Мактаблар янги ўқув йилига тахт қилиб қўйилди

Амударё тумани Мактабгача ва мактаб таълими бўлими тасарруфида 85та умумтаълим мактаблари, 52та мактабгача таълим ташкилотлари ва 1та “Баркамол авлод” болалар мактаби фаолият олиб боради. 2023-2024 ўқув йилида 32 635 ўқувчи ўрнига эга мактабларда халқимизнинг илмга чанқоқ ўқувчи-ёшлари таълим-тарбия олиши режалаштирилган бўлиб, уларга салкам 3800 нафар олий маълумотли, 58 нафар тугалланмаган олий, 208 нафар ўрта махсус маълумотга эга малакали ўқитувчилар сабоқ беришади.

Мактабларни замонавий ахборот технологиялари билан жиҳозлаш борасида давлатимиз томонидан кўрсатилаётган эътибор ва рағбат туфайли, қолаверса, Ўзбекистон Республикаси Вазирлар Маҳкамасининг 2021 йил 29 нобярдаги “Ёшларни “Бир миллион дастурчи” лойиҳаси доирасида ўқитиш бўйича қўшимча чора-тадбирлар тўғрисида”ги 716-сонли Қарори асосида 17та умумтаълим мактабига компьютер синф жамланмалари етказиб берилди. 37та мактаб 40 мб/с, 48та мактаб 100мб/с тезлик интернет тармоғи билан таъминланган.

Ўқувчи-ёшларнинг умумтаълим фанларини мукаммал ўрганишлари учун “Баркамол авлод” болалар мактаби ва умумтаълим мактаблари ҳузурида турли йўналишлардаги 67та тўгарак фаолияти йўлга қўйилган ва мазкур тўгаракларга 1668 нафар ўқувчи-ёшлар қамраб олинган.

Мактабларда янги ўқув йили бошланишига саноқли кунлар қолди. Ўқув муассасаларини янги ўқув йилига тайёрлаш, таъмирталаб мактабларни жорий таъмирлаш ишлари билан танишиш мақсадида биз ижодий гуруҳимиз билан қурилиш-таъмирлаш ишлари олиб борилаётган мактабларда бўлдик.

Айни пайтда Амударё туман Мактабгача ва мактаб таълими бўлими тасарруфидаги 23та мактаб табиий газ тармоғига уланган бўлиб, мазкур мактаблар куз-қиш мавсумида табиий газ билан, 2та мактаб электр энергияси билан, 60та мактаб эса кўмир ёқилғиси билан иситилади.

Ўзбекистон Республикаси Вазирлар Маҳкамасининг 2023 йил 22 июнь кунги “Қорақалпоғистон Республикаси шаҳар ҳамда туманларидаги халқни қийнаб келаётган муаммоларни бартараф қилиш мақсадида ижтимоий соҳа ҳамда инфраструктура объектларида қурилиш-таъмирлаш ишларини олиб бориш ҳақида”ги 1235-сонли Қарори асосида туманнинг Жумуровул маҳалласи ҳудудида жойлашган 45-сонли умумтаълим мактабида лойиҳа қиймати 3,5 миллиард сўмлик мукаммал таъмирлаш ишларини бажариш белгиланган бўлиб, бугунги кунда мактаб биносида таъмирлаш ишлари давом этмоқда.

Мукаммал таъмирлаш жараёнида мактаб биносининг ёғоч деразалари акфа ромларига тўлиқ алмаштирилиб, иситиш тизимлари янгидан ўрнатилди. Барча таъмирталаб синфхоналарнинг поллари қайтадан полланиб, электр пайвандлаш ишлари сифатли олиб борилди. Мактаб биносида айни кунларда сўнгги пардозлаш ишлари ҳам ўз якунига етказилмоқда.

Шунингдек, “Ташаббусли бюджет” маблағлари ҳисобидан Манғит шаҳрининг Навоий номли маҳалласи ҳудудидаги 1-сонли, Беруний номли маҳалласи ҳудудидаги 31-сонли умумтаълим мактаблари биноларида жорий таъмирлаш ишларини амалга ошириш, Ўзбекистон маҳалласи ҳудудидаги 44-сонли мактабга иситиш тизимлари ва акфа дераза ромларини ўрнатиш, Дарёбўйи маҳалласидаги 65-сонли мактабга қўшимча синфхоналарини қуриш белгиланган. Ушбу тўртта мактабнинг ҳар бирига лойиҳа қиймати 1,2 миллиард сўмдан, Бобур номли овул ҳудудидаги 86-сонли мактабнинг иситиш тизимини ўрнатиш учун 600 миллион, жами 5,4 миллиард сўмлик “Ташаббусли бюджет” маблағларини жалб этиш режалаштирилган.

Иситиш тизимлари кўмир билан ишлайдиган умумтаълим мактабларида 2023-2024 ўқув йилида куз-қиш мавсумини беталофат ўтказиш мақсадида режа қилинган 4302 тонна кўмир ёқилғиси таълим муассасаларига етказиб берилиб, кўмир ёқилғисининг сифатли сақланиш чоралари кўриб қўйилди. Ёқилғи маҳсулотлари кўмирхоналарга киритилиб, устидан қалин лой сувоқ қилинди.

Хулоса қилиб айтганда, Амударё туман Мактабгача ва мактаб таълими бўлими тасарруфидаги барча умумтаълим муассасалари янги ўқув йилига тахт ҳолатга келтирилган 2023-2024 ўқув йилида туман мактабларига 1-синфларга қабул қилинадиган 4343 нафар болажонлар учун “Президент совғаси” – 12 номдаги ўқув қуроллари ҳам қабул қилиниб, тайёрлаб қўйилди. Қилинаётган барча саъй-ҳаракатлар Янги Ўзбекистоннинг баркамол ва етук янги авлодига мукаммал таълим-тарбия беришдек шарафли вазифани адо этишга қаратилгандир.

Робия ЙЎЛДОШЕВА.