида мазкур спорт тури бўйича энг кучлиларни аниқлаш, мураббий ва ҳакамларнинг малакасини, масъулиятини ошириш каби устувор мақсадларга йўналтирилган.

Шу ўринда қайд этиш жоизки, мамлакатимизда ёшларнинг боксга бўлган оммавий қизиқишини инобатга олиб, иқтидорли спортчиларни аниқлаш, танлаш ва саралаш тизимини янада такомиллаштириш, соҳа мутахассисларини тайёрлаш ва уларнинг моддий рағбатлантирилишини яхшилаш, шунингдек, ўзбек боксининг дунёдаги етакчилигини сақлаб қолиш ва давом эттириш мақсадида имзоланган Ўзбекистон Республикаси Президентининг “Боксни янада ривожлантириш чора-тадбирлари тўғрисида”ги қарори соҳани янада такмиллаштиришда муҳим дастуруламал бўлиб хизмат қилмоқда.

Мазкур қарор боксни аҳоли ўртасида энг оммавий спорт турларидан бирига айлантириш, иқтидорли спортчиларни аниқлаш, танлаш ва саралаш ҳамда уларни профессионал спортчилар сифатида тайёрлашнинг янги тизимини йўлга қўйиш, бокс инфратузилмасини янада ривожлантириш ҳамда халқаро талабларга мослаштириш, бокс мактабларини, шу жумладан, давлат-хусусий шериклик шартлари асосида кўпайтириш мақсадида қабул қилинган. Қарор билан бокс бўйича профессионал тренерлар ва ҳакамларни тайёрлаш тизимини ривожлантириш, ўқув-услубий қўлланмалар ишлаб чиқиш, илмий-методологик базани янада кучайтириш каби боксни ривожлантиришнинг асосий йўналишлари белгилаб берилган. Соҳа масъуллари томонидан ушбу вазифалар ижроси юзасидан самарали ишлар олиб борилмоқда.

19 февраль куни бокс бўйича ҳоким соврини мусобақаларининг финал босқичи якунланди ҳамда ғолибларни тақдирлаш маросими бўлиб ўтди. Муросасиз кечган баҳсларда энг кучли спортчилар ғолиблар сафидан жой олдилар.

Тақдирлаш маросимида туман ҳокими ўринбосари Нодир Камолов, туман Спорт мактаби директори Чаршам Тажимуратов, Ўзбекистон Республикаси бокс Федерацияси Қорақалпоғистон бўлими бош мураббийи Рашид Саитов, туман Мудофаа бўлими бошлиғи Шерзод Муродовлар сўзга чиқиб, мусобақада иштирок этган барча спортчиларга келгуси спорт мусобақаларида омадлар ва муваффақиятлар тиладилар. Уларнинг ота-оналари ва мураббийларига миннатдорчилик билдирдилар.

Шундан сўнг беллашувлардаги баҳсларда 13 та вазн тоифасида ғолиблар ва совриндорлар туман ҳокимлиги ва ташкилотчилар томонидан қимматбаҳо совғалар билан тақдирландилар.

Финал босқичи якуний натижаларига кўра 7 та вазн тоифаси бўйича баҳсларда амударёлик боксчилар умумжамоа ҳисобида фахрли биринчи ўринни эгалладилар. 2 та вазн тоифасида Нукус шаҳри спортчилари, 2 та вазн тоифасида Гурлан тумани спортчилари, 1 вазн тоифасида Хива шаҳри, 1 вазн тоифасида Қўнғирот тумани спортчилари ғолибликни қўлга киритдилар.

Ташкилотчилар томонидан 1-, 2-, 3-ўринларни эгаллаган ғолибларга олтин, кумуш ва бронза медаллари, диплом ва эсдалик совғалари топширилди.

Таъкидлаш жоизки, спортни ривожлантириш йўлида амалга оширилаётган бу каби амалий ишлар ёшларни миллий ғоя ва ватанпарварлик руҳида тарбиялаш, болалар ва ўсмирлар қалбига ва онгига Ватан ҳимояси шарафли, муқаддас бурч эканлигини чуқур сингдириш ва ёшларни ватанпарварликка ундашда муҳим восита бўлиб хизмат қилади.

Чарос Арслонова, туман ҳокимлигининг Ахборот хизмати раҳбари.