ХАЛҚҚА МАДАНИЙ ХИЗМАТ КЎРСАТИШ СИФАТИ ЯХШИЛАНМОҚДА

Инсоният ҳаётида алоҳида ўрин тутадиган  маданият ва санъатнинг миллат тараққиёти, ривожи йўлидаги ҳиссаси беқиёс. Азал-азалдан санъат ва маданият бутун халқ, қолаверса, ёш авлод қалбида миллий ва умумбашарий қадриятларга ҳурмат, юртга муҳаббат ва садоқат туйғуларини мустаҳкамлашда ўзига хос таъсир кучига эга бўлиб келган.

Айтиш жоизки, мамлакатимизда сўнгги йилларда мазкур соҳани ривожлантириш борасида ҳукуматимиз томонидан  кенг қамровли  ислоҳотлар олиб борилмоқда. Соҳага қаратилаётган улкан эътибордан  руҳланган туман Маданият бўлими ва ҳудудлардаги Марказларда фаолият юритаётган ходимлар маданий байрам тадбирларининг чуқур ғоявий мазмун билан бойитилишини  таъминлаб, халқимизга сифатли хизмат кўрсатиб келмоқда.

Бугунги кунда туман Маданият бўлими тасарруфида 7та  ҳудудий  маданият  марказлари фаолият олиб бормоқда. Уларда жами 91 нафар ходимлар  аҳолига маданий хизмат кўрсатиш сифатини  яхшилаш,  уларнинг  маданий эҳтиёжларини қондириш ва бўш вақтлари мазмунли ўтишини таъминлаш бўйича  салмоқли  ишларни  амалга оширмоқда.

Хусусан, Ўзбекистон Республикаси Президентининг 2022 йил 2 февраль кунги “Маданият ва санъат соҳасини янада ривожлантиришга оид қўшимча чора-тадбирлар тўғрисида”ги Қарорида белгиланган вазифалар асосида туманимизнинг олис ҳудудларида “Учқун” ашула ва рақс халқ ансамбли жамоаси, “Офарин” фольклор-этнографик халқ жамоаси, “Жайҳун мўъжизаси” анъанавий цирк халқ жамоалари аҳолининг мазмунли дам олишини ташкил этишга қаратилган тадбирларни  амалга оширдилар.

Туман Маданият бўлими тасарруфидаги 7та маданият  марказларида жами 240 нафар ёшлар 9та йўналиш бўйича санъат сирларини ўрганмоқдалар. 

Шунингдек, ёш авлодни маданият ва санъатга кенг жалб этиш, уларнинг бўш вақтларини мазмунли ўтказиш мақсадида  қўшимча 12та тўгараклар фаолияти  йўлга қўйилди. Хусусан, мақом, назм ва наср, саҳна цирки, овоз ёзиш студияси, рақс, бадиий ўқиш, бахшичилик, эстрада ва масхарабозлик, компьютер саводхонлиги каби тўгаракларда ёшларимиз  ўзлари танлаган йўналишларни пухта ўрганиб,  Республика миқёсида ўтказилаётган танловларда муносиб қатнашиб келишмоқда.

Туман Маданият бўлимининг оммавий-маданий календарь режаси бўйича  аҳолига  шу кунгача  538та тадбирлар намойиш  этилди.

Жорий йилнинг 23 декабрь куни Нукус шаҳридаги Қорақалпоғистон санъат саройида Қорақалпоғистон Республикаси Маданият вазирлиги томонидан ташкил этилган «Алғыс-2023» йилнинг энг фаолларини тақдирлаш маросимида туман Маданият маркази «Йил давомида самарали фаолият юритган маданият маркази» номинацияси соҳиби бўлди ҳамда эсдалик совғаларини қўлга киритди. 

Маданият бўлими меҳнат жамоаси миллий маданиятимиз  ва санъатимизни янада бойитиб, ёш авлод онгига сингдиришга, байрам ва бошқа муҳим саналарда халққа хизмат қилиб, кўтаринкилик бағишлашга, юксак натижалар, юқори кўрсаткичларга эришишга ҳаракат қилмоқда.

Икромжон Сийтимов,

туман Маданият бўлими мудири.