Тадбиркорлик фаолияти – қонун ҳимоясида
Ўзбекистон Республикаси Президентининг 2023 йил 18 август куни тадбиркорлар билан ўтказилган очиқ мулоқоти доирасида тадбиркорлардан келиб тушган қарийб 6 мингта мурожаатда кўтарилган тизимли муаммоларнинг ечимига қаратилган таклиф ва ташаббусларни амалга ошириш мақсадида бир қатор чора-тадбирлар белгилаб ўтилди ва ушбу чора-тадбирлари Ўзбекистон Республикаси Президентининг 2023 йил 4 сентябрь кунги ПҚ-292-сонли қарори билан мустаҳкамланди. Ушбу қарорга мувофиқ кичик бизнесга янги имкониятлар яратиш; ўрта бизнесни барқарор иқтисодий ўсиш гаровига айлантириш; янги бозорларга сифатли ва рақобатбардош маҳсулот билан кириш; юқори даромадли корхоналарни кўпайтириш; содда солиқ маъмуриятчилиги ва бюрократиядан холи қулай муҳит яратиш йўналишларни ўз ичига олган Ўзбекистон Республикаси Президентининг тадбиркорлар билан 2023 йилдаги очиқ мулоқотида белгиланган вазифаларни амалга ошириш бўйича «йўл харитаси» тасдиқланди.
Содда солиқ маъмуриятчилиги ва бюрократиядан холи қулай муҳит яратиш йўналиши бўйича бир қатор чора тадбирлар белгиланиб, бунда қўшилган қиймат солиғининг салбий суммаси ўрнини қоплашда (қайтаришда) солиқ узилиши (tax gap) коэффициентини қўллаш амалиёти тақиқланиши; қўшилган қиймат солиғи бўйича махсус рўйхатдан ўтказилганлиги тўғрисидаги гувоҳноманинг амал қилишини тўхтатиб туриш тартиби бекор қилиниши (бундан амалга оширилаётган битимлар (операциялар) харид қилинаётган ва реализация қилинаётган товарлар (хизматлар) номенклатурасига номувофиқ бўлган ҳолатлар мустасно); фойда солиғи бўйича ҳар ой бўнак тўловларини тўлаши лозим бўлган тадбиркорлик субъектлари даромадининг чегаравий миқдори 5 миллиард сўмдан 10 миллиард сўмга оширилиши кўрсатилди;
2024 йил 1 январдан бошлаб иқтисодий судлар томонидан солиқ органлари иштирокида кўрилаётган ишлар маъмурий судлар юрисдикциясига ўтказилиши, солиқ мажбурияти бўйича даъво қилиш муддати беш йилдан уч йилга туширилиши белгиланди.
Шунингдек камерал солиқ текширувини ўтказишда солиқ тўловчининг ҳудудига кириш; солиқ тўловчининг ҳудудини ва биноларини кўздан кечириш; солиқ тўловчидан ҳужжатларни талаб қилиб олиш ва уни чақиртириш; солиқ тўловчининг ҳужжатлари ва буюмларини олиб қўйиш.тақиқланиши кўрсатилди (бундан қўшилган қиймат солиғи суммаси ўрнини қоплаш (қайтариш)да ўтказиладиган камерал солиқ текширувлари мустасно):
2024 йил 1 январдан бошлаб аҳоли ва тадбиркорлик субъектларига ажратилган кредитлар бўйича қарздорликни ундириш бўйича суднинг ҳал қилув қарори чиқарилганда, мазкур кредитлар бўйича фоизлар ва неустойка ҳисобланиши тўхтатилиши; тўлов миқдори кредит мажбуриятларини бажариш учун етарли бўлмаганда, маблағларни, биринчи навбатда, мутаносиб равишда муддати ўтган асосий қарз ва фоиз қарздорликларини, иккинчи навбатда жорий тўлов учун ҳисобланган фоизлар ва асосий қарзни, кейинги навбатларда неустойка ва ижро харажатларини қоплашга йўналтириш тартиби ўрнатилиши белгилаб ўтилди.
Ушбу Қарор билан белгиланган чора-тадбирлар юртимизда тадбиркорлик фаолаиятини ривожлантириб, тадбиркорлик фаолиятидаги тизимли муаммоларни бартараф этиб, юртимиз ривожига ўз ҳиссасини қўшади десак адашмаган бўламиз.
А.Г.Салиев, Қорақалпоғистон Республикаси Маъмурий суди судьяси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
