ОТА-ОНА БОЛАМ, ДЕБ ЯШАСИН!
Оила борки, ҳаммасида ҳам баъзан келишмовчиликлар, бир-бировни тушунмаслик, бирининг кўнглини бири англамай қолиши натижасида хафагарчиликлар бўлиб туради. Шундай дамларда эр ё хотиннинг бир гапдан қолиши, бироз босиқлик қилиши, ёши улуғларнинг панд-насиҳати оилавий ҳаётнинг яна ўз изига тушиб кетишига сабаб бўлади.
Халқимизнинг йиллар элагидан ўтган оила тотувлигини, ҳамжиҳатлигини асрашга оид ибратли ҳикоялари, ўгитлари бор. Кекса момолар бўй етган йигит-қизларга уқтирадиган бунингдек насиҳатомуз ҳикояларда улкан ҳаёт ҳақиқати яширин. Шулардан бирида айтилишича, турмуш қураётган йигит ва қиз донишманднинг олдига бориб:
– Биз турмуш қурмоқчимиз. Қандай қилсак бахтли, саодатли умр кечирамиз, – деб сўрашибди. Шунда донишманд уларга:
– Оила қурган кунингиздан бошлаб кўзингиз кўр, қулоғингиз кар бўлсин, шунда тинч-осойишта умргузаронлик қиласизлар, – деб жавоб берган экан.
Албатта, оиладаги баъзи камчиликларга кўз юмиб, майда, арзимаган гап-сўзларга қулоқ солмай, оилага меҳр бериш, шу муқаддас қўрғонни обод, нурафшон этиш ҳамманинг ҳам қўлидан келавермайди. Чор-атрофимизда арзигулик сабабсиз ажрашиб кетаётган, гулдай фарзандларини тирик етим қилаётганларни кўриб, уларнинг ҳаётга енгил қараётганларига ачинади, одам.
Менинг ўқитувчилик фаолиятимни бошлаганимга йигирма йилга яқинлашди. Ўқувчиларга она тили ва адабиёт фанидан дарс бераман. Меҳнат фаолиятим давомида отаси ё онаси вафот этган болаларга, ажрашган оилалар фарзандларига ҳам таълим берганман. Шу жараёнда англадимки, норасида бўлса-да, уларнинг ҳеч қачон қалби кулмайди, ҳаётда ҳар қандай қувонч ҳам уларни чинакам бахтли қилолмайди. Бу оилавий ажралишларнинг оқибати қанчалик оғир эканлигини кўрсатади. Мен доим шулар ҳақида ўйлаганимда ота-оналик мажбурияти жуда улкан эканлигини чуқур ҳис қиламан.
Юртимизда оилавий ажримларнинг кўпайиб бораётгани болалар тақдирига бефарқликдир.
Оилада фарзанд дунёга келдими – ота-она шу норасиданинг ҳаётда бахтиёр, шодон яшаши учун масъул эканлигини англашлари лозим.
Барно Шомуродова,
33-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
