Қорақалпоқ тили байрами куни муносабати билан байрам тадбири ўтказилди
Тил – ҳар бир миллатнинг улкан бойлиги, беназир қадрияти ва бебаҳо мулки ҳисобланади. Ҳар бир халқ, ҳар бир элат, ўзи ҳурмат ва эҳтиром қиладиган тилга эга. Тилда ана шу тилнинг ижодкори бўлган халқ, элатнинг тарихи ва маданияти акс этади. Айни замонда, тил ижтимоий тараққиётда улуғвор аҳамият касб этади. Тил – ҳар бир миллат ўзлигининг ажралмас белгисидир.
1989 йил 1 декабрь — Қорақалпоғистон Республикаси тарихидаги муҳим саналардан биридир. Шу куни қорақалпоқ тилига давлат тили мақоми берилган. Ҳар йили бу сана кенг нишонланиб келинади.
Ушбу сана муносабати билан 1 декабрь куни Амударё тумани Маданият бўлимида “Мәртебең бәлент болсын, ана тилим” деб номланган тадбир бўлиб ўтди.
Тадбирда туман ҳокимининг ўринбосари – инвестициялар ва ташқи савдо бўлими бошлиғи Фахриддин Юсупов, Давлат тили тўғрисидаги қонун ҳужжатларига риоя этилишини таъминлаш масалалари бўйича туман ҳокими маслаҳатчиси Аширбой Қўшаев, тумандаги умумтаълим мактабларнинг бир гуруҳ қорақалпоқ тили ва адабиёти фани ўқитувчилари ҳамда ўқувчилар иштирок этдилар.
Тадбир бошида Ўзбекистон ва Қорақалпоғистон Республикаларининг давлат мадҳиялари янгради. Сўнгра туман ҳокимининг ўринбосари – инвестициялар ва ташқи савдо бўлими бошлиғи Фахриддин Юсупов сўзга чиқиб, байрам тадбирини очиб берди ҳамда йиғилган тадбир иштирокчиларини қорақалпоқ тилига давлат тили мақоми берилган кун билан табриклади.
Таъкидланганидек, тил – бу халқнинг тарихини, маданий меросини, турмуш тарзини, урф-одат ва анъаналарини ўзида мужассам этган бебаҳо хазинадир. Шу боис ҳам сўнгги йилларда юртимизда қорақалпоқ тилини асраб-авайлашга, уни янада бойитишга давлат сиёсати даражасида эътибор қаратилмоқда.
Хусусан, қатор илмий ҳамда бадиий китобларнинг қорақалпоқ тилидаги таржималари нашр этилгани, қорақалпоқ тилининг тозалигини сақлашда муҳим ўрин тутадиган лотин имлосидаги “Қорақалпоқ тилининг орфографик луғати” чоп этилгани қорақалпоқ тилига бўлган юксак эътибор ва ғамхўрлик ифодасидир.
Қорақалпоқ тилига давлат тили мақоми берилган кун муносабати билан туман бўйлаб таълим муассасалари, овул ва маҳаллаларда байрам тадбирлари, учрашувлар, адабий кечалар ва турли кўрик-танловлар ўтказилаётгани ҳам юксак эҳтиромнинг ёрин намунасидир.
Байрам тадбири давомида кўп йиллик тажрибага эга қорақалпоқ тили ўқитувчилари ҳам сўзга чиқиб, қорақалпоқ тилини асраб-авайлаш, унинг нуфузини ошириш, ривожлантириш мамлакат тараққиётининг муҳим омили ҳисобланишини, шу жиҳатдан қорақалпоқ тилининг давлат тили сифатидаги мақомини мустаҳкамлаш йўлида кенг кўламли ишлар амалга оширилаётгани ҳақида айтиб ўтдилар.
Қорақалпоқ халқининг атоқли адиблари, ёзувчи ва шоирлари номидаги ижод мактабларида бугун ёшлар бебаҳо бойлик саналмиш қорақалпоқ тили ва миллий адабиётнинг сир-асрорларини ўрганмоқда. Буларнинг барчаси қорақалпоқ халқининг маънавий бойлиги бўлган она тили тараққиётига юксак эътибор самарасидир.
Тадбирда мактаб ўқувчилари қорақалпоқ адабиёти намуналаридан шеърларни ифодали ўқиб, йиғилганларнинг олқишларига сазовор бўлдилар. Қорақалпоқ халқининг миллий урф-одат ва анъаналарини ўзида мужассам этган саҳна кўринишлари намойиш этилиб, миллий куй-қўшиқлар янгради.
Туман Маданият бўлими томонидан тайёрланган концерт дастури давомида қорақалпоқ халқининг тарихини, миллий қадриятларини, урф-одат ва дастурларини ўзида мужассам этган рақслар билан байрам тадбири кўтаринки руҳда давом этди.
Севара Исмоилова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
