КОНСТИТУЦИЯВИЙ ЛОЙИҲАДА БОЛА ҲУҚУҚЛАРИ ЯНАДА МУСТАҲКАМЛАНГАН

Мамлакатимизда 25 июндан “Ўзбекистон Республикасининг Конституциясига ўзгартириш ва қўшимчалар киритиш тўғрисида”ги Ўзбекистон Республикаси Конституциявий қонуни лойиҳасининг умумхалқ муҳокамаси бошланди.
Айни пайтда юртимизда олиб борилаётган Конституциявий ислоҳотларда олимлар, ҳуқуқшунослар, мутахассислардан ташқари, фуқаролар ҳам бевосита иштирок этмоқда. Мазкур сиёсий жараён жамиятнинг барча тоифалари таклифларини ўрганиш ва қабул қилиш билан бошланганлиги ҳам мамлакатимизда инсон манфаатлари биринчи ўринга қўйилганини англатади.
Конституциявий қонун лойиҳаси Конституциямизнинг 60 дан ортиқ моддаларига 200 дан ортиқ тузатишлар киритилишини назарда тутмоқда. Ушбу ўзгартиришлар, қўшимчалар ва янги нормалар киритилиши кутилаётган янги таҳрирдаги Конституция “инсон-жамият-давлат” тамойили акс этганлиги билан муҳим аҳамият касб этмоқда.
Айниқса, Лойиҳанинг 31-бандидаги 64-модданинг таҳририда, ота-оналар ва уларнинг ўрнини босувчи шахслар ўз болаларини вояга етгунига қадар боқиши, уларнинг тарбияси, таълими, соғлом, тўлақонли ва уйғун камол топиши тўғрисида қайғуриши шарт. Давлат ва жамият етим болаларни ва ота-онасининг васийлигидан маҳрум бўлган болаларни боқишни, тарбиялашни, уларнинг соғлом, баркамол ривожланишини ва таълим олишини таъминлайди, ушбу йўналишдаги хайрия фаолиятини рағбатлантиради», деб кўрсатилган.  
Ўзгартирилаётган Конституцияда 65-модданинг иккинчи қисми эса, қуйидаги мазмундаги иккинчи, учинчи ва тўртинчи қисмлар билан алмаштирилсин: «Боланинг манфаатлари, болаларнинг тўлақонли, жисмоний, ақлий ва маданий ривожланиши учун барча шарт-шароитларни яратиш давлат сиёсатининг энг муҳим устувор йўналишидир. Оналик, оталик ва болалик давлат томонидан муҳофаза қилинади. Давлат ва жамият болаларда ҳамда ёшларда миллий ва умуминсоний қадриятларга содиқликни, буюк аждодларимизнинг бой маънавий меросидан фахрланиш туйғусини шакллантириш тўғрисида ғамхўрлик қилади», деб янгидан таҳрир қилинган.
 Эътироф этилаётган ушбу Конституциявий тузатишлар, авваламбор, жамиятнинг турли ижтимоий қатламларига мансуб бўлган фуқароларнинг шахсий, ижтимоий, иқтисодий, сиёсий, маданий ва экологик ҳуқуқлари ҳамда манфаатларини таъминлаш билан бирга миллат, юрт келажаги бўлган ёш авлоднинг ҳуқуқ ва манфаатларини ҳимоя қилишга қаратилгани билан аҳамиятлидир. Ишончимиз комилки, янги таҳрирдаги Конституция юртимиз фаровонлиги, тараққиёт ривожига хизмат қилиш билан бирга ёш авлоднинг комил инсонлар бўлиб вояга етишларида муҳим аҳамият касб этади.

Жаҳонгир Холмуродов, туман ҳокимлиги

Болаларни ҳимоя қилиш масалалари шўъбаси раҳбари.