ОНА ТИЛИ – БУ МИЛЛАТНИНГ РУҲИДИР...
Тил – давлат тимсоли, мулки, руҳи, миллатнинг маданий ва маънавий бойлиги, халқнинг маданияти, урф-одати, унинг турмуш тарзи, тарихидир.
Тил – инсонларнинг ўзаро алоқа воситаси бўлиб, яратувчининг инсонга берган бебаҳо неъматидир. Миллатларни миллатлардан ажратиб турувчи асосий белгилардан бири ҳам тилдир. Дунёда ҳар бир халқнинг ўз тили унинг бебаҳо бойлиги, ифтихори, нажоти ҳисобланади. Ҳикматли сўзлар, шеър-у достонлар, қўшиқлар аввало бирор бир миллатнинг она тилида дунёга келади. Миллат бор экан, унинг тили ҳам яшайди, тили яшар экан, у миллат бошқа миллатлар орасида ўз нуфузи, обрўсига эга бўлади.
Ҳар бир халққа ўз тили азиз ва ардоқли. Шўролар даврида рус тили иттифоқ тили сифатида ривожлантирилди. У жаҳон тиллари даражасига кўтарилди. Айниқса, кўп минг асрлик тарихга эга бўлган туркий халқлар ҳам ўз она тиллари дунёдаги ҳеч бир халқнинг тилидан кам эмаслигини ёқлаб чиқдилар. Бу йўлдаги турли хил тўсиқларни писанд этмадилар.
Мустақиллик арафасида кўча-кўй тили даражасига тушиб қолган ўзбек тилига давлат тили мақомини бериш ҳақидаги таклиф ва курашлар самарасиз кетмади. Шўролар даврида ҳам ўзбек тилини тиклашга, уни Давлат тилига айлантиришга интилиш кучли бўлган. Хусусан, она тилига бағишланган турли тадбирлар ўтказишга ҳаракат қилинган. Бундай тадбирлар айниқса, мустақиллик арафасида тез-тез ўтказила бошланган. Шу тариқа халқнинг қилган ҳаракатлари, зиёли олимларнинг ташаббуслари бесамар кетмади, ўзбек халқи ҳам ўзбек тилига давлат тили мақоми берилишига эришди. Бу буюк иш айнан 1989 йил 21 октябрь санасида амалга оширилди ҳамда шу сана тарихга “Ўзбек тилига давлат тили мақоми берилган кун”, дея муҳрланди. Иш ҳужжатлари давлат тилида олиб борила бошланди, бу эса халқнинг руҳини кўтарди. Шу тариқа бу кунни қарийб 31 йил “Ўзбек тилига Давлат тили мақоми берилган кун” сифатида нишонлаб келдик. 2020 йили эса “Ўзбек тили байрами кунини белгилаш тўғрисида” 2020 йил 10 апрелда қабул қилинган Ўзбекистон Республикаси Қонунининг 1-моддаси билан 21 октябрь санаси Ўзбек тили байрами куни этиб белгиланди. Bu эса ўзбек тилига бўлган эътиборнинг яна бир ёрқин ифодаси, десак муболаға бўлмайди. Mana шу кундан эътиборан Республикамизнинг барча ҳудудларида Тил байрами кенг нишонланиб келинмоқда. Bu куннинг шукуҳи октябр ойи кириб келиши билан бошланади. Турли хил тадбирлар, танловлар ташкил этилади Шу куни радио ва телевидение орқали тил байрамига доир қизиқарли чиқишлар уюштирилади, ўзбек миллати руҳини кўтарувчи куй ва қўшиқлар тараннум этилади.
Тил байрами инсонни она тилига ва ўз халқига бўлган меҳр-муҳаббатини жўш урдирувчи бетакрор байрамдир. Ўзбек тилининг халқаро миқёсдаги обрў-эътиборини юксалтириш учун уни миллий ва умумбашарий тушунчалар асосида тараққий этган тиллар сафига киритишда ўз ҳиссамизни қўшишимиз ҳар биримиз тилимизга чуқур ҳурмат билан ёндашиш зиммамиздаги масъулиятли бурч деб билишимиз даркор. Барча ўзбек халқини “Ўзбек тили байрами”нинг 34 йиллик тантанаси билан самимий муборакбод этаман.
Муҳайё Каримова, 36-мактабнинг она тили ва адабиёт фани ўқитувчиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
